ក្នុងគោលដៅជម្រុញ និងទាក់ទាញទេសចរបរទេសសម្រាប់ទទួលសេវាកម្មពិនិត្យ និងព្យាបាលសុខភាពនៅប្រទេសថៃ រាជរដ្ឋាភិបាលប្រទេសនេះបានដាក់ចេញនូវគោលការណ៍គួរឲ្យចាប់អារម្មណ៍មួយចំនួន។
នៅក្នុងចំណោមនោះ គឺការអនុញ្ញាតឲ្យជនបរទេសមកពីសហរដ្ឋអាមេរិកនិងប្រទេសចំនួន ១៤ នៃសហគមន៍អឺរ៉ុបអាចទទួលបានវីសាស្នាក់នៅ (Long-stay visa) ប្រទេសថៃដល់ទៅ១០ឆ្នាំ ។ នេះបើយោងតាមមន្ត្រីនៃក្រសួងសុខាភិបាលសាធារណៈរបស់ប្រទេសថៃ ។
សម្រាប់ភៀវទេសចរបរទេសពីបណ្តាប្រទេសផ្សេងៗទៀត រួមទាំងកម្ពុជាផងនោះគឺតាមរយៈស្ថានទូតប្រចាំប្រទេសទាំងនោះ គឺអ្នកទេសចរដើម្បីពិនិត្យ និងព្យាបាលសុខភាព (medical tourists) ក៏ទទួលបាននូវការផ្តល់ជូនពិសេសផងដែរ នោះគឺការស្នាក់នៅបានរហូតដល់ទៅ ៣ ខែ (3-month visa) សម្រាប់ការសម្រាកព្យាបាល និងការវះកាត់នូវប្រភេទជំងឺធ្ងន់ធ្ងរផ្សេងៗ ។
ប្រសាសន៍លោកស្រី សៅវ៉ាផា ចុងគីធីពង្ស ( Saowapa Jongkitipong ) ប្រធានផ្នែកសុខាភិបាលអន្តរជាតិនៃក្រសួងសុខាភិបាលសាធារណៈប្រទេសថៃ (Director of International Health Division, Department of Health Service Support, Ministry of Public Health) បានឲ្យដឹងថា កិច្ចប្រឹងប្រែងរបស់សុខាភិបាលថៃ គឺប្រែក្លាយប្រទេសថៃជាមជ្ឈមណ្ឌលវេជ្ជសាស្ត្រអន្តរជាតិ (International Medical Hub 2017-2026) ជាយុទ្ធសាស្ត្រអភិឌ្ឍន៍លើវិស័យសុខាភិបាលដោយជម្រុញទាំង សេវា សុខាភិបាល ទំនើប ឱសថបុរាណថៃ មជ្ឈមណ្ឌលសិក្សា និងសុខុមាលភាព និងទេសចរណ៍ ក្នុងគោលបំណងក្លាយជាប្រទេសកំពូលនៅអាស៊ានលើវិស័យសុខាភិបាល ជាពិសេសបង្កើនចំណូលដល់ប្រជាជនថៃ ។
លោកស្រី បានបន្តទៀតថា នៅប្រទេសថៃ គឺមានមន្ទីរពេទ្យឯកជន និងរដ្ឋចំនួន៦៤ ដែលត្រូវបានទទួលស្គាល់ជាលក្ខណៈអន្តរជាតិ (Joint Commission International’s Accredited Hospitals and Medical Centers) សម្រាប់ការផ្តល់នូវសេវាពិនិត្យ និងព្យាបាលមានកម្រិតស្តង់ដាអន្តរជាតិ ដែលធ្វើឲ្យប្រទេសថៃក្លាយជាប្រទេសដែលមានមន្ទីរពេទ្យស្តង់ដាអន្តរជាតិច្រើនជាងគេនៅអាស៊ី ចំណែកបដិសណ្ឋារកិច្ចដោយបុគ្គលិកសុខាភិបាលក៏ត្រូវបានទទួលស្គាល់ជាអន្តរជាតិផងដែរ ។
សម្រាប់ប្រទេស ៤ នៃ CLMV (Cambodia, Lao, Myanmar and Vietnam) ថៃក៏បានដាក់ចេញនូវគោលការណ៍ Quick Win Project នាឆ្នាំ២០១៦ ដើម្បីទាក់ទាញភ្ញៀវទេសចរសុខាភិបាល ពីប្រទេសទាំង ៤ មកទទួលសេវាសុខភាពនៅប្រទេសថៃ អន្តោរប្រវេសន៍ថៃបានសម្រួលផ្តល់វីសា រយៈ ៩០ ថ្ងៃ ផងដែរ។ ជាក់ស្តែង ជាមួយនឹងគម្រោងមួយនេះ បានទាក់ទាញអ្នកទេសចរសុខាភិបាលពីកម្ពុជាបានចំនួនជាង ២២ ម៉ឺននាក់ក្នុងឆ្នាំ២០១៧ កើនឡើងប្រមាណ១០% ធៀបនឹងឆ្នាំមុនក្នុងរយៈពេលដូចគ្នា។
ជាមួយគ្នានោះផងដែរ ការិយាល័យ Medical Hub Center ត្រូវបានបង្កើតនៅក្នុងព្រលានយន្តហោះអន្តរជាតិថៃ គឺព្រលានយន្តហោះសុវណ្ណភូមិ និងដនមឿង ដូច្នេះអ្នកទេសចរដែលមានបំណងចង់សាកសួរព័ត៌មានលម្អិតនានាពាក់ព័ន្ធនឹងវិស័យសុខាភិបាល និងមន្ទីរពេទ្យនានា សម្រាប់ការពិនិត្យសុខភាព និងការព្យាបាលទៀតផង ជាមួយគ្នានោះដែរ អ្នកទេសចរក៏អាចរកបានឯកសារអំពី Medical Hub Center ក្នុងទស្សនាវដ្តីចែកជូនអ្នកដំណើរលើយន្តហោះផងដែរ ។
លោកស្រី បានបញ្ជាក់ថា គម្រោងនេះបានធ្វើឲ្យវិស័យសុខាភិបាលថៃ ទទួលបាននូវភ្ញៀវបរទេសមកទទួលសេវាសុខភាពនៅថៃកើនឡើងដល់ចំនួនប្រមាណជាង ៣.៣ លាននាក់ ក្នងឆ្នាំ២០១៧ និងបង្កើតបានប្រាក់ចំណូលប្រមាណជាង ១.៧២ កោដិដុល្លារ។ ក្នុងនោះផងដែរ សម្រាប់ប្រទេសកំពូលទាំង ១០ ដែលមានភ្ញៀវទេសចរបរទេសមកទទួលសេវាសុខភាពនៅប្រទេសថៃ គឺ ចិន ម៉ាឡេស៊ី កូរ៉េ ជប៉ុន ឡាវ ឥណ្ឌូនេស៊ី រុស្ស៊ី សហរដ្ឋអាមេរិក សិង្ហបុរី និងកម្ពុជា ។
ប្រភពដដែលបានឲ្យដឹងថា ភ្ញៀវទេសចរបរទេសមកទទួលសេវាសុខាភិបាលនៅប្រទេសថៃ គឺផ្តោតលើ ១-ការពិនិត្យសុខភាព (Check-up), ទី២-សេវាកម្មខាងសុខភាពមាត់ធ្មេញ និងទី៣ គឺការវះកាត់ និងព្យាបាលជំងឺ ធ្ងន់ធ្ងរ ដូចជាជំងឺមហារីកថ្លើម មហារីកសុដន់ និងគ្រោះថ្នាក់សរសៃឈាមក្នុងខួរក្បាល ៕
អត្ថបទនេះនាំជូនមកដោយក្រុមហ៊ុនធានារ៉ាប់រងជីវិត AIA
ចែករំលែកព័តមាននេះ