រាជធានីភ្នំពេញ ៖ ការទិញ ឬលក់អចលនទ្រព្យ ប្រសិនបើយើងឈ្វេងយល់មិនបានស៊ីជម្រៅទេ អាចនឹងធ្វើឲ្យម្ចាស់អចលនទ្រព្យបាត់បង់នូវអត្ថប្រយោជន៍ជាច្រើន ដូចជា ពេលវេលា ការរំខាន តម្លៃ…
រាជធានីភ្នំពេញ ៖ ការទិញ ឬលក់អចលនទ្រព្យ ប្រសិនបើយើងឈ្វេងយល់មិនបានស៊ីជម្រៅទេ អាចនឹងធ្វើឲ្យម្ចាស់អចលនទ្រព្យបាត់បង់នូវអត្ថប្រយោជន៍ជាច្រើន ដូចជា ពេលវេលា ការរំខាន តម្លៃ បញ្ហា និងការគ្រោះថ្នាក់ផ្សេងៗ ជាដើម ។ ចំណែកអ្នកទិញ ក៏ប្រឈមនឹងបញ្ហាស្រដៀងគ្នាដែរ ។ ផ្ទុយមកវិញ ប្រសិនបើមានភ្នាក់ងារដែលមានវិជ្ជាជីវៈ និងមានអាជ្ញាប័ណ្ណទទួលស្គាល់ពីរាជរដ្ឋាភិបាល ជាអ្នកសម្របសម្រួលនោះ ទាំងអ្នកលក់ និងអ្នកទិញ ពិតជានឹងសម្រេចបានទៅតាមបំណងប្រាថ្នា ។
យោងតាមរបាយការណ៍របស់ក្រុមហ៊ុនបានបង្ហាញសូចនាករសំខាន់ៗមួយចំនួនដែលអ្នកលក់ឬអ្នកទិញ គួរជ្រើសរើសក្រុមហ៊ុនភ្នាក់ងារអចលនទ្រព្យជំនាញ ដើម្បីធ្វើជាទីប្រឹក្សា ដោយហេតុថា ក្រុមហ៊ុនភ្នាក់ងារអចលនវត្ថុ ដែលមានអាជ្ញាប័ណ្ណពីក្រសួងសេដ្ឋកិច្ច គឺជាក្រុមហ៊ុនដែលមានទីតាំងពិតប្រាកដ ត្រូវបានចុះបញ្ជីត្រឹមត្រូវនៅក្រសួងសេដ្ឋកិច្ច ។ ក្រុមហ៊ុនបែបនេះមានជំនាញវិជ្ជាជីវៈច្បាស់លាស់ និងបទពិសោធន៍គ្រប់គ្រាន់ ។
ទន្ទឹមនឹងនេះ ក្រុមហ៊ុនក៏មានការទទួលខុសត្រូវខ្ពស់លើសេវាកម្មរបស់ខ្លួន, មានការធានាពីគុណភាពនៃសេវាកម្មវិជ្ជាជីវៈ, គោរពតាមគោលការណ៍គ្រឹះនៃក្រមសីលធម៌វិជ្ជាជីវៈ គឺ សុចរិតភាព, អព្យាក្រឹត្យភាព, សមត្ថភាពវិជ្ជាជីវៈ, រក្សាការសម្ងាត់ និងប្រតិបត្តិវិជ្ជាជីវៈ និងមានសេវាកម្មជាកញ្ចប់ពីដើមដល់ចប់ ។
ចំណុចទាំងអស់ខាងលើនេះ ជាមូលហេតុដែលធ្វើឲ្យអតិថិជនមានទំនុកចិត្តខ្ពស់ និងគួរតែប្រើប្រាស់សេវាកម្មភ្នាក់ងារអចលនវត្ថុ ដែលមានអាជ្ញាប័ណ្ណពីក្រសួងសេដ្ឋកិច្ច ។
របាយការណ៍ដដែលក៏បានឲ្យដឹងទៀតថា ចំពោះអត្ថប្រយោជន៍ដែលអតិថិជនទទួលបានពីសេវាកម្មរបស់ក្រុមហ៊ុនភ្នាក់ងារអចលនវត្ថុ រួមមាន ទទួលបានទីប្រឹក្សាជាភ្នាក់ងារអចលនវត្ថុ ដែលមានបទពិសោធន៍ និងវិជ្ជាជីវៈច្បាស់លាស់។ ទទួលបានការផ្សព្វផ្សាយទូលំទូលាយ ដោយមិនចាំបាច់ចំណាយថវិកាផ្ទាល់ខ្លួន ។ ទទួលបានសេវាកម្មរៀបចំឯកសារទិញ-លក់ពីដើមដល់ចប់តាមផ្លូវច្បាប់ ។ អាចលក់អចលនវត្ថុបានលឿនឆាប់រហ័សក្នុងតម្លៃទីផ្សារ ឬទិញផ្ទះ-ដីក្នុងក្តីស្រមៃបានតម្លៃថោកជាងទីផ្សារ ចំណេញពេលវេលា និងកាត់បន្ថយការប្រថុយប្រថាន ។
បើតាមអ្នកជំនាញក្នុងវិស័យនេះបានឲ្យដឹងជារឿយៗថា ការទិញ-លក់ខ្លួនឯង គឺមានបញ្ហាប្រឈមមួយចំនួនដូចជា ៖
១-តម្លៃ ៖ អាចខ្ពស់ ឬទាបជាងទីផ្សារ ។
២-បញ្ហាដីធ្លី ៖ ជារឿយៗតែងកើតឡើងរវាងអ្នកទិញ និងអ្នកលក់ ដោយសារភាពមិនច្បាស់លាស់លើអចលនវត្ថុ ដូច្នេះ ពេលផ្ទេរកម្មសិទ្ធិ គឺតែងមានបញ្ហា ។
៣-អំពើចោរកម្ម ៖ ដោយសារការដាក់លក់ខ្លួនឯង ហើយមានជនខិលខូចបន្លំណាត់ជួប ដើម្បីប្រព្រឹទ្ធបទល្មើស ជាដើម ។
ផ្ទុយមកវិញ ប្រសិនបើប្រើប្រាស់សេវាកម្មស្របច្បាប់ និងមានបទពិសោធន៍វិញ គឺមិនបាច់ខ្វល់ពីបញ្ហាទាំងនេះឡើយ ពោលគឺមានសុវត្ថិភាពខ្ពស់បំផុត ។
យោងតាមប្រកាសរបស់ក្រសួងសេដ្ឋកិច្ច និងហិរញ្ញវត្ថុ លេខ៧៦០ សហវ-ប្រក ចុះថ្ងៃទី៣១ ខែកក្កដា ឆ្នាំ២០១៧ ភ្នាក់ងារអចលនវត្ថុត្រូវអនុវត្តឲ្យបានខ្ជាប់ខ្ជួននូវក្រមសីលធម៌វិជ្ជាជីវៈរបស់ខ្លួន ដើម្បីធានាបាននូវសេចក្តីថ្លៃថ្នូរ និងទំនុកចិត្តពីអតិថិជន និងសាធារណជន ដោយគោរពនូវគោលការណ៍៥ចំណុចរួមមាន សុចរិតភាព, អព្យាក្រឹត្យភាព, សមត្ថភាពវិជ្ជាជីវៈ, ការរក្សាការសម្ងាត់វិជ្ជាជីវៈ និងការប្រតិបត្តិវិជ្ជាជីវៈ ៕
ចែករំលែកព័តមាននេះ