រាជធានីភ្នំពេញ ៖ សេដ្ឋកិច្ចប្រទេសកម្ពុជា នៅក្នុងឆមាសទី១ឆ្នាំនេះ បានបន្តរីកចម្រើនប្រកបដោយភាពជឿជាក់ ដោយរក្សាបាននូវសិ្ថរភាពម៉ាក្រូសេដ្ឋកិច្ចល្អប្រសើរ, អត្រាអតិផរណាស្មើជាង២%, អត្រាប្តូរប្រាក់ស្ថិតក្នុងរង្វង់៤ពាន់រៀលក្នុង១ដុល្លារ ហើយផលិតផលសរុបក្នុងស្រុកសម្រាប់មនុស្សម្នាក់រំពឹងថា នឹងកើនឡើងដល់១.៥៦៣ដុល្លារក្នុងឆ្នាំ២០១៨ ។ នេះបើយោងតាមសេចក្តីប្រកាសរបស់ធនាគារជាតិនៃកម្ពុជា កាលពីថ្ងៃទី១៤ កក្កដា ។
តាមសេចក្តីប្រកាស ក្នុងឆមាសទី១ ឆ្នាំ២០១៨នេះ អត្រាអតិផរណាមានកម្រិត២,៦% និងអត្រាប្តូរប្រាក់មានស្ថិរភាពក្នុងរង្វង់៤.០៣៧រៀលក្នុង១ដុល្លារ ។ ស្ថិរភាពនេះបានបន្តពង្រឹងទំនុកចិត្តរបស់ភ្នាក់ងារសេដ្ឋកិច្ចក្នុងការបង្កើនការវិនិយោគ, ការប្រើប្រាស់ និងសកម្មភាពពាណិជ្ជកម្មនានា ស្របតាមការ
កើនឡើងនៃចំណូល ហើយផលិតផលសរុបក្នុងស្រុក(ផ.ស.ស.) ក្នុងមនុស្សម្នាក់ៗរំពឹងថា នឹងកើនឡើងដល់១.៥៦៣ដុល្លារក្នុងឆ្នាំ២០១៨នេះ។ លើសពីនេះ ទុនបម្រុងអន្តរជាតិបានកើនឡើងស្មើនឹងប្រមាណ៦ខែនៃការនាំចូលទំនិញ និងសេវា ។ កម្រិតខ្ពស់នៃទុនបម្រុងអន្តរជាតិបានបង្កើនភាពធន់នៃសេដ្ឋកិច្ចកម្ពុជាចំពោះការប៉ះទង្គិចផ្សេងៗដែលអាចកើតឡើងជាយថាហេតុ ។
ទន្ទឹមនឹងនេះ ធនាគារជាតិនៃកម្ពុជាលើកឡើងថា ការប្រើប្រាស់ប្រាក់រៀលត្រូវបានលើកកម្ពស់ជាលំដាប់ ហើយបច្ចុប្បន្ន ការចរាចរប្រាក់រៀលបានកើនឡើងប្រមាណ២២% ខ្ពស់ជាងរយៈពេលដូចគ្នានៅឆ្នាំមុន (១៨%) ដោយសារកំណើនជំនឿទុកចិត្តរបស់សាធារណជនមកលើប្រាក់រៀល ។ វិស័យធនាគារបានបន្តរួមចំណែកយ៉ាងសកម្ម ក្នុងការជំរុញកំណើនសេដ្ឋកិច្ចកម្ពុជាប្រកបដោយបរិយាប័ន្ន ។ ឥណទានត្រូវបានផ្តល់ដល់គ្រប់វិស័យចម្បងៗនៃសេដ្ឋកិច្ច ដោយបានកើនឡើងក្នុងអត្រា១៨,៨%ក្នុង១ឆ្នាំ ដែលជាកម្រិតសមស្របសម្រាប់គាំទ្រការរីកចម្រើននៃសកម្មភាពសេដ្ឋកិច្ច និងមិនបង្កផលប៉ះពាល់ដល់ស្ថិរភាពហិរញ្ញវត្ថុ ។ កំណើនឥណទាននេះបានពឹងផ្អែកកាន់តែច្រើនលើប្រាក់បញ្ញើក្នុងស្រុក ដែលមានកំណើន២២% ។
លើសពីនេះ អត្រាការប្រាក់ក្នុងវិស័យហិរញ្ញវត្ថុ បានធ្លាក់ចុះគួរឱ្យកត់សម្គាល់ គឺប្រមាណ ៣៤%ចំពោះឥណទានជាប្រាក់រៀល និង២៩%សម្រាប់ប្រាក់ដុល្លារអាមេរិកនៅឆ្នាំ២០១៦ មកស្មើត្រឹម១៧,៨៥% និង១៧,១៥% រៀងគ្នា។ ការធ្លាក់ចុះនេះ បានផ្តល់ភាពអំណោយផលដល់ប្រជាកសិករ សហគ្រាសធុនតូច និងមធ្យម ក្នុងការទទួលបានឥណទានពីវិស័យមីក្រូហិរញ្ញវត្ថុក្នុងកម្រៃសមស្រប សម្រាប់លើកស្ទួយជីវភាពរស់នៅ និងកាត់បន្ថយភាពក្រីក្រ ។
ម្យ៉ាងទៀត ធនាគារជាតិនៃកម្ពុជា ក៏បានសហការជាមួយអាជ្ញាធរពាក់ព័ន្ធនានាទប់ស្កាត់ចរាចរណ៍ និងការដោះដូររូបិយប័ណ្ណអេឡិចត្រូនិក (cryptocurrency) ដែលគ្មានការអនុញ្ញាត និងផ្តល់កម្ចីជាមួយអត្រាការប្រាក់ខ្ពស់របស់អ្នកផ្តល់កម្ចីខុសច្បាប់ ដើម្បីការពារប្រជាពលរដ្ឋកុំឱ្យចាញ់បោក និងខាតបង់ដោយសារជនខិលខូចមួយចំនួន ៕
ចែករំលែកព័តមាននេះ