ខេត្តកំពង់ឆ្នាំង ៖ ត្រាក់ទ័រ១គ្រឿង ក្នុងចំណោម៣គ្រឿងត្រូវបានលោកមេឃុំឆ្នុកទ្រូ សហការជាមួយ នគរបាល ប្រជាការពារ កងរាជអាវុធហត្ថ ស្ទាក់ចាប់បាននៅម៉ោងប្រមាណ១០ព្រឹក ថ្ងៃទី ១៧ ខែកក្កដា ឆ្នាំ២០១៨ នៅចំណុចព្រំប្រទល់ភូមិសេះស្លាប់ និងភូមិកំពង់អួរ ក្នុងឃុំឆ្នុកទ្រូ ស្រុកបរិបូណ៍ ខេត្តកំពង់ឆ្នាំង ខណៈដែល ត្រាក់ទ័រទាំងនោះ កំពុងធ្វើសកម្មភាពឈូសឆាយដីព្រៃលិចទឹកតំបន់ ៣ ដែលជាតំបន់ហាមឃាត់។
យ៉ាងនេះក្តី លោកមេឃុំដែលដឹកនាំការបង្ក្រាបខាងលើមានការព្រួយបារម្ភ ខ្លាចមានការដោះលែងដូចកាលគ្រាមុនៗទៀត ។
លោក សាំង ស៊ន មេឃុំឆ្នុកទ្រូ បានផ្ដល់កិច្ចសម្ភាសន៍ជាមួយភ្នាក់ងារកោះសន្តិភាព នៅរសៀលថ្ងៃទី១៧ខែកក្កដា នេះថា លោកបានសហការគ្នាជាមួយសមត្ថកិច្ច នគរបាល ប៉េអឹម ចុះទៅឃាត់ចាប់ត្រាក់ទ័រ ដែលកំពុងតែធ្វើសកម្មភាពឈូសឆាយព្រៃលិចទឹកតំបន់ដី តំបន់៣ ក្នុងភូមិសាស្ត្រភូមិសេះស្លាប់ ក៏ប៉ុន្តែនៅពេលដែលសមត្ថកិច្ចទៅដល់អ្នកបើកត្រាក់ទ័រទាំងនោះដឹងខ្លួនទាន់ បានបើករត់អស់ តែពេលនោះសមត្ថកិច្ច ស្ទាក់ចាប់បាន១គ្រឿង ក្នុងចំណោមត្រាក់ទ័រ៣គ្រឿងនៅចំណុចភូមិកំពង់ភូមិកំពង់អួរ រួមជាមួយនឹងរថយន្តម៉ាកកាមរីឆ្លាម ១ គ្រឿងទៀត ដែលបើកបរដោយម្ចាស់ត្រាក់ទ័រខាងលើ និងមានមន្ត្រីបរិស្ថានមួយរូបទៀតផងដែរ ចំណែកកម្មករបើកបរមានឈ្មោះ នួន សុណាល់ ។ ក្រោយពេលធ្វើសកម្មភាពឃាត់បានហើយ ក៏បាននាំមកកាន់សាលាស្រុកបរិបូណ៍ ដើម្បីចាត់ការតាមនីតិវិធី ។
លោកបានបញ្ជាក់ថា ម្ចាស់ត្រាក់ទ័រខាងលើមានឈ្មោះ ស សារ៉ន ជាកូនរបស់ឈ្មោះ ស ប៊ុនធឿន ។ នៅពេលចាប់ឃាត់ត្រាក់ទ័រខាងលើ ឈ្មោះ ស សារ៉ន បានតាំងខ្លួនជាអ្នកភ្នាក់ងារកាសែត KHMER READ (ខ្មែរអាន) ហើយបានយកកាមេរ៉ាចេញពីក្នុងរថយន្តមកថតរូបលោកទៀតផង ។ តែយ៉ាងនេះក្តី លោកបាននាំមកកាន់សាលាស្រុកបរិបូណ៍ ដើម្បីឱ្យមន្ត្រីជំនាញធ្វើកំណត់ហេតុសាកសួរតាមនីតិវិធី ។
ទោះយ៉ាងនេះក្តី លោកមានការព្រួយបារម្ភថា ត្រាក់ទ័រល្មើសច្បាប់ខាងលើ អាចនឹងត្រូវធ្វើការដោះលែងទៅវិញ ដូចកាលគ្រាមុនៗ ទៀត។ គឺលើកទី១ កាលពីថ្ងៃទី១៤ ខែមីនា ឆ្នាំ២០១៨ លោកបានដឹកនាំសមត្ថកិច្ចចាប់បាន២គ្រឿង, លើកទី២ ចាប់នៅថ្ងៃទី១៦ ខែមិថុនា ឆ្នាំ២០១៨ ចាប់បាន១គ្រឿង ។ ទាំងពីរលើក គឺត្រូវបានដោះលែងទៅវិញទាំងអស់ ចំណែកលើទី៣ គឺចាប់នៅថ្ងៃទី១៧ ខែកក្កដា ឆ្នាំ២០១៨ នេះ ។
ហេតុដូចនេះហើយ ក្នុងនាមលោកជាអាជ្ញាធរឃុំ សំណូមពរដល់អាជ្ញាធរគ្រប់ជាន់ថ្នាក់ មន្ត្រីជំនាញ និងស្ថាប័នតុលាការ សូមចាត់ការម្ចាស់ត្រាក់ទ័រនេះទៅតាមផ្លូវច្បាប់ ។ សង្ស័យផលប្រយោជន៍ធំណាស់បានជាចាប់លែងៗ …. ។
ព័ត៌មានពិស្តានឹងផ្សាយជូននៅលើកាសែតកោះសន្តិភាព
ចែករំលែកព័តមាននេះ