ខេត្តសៀមរាប ៖ សិល្បៈខ្មែរអមតៈបានប្រកាសកម្មវិធី«រដូវវប្បធម៌» ជាលើកដំបូងក្នុងរយៈពេលបីខែពីខែកក្កដា ដល់កញ្ញា ២០១៨នៅភ្នំពេញ ក្រោមប្រធានបទ «ការស្វែងរកអត្តសញ្ញាណ»។ គោលបំណងនៃកម្មវិធីគឺបំផុសសំណួរក្នុងចំណោម និងរវាងទស្សនិកជន ជាមួយសិល្បករ ព្រមទាំងជំរុញឲ្យមានការជជែកពិភាក្សា ទៅលើការយល់ឃើញរបស់ពួកគេជុំវិញពាក្យថា«អត្តសញ្ញាណ» ជាពិសេសអំពីអត្តសញ្ញាណកម្ពុជា ។
ដោយមានការចូលរួមពីសិល្បករ និងអង្គការជាដៃគូនានា ទូទាំងប្រទេសកម្ពុជា និងក្រៅប្រទេសនឹងរៀបចំកម្មវិធីនានា រួមមាន ការសម្ដែងសៀកសហសម័យ ដោយហ្វារពន្លឺសិល្បៈ ល្ខោនកាយវិការ ដោយអេពិកអាត ផ្ទាំងទស្សនីយភាពដោយក្រុមសិល្បករមហាជនភូមិតងណងឡិះ ពីខេត្តរតនគិរី ល្ខោនយីកេខ្មែរ ដោយក្រុមយីកេអតមៈ ល្ខោនហ្ស៊ីកេ ម៉ាឡេស៊ី ។ ក្រៅពីនេះអ្នកចូលរួមនឹងទទួលបានបទពិសោធន៍ដោយផ្ទាល់ពីសិក្ខាសាលា «ស្វែងរកអត្តសញ្ញាណកម្ពុជារបស់យើង» សម្របសម្រួលដោយអង្គការនារីដើម្បីសន្តិភាព ។ ស
ក្ខាសាលារាំច្នៃប្រឌិត ក្រុមសិល្បករអេពិកអាត កិច្ចពិភាក្សានានា ការបញ្ចាំងភាពយន្ត និងពិព័រណ៍រូបថត រៀបចំសម្របសម្រួលជាដៃគូដោយមជ្ឈមណ្ឌលធនធានសោតទស្សន៍បុប្ផាណា អមដោយកិច្ចពិភាក្សាចុងកម្មវិធីជាច្រើនទៀតផង ។ កម្មវិធីទាំងនេះនឹងប្រព្រឹត្តទៅនៅតាមទីតាំងនានាក្នុងរាជធានីភ្នំពេញ ដូចជានៅឆាកសម្ដែងសិល្បៈខ្មែរអមតៈ បរិវេណសារមន្ទីរជាតិ សាកលវិទ្យាល័យនានា មជ្ឈមណ្ឌលធនធានសោតទស្សន៍បុប្ផាណា វិទ្យាស្ថានបារាំងប្រចាំកម្ពុជាជាដើម ។ ចំពោះការសម្ដែងនៅសារមន្ទីរជាតិ សំបុត្រចូលទស្សនាតម្លៃ ២០០០០រៀល។ ឥតគិតថ្លៃសម្រាប់កម្មវិធីបញ្ចាំងភាពយន្ត ពិព័រណ៍ និងកិច្ចពិភាក្សានានា។
កញ្ញាយ៉ុន សុខខន ប្រធានកម្មវិធីអភិវឌ្ឍន៍សិល្បៈ និងជាអ្នកពិនិត្យស្នាដៃសម្រាប់ រដូវវប្បធម៌ សង្ឃឹមថា នឹងមានអ្នកចូលរួមកម្មវិធីរយៈពេលបីខែនេះដើម្បីឈ្វេងយល់អំពី អត្តសញ្ញាណកាន់តែស៊ីជម្រៅ ។ បានសម្រិតសម្រាំងកម្មវិធីដែលមានស្នាដៃសម្ដែងចម្រុះគ្នា ព្រមទាំងមានការចូលរួមពីប្រជាជនកម្ពុជាគ្រប់តំបន់ ដែលនេះបានបង្ហាញពីភាពចម្រុះនៃវប្បធម៌របស់ប្រទេសយើង ។
ស្នាដៃមួយចំនួនចំនួនកើតចេញពីលទ្ធផលការងារតាមកម្មវិធី នីមួយៗរបស់សិល្បៈខ្មែរអមតៈ ដូចជាសិក្ខាសាលា មូលនិធិ និងការផ្ដល់កញ្ចប់រៀបចំដំឡើងស្នាដៃ ។ មួយចំនួនទៀតជាស្នាដៃរបស់ក្រុមសិល្បករ និងអង្គការជាដៃគូ ។ នេះជាលើកទីមួយហើយដែលបានរៀបចំរដូវវប្បធម៌ដ៏មានសារសំខាន់នេះ ហើយជឿជាក់ថា កម្មវិធីនេះនឹងក្លាយជាអនុស្សាវរីយ៍ដ៏ល្អ និងមិនអាចបំភ្លេចបានសម្រាប់ទស្សនិកជន និងសិល្បករ ។
អ្នកស្រីសូ ភីណា ប្រធានកម្មវិធីចំណេះដឹង បណ្ដាញ និងគោលនយោបាយវប្បធម៌ និងជាអ្នកពិនិត្យកម្មវិធីមនុស្សជាតិ នៃរដូវវប្បធម៌នេះ បានថ្លែងថា«ខ្ញុំពិតជាសប្បាយរីករាយណាស់ដែលកម្មវិធីរដូវវប្បធម៌នេះត្រូវបានសម្រិតសម្រាំងយ៉ាងពិសេស ហើយរាល់ស្នាដៃសម្ដែង និងឱកាសនានា គឺសម្រាប់ទស្សនិកជន និងសិល្បករ ស្វែងយល់ ធ្វើការឆ្លុះបញ្ចាំង និងពិភាក្សា ទាំងក្នុង និងក្រោយការសម្ដែង ។ ក្រៅពីចូលរួមទស្សនាហើយ អ្នកចូលរួមអាចជជែកពិភាក្សាជាមួយសិល្បករ ថាតើហេតុអ្វីបង្កើតស្នាដៃនេះឡើង តើបង្កើតឡើងដោយរបៀបណា និងថាតើស្នាដៃទាំងនេះមានអត្ថន័យយ៉ាងណាដល់ពួកគេ ។
លោកអ៊ូ ប៊ុនថេង មកពីអង្គការអេពិកអាត ដែលនឹងសម្ដែងស្នាដៃ «ក្មេងឃ្វាលក្របី» និងដឹកនាំសិក្ខាសាលារាំច្នៃប្រឌិត បានថ្លែងថា«ខ្ញុំគិតថារដូវវប្បធម៌ «ការស្វែងរកអត្តសញ្ញាណ» នឹងជួយឲ្យយុវជនយុវតីស្គាល់អំពីតម្លៃ និងអត្តសញ្ញាណរបស់ខ្លួនកាន់តែច្បាស់ និងទទួលយក ព្រមទាំងឲ្យតម្លៃទៅលើអត្តសញ្ញាណរបស់ជនដទៃទៀតដោយមិនប្រកាន់នូវពណ៌សម្បុរ សាសនា ជំនឿ ពិការភាព យេនឌ័រ…។
អេពិកអាត មានកិត្តិយស និងរីករាយដែលមានចំណែកចូលរួមក្នុងសកម្មភាពនេះ និងបានបង្ហាញនូវការងារដែលយើងកំពុងធ្វើលើវិស័យពិការភាព ក៏ដូចជាបានបង្ហាញនូវសមត្ថភាព ជំនាញរបស់សិល្បករជាជនពិការរបស់យើង សម្តៅដល់ការបង្ហាញនូវអត្តសញ្ញាណនេះឯង»៕
ចែករំលែកព័តមាននេះ