ខេត្តព្រៃវែង ៖ សេចក្តីរាយការណ៍បបឋមឱ្យដឹងថា បុរសម្នាក់ត្រូវសមត្ថកិច្ចនគរបាលស្រុកកញ្ជៀច ឃាត់ខ្លួន កាលពីព្រឹកថ្ងៃទី១៣ កក្កដា ក្រោយគាត់បានហែកទង់ជាតិ និងទង់គណបក្សអស់២ផ្ទាំង ស្ថិតត្រង់ចំណុចភូមិស្វាយចេក ឃុំគោកគង់លិច ស្រុកកញ្ជ្រៀច ខេត្តព្រៃវែង ។
សេចក្តីរាយការណ៍បន្តថា ជនសង្ស័យខាងលើ ឈ្មោះ ផូ ហយ ភេទប្រុស អាយុ៣៣ឆ្នាំ រស់នៅក្នុងភូមិ-ឃុំ កើតហេតុ ។ បើតាមបណ្តឹងរបស់ឈ្មោះ ជុន អុល ភេទប្រុស អាយុ៦៤ឆ្នាំ រស់នៅភូមិគោកគង់កើត ឃុំគោកគង់លិច ស្រុកកញ្ជ្រៀច ប្តឹងសមត្ថកិច្ចថា មុនពេលកើតហេតុខ្លួន និងសមាជិកបក្ស បាននិងកំពុងជិះម៉ូតូ២គ្រឿង ដឹកមេក្រូចាក់ដើរឃោសនាក្នុងយុទ្ធនាការរកសម្លេងឆ្នោត ។
ប្រភពបន្តថា ពេលនោះស្រាប់តែជនខាងលើ មិនដឹងស្រវឹងស្រាមកពីទេ បានស្ទុះទៅចាប់ដកដង្គាមអាគុយ និងឆក់យកទង់ជាតិ ទង់សញ្ញា (បក្ស) ហែកចោល ព្រមទាំងធ្វើសកម្មភាពច្រង៉េងច្រង៉ាងថែមទៀតផង ។ ក្រោយមក ក៏ត្រូវសមត្ថកិច្ចចុះឃាត់ខ្លួនតែម្តង ។
ចែករំលែកព័តមាននេះ