ខេត្តកណ្តាល ៖ ដោយសារភ្លើងប្រចណ្ឌ បុរសម្នាក់បានកាប់ប្រពន្ធជាច្រើនពូថៅ បណ្តាលឲ្យស្លាប់ក្នុងថ្លុកឈាមយ៉ាងអាណោចអាធ័ម កាលពីថ្ងៃទី១៥ កក្កដា កន្លងទៅ និងធ្វើឲ្យមានការភ្ញាក់ផ្អើលឡើងវេលាម៉ោង៨និង៣០នាទីយប់ នៅលើផ្ទះស្ថិតក្នុងភូមិអង្គពពាយ ឃុំក្រាំងម្កាក់ ស្រុកអង្គស្នួល ។
ស្ត្រីរងគ្រោះឈ្មោះ ឈិត ម៉ាច អាយុ៣៦ឆ្នាំ ជាកម្មការិនីរោងចក្រ ចំណែកប្តីកំណាចឈ្មោះ ណន ណាត អាយុ៣៣ឆ្នាំ ជាកម្មករសំណង់ ។ លោក មាន សំណាង អធិការនគរបាលស្រុកអង្គស្នួលបានឱ្យដឹងថា នៅយប់ថ្ងៃទី១៥ ខែកក្កដា នោះ ប្តីប្រពន្ធនេះបានឈ្លោះប្រកែកគ្នា បន្តិចក្រោយមកក៏ស្ងាត់មាត់ទៅ ។ លុះពេលប្រពន្ធដេកលក់ បុរសជាប្តីក៏បានកាប់ប្រពន្ធចំនួន៥ពូថៅចំក្បាល បណ្តាលឲ្យស្លាប់ភ្លាម ហើយយកភួយគ្របដណ្តប់ពីលើសព ។
បន្ទាប់មក បុរសជាប្តីបាននាំកូនតូចៗ២នាក់ ជិះម៉ូតូគេចខ្លួនទៅស្រុកកំណើត នៅភូមិត្រពាំងក្រសាំង ឃុំក្សេមក្សាន្ត ស្រុកឧដុង្គ ខេត្តកំពង់ស្ពឺបាត់ទៅ ។ ប្រភពព័ត៌មានឲ្យដឹងទៀតថា លុះនៅម៉ោងយប់ថ្ងៃដដែលនោះ ប្អូនប្រុសរបស់ស្ត្រីរងគ្រោះឈ្មោះ ឈិត តាក់ អាយុ២៧ឆ្នាំ ស្នាក់នៅក្នុងភូមិជាមួយគ្នា ឃើញផ្ទះបងស្រីមិនបើកភ្លើង ខុសទម្លាប់ធម្មតា ក៏ដើរទៅមើលហើយស្រែកហៅមិនឮឆ្លើយ ។ ដោយមានការសង្ស័យ ក៏ឡើងទៅមើលនៅលើផ្ទះបញ្ចាំងភ្លើងពិល ឃើញបងស្រីស្លាប់បាត់ទៅហើយ ទើបចុះមកវិញប្រាប់ប្រពន្ធនិងទៅរាយការណ៍ជូនមេភូមិ ព្រមទាំងសមត្ថកិច្ចមូលដ្ឋាន ។
ក្រោយពីទទួលបានព័ត៌មាននេះភ្លាម សមត្ថកិច្ចស្រុកអង្គស្នួល សហការជាមួយសមត្ថកិច្ចជំនាញខេត្តបានចុះទៅដល់ពិនិត្យនិងធ្វើកោសល្យវិច័យ ព្រមទាំងស្រាវជ្រាវស៊ើបអង្កេត ។ រហូតដល់ម៉ោង១០និង១០នាទីយប់ សមត្ថកិច្ច ក៏ឈានទៅកំណត់បានមុខសញ្ញាសង្ស័យគឺបុរសជាប្តី ទើបសហការជាមួយនគរបាលស្រុកឧដុង្គ ខេត្តកំពង់ស្ពឺ ឈានទៅឃាត់ខ្លួនជនសង្ស័យនៅភូមិត្រពាំងក្រសាំង ឃុំក្សេមក្សាន្ត ស្រុកឧដុង្គ ។នៅចំពោះមុខសមត្ថកិច្ច បុរសជាប្តីរូបនេះសារភាពថា ខ្លួនពិតជាបានប្រព្រឹត្តអំពើមនុស្សឃាតដោយកាប់ប្រពន្ធដែលកំពុងដេកលក់ចំក្បាលចំនួន៥ពូថៅ មូលហេតុមកពីប្រចណ្ឌ ដែលមានរយៈពេល៣ឆ្នាំមកហើយ និងធ្លាប់មានជម្លោះជាមួយគ្នាជាញឹកញាប់ ។
ជនសង្ស័យរួមជាមួយវត្ថុតាង ត្រូវបាននាំមកកាន់អធិការដ្ឋាននគរបាលស្រុកអង្គស្នួល ដើម្បីបន្តចាត់ការតាមនីតិវិធី ។ ទោះបីជាបែបណា មិនដឹងថា បុរសជាប្តីរូបនេះប្រចណ្ឌប្រពន្ធទៅលើបុរសណានោះទេ ហើយក៏មិនដឹងថាមានភ័ស្តុតាងបែបណាទើបហ៊ានលើកពូថៅកាប់ប្រពន្ធគ្មានញញើតដៃបែបនេះ ។ តាមទោសកំហុសនេះ ប្រហែលជាប់គុកគ្មានថ្ងៃចេញទេ ៕
ចែករំលែកព័តមាននេះ