រាជធានីភ្នំពេញ ៖ ដោយសារកង្វះថវិកា និងការសម្រេចចិត្តព្យាបាលដោយខ្លួនឯង តាមរយៈការប្រាប់តៗពីមាត់មួយទៅមាត់មួយបានធ្វើឲ្យប្រជាពលរដ្ឋខ្មែរភាគច្រើន ដែលកើតជំងឺមហារីកបានវិវត្តន៍ចូលដំណាក់កាលយឺតពេលសម្រាប់ការព្យាបាលឲ្យជាសះស្បើយ។ លោកវេជ្ជបណ្ឌិត អ៊ាវ សុខា ប្រធានផ្នែកមហារីក…
រាជធានីភ្នំពេញ ៖ ដោយសារកង្វះថវិកា និងការសម្រេចចិត្តព្យាបាលដោយខ្លួនឯង តាមរយៈការប្រាប់តៗពីមាត់មួយទៅមាត់មួយបានធ្វើឲ្យប្រជាពលរដ្ឋខ្មែរភាគច្រើន ដែលកើតជំងឺមហារីកបានវិវត្តន៍ចូលដំណាក់កាលយឺតពេលសម្រាប់ការព្យាបាលឲ្យជាសះស្បើយ។
លោកវេជ្ជបណ្ឌិត អ៊ាវ សុខា ប្រធានផ្នែកមហារីក និងជំងឺឈាមនៃមន្ទីរពេទ្យកាល់ម៉ែត ថ្លែងប្រាប់សារព័ត៌មានកោះសន្តិភាពឲ្យដឹងថា នៅកាល់ម៉ែតអ្នកជំងឺមហារីកដែលមកទទួលការពិនិត្យ និងព្យាបាល គឺមាននៅចន្លោះពី ២០០០ ទៅ ៣០០០ នាក់ក្នុងមួយឆ្នាំៗ។
តែបើតាមការរកសិក្សារបស់អង្គការសុខភាពពិភពលោក គឺរកឃើញថា នៅប្រទេសកម្ពុជាយើងក្នុងមួយឆ្នាំ គឺមានអ្នកដែលកើតជំងឺមហារីកថ្មី គឺមានចំនួន ១៥០០០ នាក់ ។ អញ្ចឹងនៅសល់ច្រើនទៀតដែលបងប្អូនយើងអត់បានមកទទួលការព្យាបាល ហើយចេះតែព្យាបាលដោយខ្លួនឯង ហើយជួបបញ្ហានៅផ្ទះនិងខេត្ត ។
លោកវេជ្ជបណ្ឌិត អ៊ាវ សុខា មានប្រសាសន៍បញ្ជាក់ថា៖ «នៅមន្ទីរពេទ្យកាល់ម៉ែតយើងរកឃើញថា ចំនួន ៧០ភាគរយនៃអ្នកជំងឺដែលមកព្យាបាលគឺស្ថិតក្នុងដំណាក់កាលហួសពេលព្យាបាល គឺស្ថិតក្នុងដំណាក់កាលទី ៣ ឬទី៤ ។ មានន័យថា ការព្យាបាលឲ្យជាសះស្បើយនឹងមានការលំបាក ។ ប៉ុន្តែការព្យាបាលនឹងអាចធ្វើឲ្យអ្នកជំងឺគាត់ពន្យាជីវិតគាត់រស់បានយូរ ហើយគាត់រស់នៅសឹងតែដូចមនុស្សជា ប្រកបការងារបានធម្មតា អត់មានរោគសញ្ញាអីទាំងអស់ ។ អញ្ចឹងយើងជួយឲ្យអ្នកជំងឺច្រើនណាស់ដែលគាត់សប្បាយចិត្ត គឺថា គាត់បាត់រោគសញ្ញានឹងអស់ហើយគាត់រស់ដូចមនុស្សជា»។
ក៏ប៉ុន្តែតាមរយៈការព្យាបាលសម្រាប់ពន្យាភាគច្រើនអាចជួយពី ២ទៅ ៣ ឆ្នាំតែ ក៏មានករណីខ្លះអ្នកជំងឺអាចរស់បានដល់ ១០ ឆ្នាំក៏មានដែរ ជាក់ស្តែងអ្នកជំងឺមហារីកសុដន់មួយរូបដែលលោកគ្រូព្យាបាល គឺមានមហារីកនៅវ័យជាង ៦០ ឆ្នាំ តែឥឡូវក្រោយការព្យាបាល គឺគាត់រស់នៅបានជាង ១៣ ឆ្នាំហើយ ។
លោកវេជ្ជបណ្ឌិតបន្តថា៖ «អញ្ចឹងខ្ញុំសូមអំពាវនាវឲ្យបងប្អូនយើង បើទោះបីជាយើងមិនទាន់ស្មើ អាមេរិក ឬស្មើប្រទេសអឺរ៉ុប ប៉ុន្តែកម្ពុជាបានបោះជំហានមួយជំហានធំហើយ ។ ក្នុងនាមខ្ញុំជាប្រជាជនសមាញ្ញ ជាគ្រូពេទ្យ មិនមែនជាអ្នកនយោបាយ ខ្ញុំគិតថាយើងបានបោះមួយជំហានយ៉ាងវែង ។ បងប្អូនអាចមកទទួលសេវានៅមន្ទីរពេទ្យកាល់ម៉ែត គឺស្តង់ដាសកលហើយ មានឧបករណ៍ទំនើបឈានមុខផងដែរ ។
នៅពេលសាកសួររឿងបងប្អូនខ្មែរមួយចំនួនទៅព្យាបាលនៅក្រៅប្រទេស លោកវេជ្ជបណ្ឌិតមានប្រសាសន៍ថា ក្នុងនាមរូបលោកជាសមាជិកសមាគមគ្រូពេទ្យមហារីកប្រចាំប្រទសអាស៊ានមួយរូប គឺលោកទទួលស្គាល់ថា តាមរយៈស្ថិតិ គឺថាបងប្អូនប្រជាជនកម្ពុជាឥឡូវទៅវៀតណាមតិចជាងមុន ហើយគាត់ងាកទៅប្រទេសថៃ។ ទៅសិង្ហបុរីក៏ធ្លាក់ចុះខ្លាំងដែរ ដោយសារតែថ្លៃពេក ហើយឆ្នាំ២០១៨នេះ គឺប្រជាពលរដ្ឋខ្មែរទៅថៃ ក៏ចាប់ផ្តើមថយចុះខ្លះដែរ ។
ដោយសារការឆាប់រកឃើញ និងឆាប់ព្យាបាលជំងឺមហារីក អាចជួយសង្គ្រោះជីវិតមនុស្ស គ្រូពេទ្យជំនាញជំរុះឱ្យប្រជាជនកម្ពុជាមានការពិនិត្យជំងឺទៀងទាត់ ហើយទទួលការព្យាបាលជំងឺទាន់ពេលវេលា៕
អត្ថបទនេះនាំជូនមកដោយក្រុមហ៊ុនធានារ៉ាប់រងជីវិត AIA
ចែករំលែកព័តមាននេះ