ទីក្រុងប៉ារីស ៖ អង្គការប្រទេសនាំចេញប្រេង (OPEC) បានព្រមានកាលពីថ្ងៃទី១១ ខែកក្កដា ថា ភាពតានតឹងផ្នែកពាណិជ្ជកម្មលើពិភពលោក អាចនឹងប៉ះពាល់ដល់ទីផ្សារប្រេងដោយកាត់បន្ថយតម្រូវការប្រេងឆៅ ។…
ទីក្រុងប៉ារីស ៖ អង្គការប្រទេសនាំចេញប្រេង (OPEC) បានព្រមានកាលពីថ្ងៃទី១១ ខែកក្កដា ថា ភាពតានតឹងផ្នែកពាណិជ្ជកម្មលើពិភពលោក អាចនឹងប៉ះពាល់ដល់ទីផ្សារប្រេងដោយកាត់បន្ថយតម្រូវការប្រេងឆៅ ។
ក្នុងរបាយការណ៍ប្រចាំខែរបស់ OPEC ក្រុមប្រទេសជាសមាជិកបាននិយាយថា ការលូតលាស់នៃពាណិជ្ជកម្មពិភពលោកនៅឆ្នាំ២០១៧ និង២០១៨ បានជួយដល់ការលូតលាស់សេដ្ឋកិច្ច និងជំរុញដល់តម្រូវការប្រេងឆៅផងដែរ ។
ប៉ុន្តែ OPEC បានបន្តថា វាអាចនឹងមានការផ្លាស់ប្តូរព្រោះតែសហរដ្ឋអាមេរិក និងប្រទេសចិន បានចេញវិធានការដាក់គ្នាទៅវិញទៅមកក្នុងសង្គ្រាមពាណិជ្ជកម្មរបស់ពួកគេ ។
កាលពីថ្ងៃអង្គារ សហរដ្ឋអាមេរិកបានគំរាមថា នឹងដាក់ពន្ធថ្មីលើផលិតផលចិនប្រមាណ ២០០ប៊ីលានដុល្លារ ខណៈចិនសន្យាថា ពួកគេនឹងឆ្លើយតបវិញ ។ សកម្មភាពនេះកើតមានឡើងមិនយូរប៉ុន្មាន បន្ទាប់ពីពន្ធលើផលិតផលប្រមាណ៣៤ប៊ីលានដុល្លារត្រូវបានអនុម័ត ។
យោងតាម OPEC បានឲ្យដឹងថា ៖« ការលេចឡើងវិញនៃឧបសគ្គពាណិជ្ជកម្មពិភពលោកមកដល់ពេលនេះ មានឥទ្ធិពលបន្តិចបន្តួចលើសេដ្ឋកិច្ចពិភពលោកប៉ុណ្ណោះ » ។
ប៉ុន្តែពួកគេព្រមានថា ៖« ប្រសិនបើភាពតានតឹងនៅតែបន្តកាន់តែធ្ងន់ធ្ងរឡើង រួមជាមួយនឹងភាពមិនប្រាកដប្រជាផ្សេងទៀត វាអាចនឹងប៉ះពាល់ដល់អាជីវកម្ម និងអតិថិជន។ បន្ទាប់មក វាអាចចាប់ផ្តើមប៉ះពាល់ដល់ការវិនិយោគ លំហូរធនធាន និងការចំណាយរបស់អតិថិជន ខណៈបង្កផលប៉ះពាល់ដល់ទីផ្សារប្រេងពិភពលោកផងដែរ » ។
របាយការណ៍នេះបានចេញផ្សាយបន្ទាប់ពី OPEC និងប្រទេសរុស្ស៊ីសន្យាក្នុងកិច្ចប្រជុំកាលពីខែមុនថា នឹងបង្កើនផលិតកម្មប្រេង ។ កិច្ចព្រមព្រៀងនេះបានសម្រេចបន្ទាប់ពីតម្លៃប្រេងឆៅបានកើនឡើងកាលពីដើមឆ្នាំ និងកើនដល់៨០ដុល្លារក្នុង១ធុងកាលពីខែឧសភា ៕
ចែករំលែកព័តមាននេះ