រាជធានីភ្នំពេញ ៖ នារីវ័យក្មេងរូបស្រស់ស្អាតម្នាក់ បានព្យាយាមរត់គេចខ្លួនពីម្តាយបង្កើត និងបុរសជាឪពុកមា ហើយប៉ងរត់ចូលរថយន្តដែលកំពុងធ្វើចរាចរណ៍លើដងផ្លូវជាច្រើនលើក ដើម្បីធ្វើអត្តឃាតបង្កការភ្ញាក់ផ្អើលជាខ្លាំង ដល់អ្នកដំណើរទូទៅ រួមទាំងប្រជាពលរដ្ឋក្បែរនោះ ពិសេសមន្ត្រីនគរបាលចរាចរណ៍បានធ្វើអន្តរាគមន៍ចាប់ឃាត់ភ្លាមៗផងដែរ ។
ហេតុការណ៍នេះ កើតឡើងនៅចំណុចគល់ស្ពានព្រះមុនីវង្សត្រើយខាងកើត ក្នុងសង្កាត់ច្បារអំពៅទី១ ខណ្ឌច្បារអំពៅ កាលពីវេលាម៉ោង០៤ និង៣០នាទីថ្ងៃទី១២ កក្កដា ។ នារីរូបស្រស់ដែលប៉ងរត់ចូលឱ្យរថយន្តបុកខាងលើនេះ ពំុត្រូវបានស្គាល់អត្តសញ្ញាណទេ គឺនាងមានវ័យប្រមាណជិត២០ឆ្នាំ ប៉ុន្តែប្រភពឱ្យដឹងថា នាងជាកម្មការិនីរោងចក្រ ។
នៅពេលកើតហេតុ គេក៏ឃើញមានវត្តមានស្ត្រីជាម្តាយបង្កើតរបស់នាង រួមជាមួយបុរសម្នាក់ទៀត ដែលអះអាងជាឪពុកមាផងនោះ បានព្យាយាមសម្របសម្រួលលួងលោមនាងឱ្យត្រឡប់ទៅផ្ទះសិន ចាំនិយាយគ្នា កំុគិតធ្វើរឿងផ្តេសផ្តាសបែបនេះ ។ បើតាមស្ត្រីជាម្តាយឱ្យដឹងយ៉ាងខ្លីថា កូនស្រីគាត់ខឹងសម្បានឹងសាច់ឈាមរបស់ខ្លួន ដែលតែងតែមើលងាយមើលថោកទៅលើរូបនាង ជាហេតុធ្វើឱ្យនាងអាក់អន់ចិត្តក៏សម្រេចចាកចេញទៅស្នាក់នៅផ្ទះជួលខាងក្រៅតែម្នាក់ឯង ។ លុះស្នាក់នៅតែឯងមិនបានប៉ុន្មានផងនេាះ គាត់ជាម្តាយក៏ទូរស័ព្ទណាត់ជួបនៅចំណុចគល់ស្ពានច្បារអំពៅ ដោយសំុឱ្យកូនស្រីទៅនៅផ្ទះជួលជាមួយបងប្អូនដូចមុនវិញ តែនាងមិនព្រម ក៏រត់ចូលឱ្យរថយន្តបុក ទើបធ្វើឱ្យមានការភ្ញាក់ផ្អើលឡើងតែម្តង ។
ក្រោយពីមានការអន្តរាគមន៍ និងសម្របសម្រួលពីសំណាក់សមត្ថកិច្ចចរាចរណ៍រួចមក នាងក៏ព្រមជិះម៉ូតូជាមួយឪពុកមាចាកចេញទៅបាត់តែម្តង ដោយស្ត្រីជាម្តាយជិះរ៉ឺម៉កម៉ូតូតាមពីក្រោយ ។ សូមបញ្ជាក់ថា ទម្រាំនារីរូបស្រស់ខាងលើយល់ព្រមចាកចេញ និងឈប់រត់ចូលរថយន្ត គឺសមត្ថកិច្ច និងសាច់ញាតិព្យាយាមនិយាយលួងលោមអស់រយៈពេលជាង១ម៉ោង ៕
ចែករំលែកព័តមាននេះ