ខេត្តរតនគិរី ៖ ជនសង្ស័យជាជនជាតិឡាវម្នាក់ត្រូវបានកម្លាំងប៉ុស្តិ៍នគរបាលការពារព្រំដែនលេខ៤០៧ សហការជាមួយកម្លាំងកងអនុសេនាតូចទី៣ និងកម្លាំងបរិស្ថាន បានត្រួតពិនិត្យ និងឃាត់ខ្លួនពីបទជួញដូរសារធាតុញៀនខុសច្បាប់។ ការឃាត់ខ្លួនជនសង្ស័យនោះធ្វើឡើងនៅវេលាម៉ោង៤ល្ងាច ថ្ងៃទី១៣ ខែកក្កដា ឆ្នាំ២០១៨ ត្រង់នៅចំណុចកងអនុសេនាតូចទី៣។
ប្រភពពីនគរបាលវរការពារព្រំដែនគោកបានឱ្យដឹងថា ជនសង្ស័យខាងលើឈ្មោះ ថាវ ស៊ឺន ភេទប្រុស អាយុ៤៣ឆ្នាំ ជនជាតិព្រៅ (ឡាវ) បានជួញដូរសារធាតុញៀនចេញពីប្រទេសឡាវចូលមកទឹកដីនៃប្រទេសកម្ពុជា ហើយក៏ត្រូវកម្លាំងបានត្រួតពិនិត្យសន្តិសុខសណ្ដាប់ធ្នាប់តាមបន្ទាត់ព្រំដែន ស្រាប់តែជួបប្រទះ និងធ្វើការឃាត់ខ្លួនបានតែម្តង និងដកហូតវត្ថុតាងមាន ថ្នាំញៀនមេតំហ្វេតាមីនទម្ងន់៤៤៣.០៨ក្រាម, នាឡិកាដៃមួយខ្សែ, លុយឡាវចំនួន៧៧ ០០០គីប និងសៀវភៅគ្រួសារជនជាតិឡាវ១ក្បាលផងដែរ។
ប្រភពបន្តទៀថា នៅព្រឹកថ្ងៃទី១៤ លោកឧត្តមសេនីយ៍ត្រី ហេង រតនៈ ស្នងការរងទទួលផែនការងារព្រំដែនបានទំនាក់ទំនងជាមួយលោកមេបបញ្ជាការកងទ័ពការពារព្រំដែនវៀតណាមខេត្តកន្ទូម ដើម្បីនាំខ្លួនជនសង្ស័យមកស្នងការដ្ឋានខេត្តរតនគិរី។ លុះដល់ថ្ងៃទី១៧ កក្កដា ទើបភាគីវៀតណាមសហការ និងបញ្ជូនជនសង្ស័យ រួមទាំងវត្ថុតាងមកដល់ច្រកទ្វាអូរយ៉ាដាវ។
ក្រោយមកលោកវរសេនីយ៍ឯក ថេង ចន្ទ័ធី មេបញ្ជាការវរលេខ២០៣ បានធ្វើកំណត់ហេតុប្រគល់ជនសង្ស័យ និងវត្ថុតាងជូនលោកវរសេនីយ៍ទោ លាង អ៊ីម នាយការិយាល័យប្រឆាំងគ្រឿងញៀននៃស្នងការដ្ឋាននគរបាលខេត្តរតនគីរី ដើម្បីចាត់ការតាមនីតិវិធីបន្ត ៕
ចែករំលែកព័តមាននេះ