ទីភ្នាក់ងារបរទេសកាលពីពេលថ្មីៗកន្លងមកផ្សាយថា បុរសជនជាតិអាមេរិកម្នាក់បានបាញ់ប្រពន្ធដែលរស់នៅរួមគ្នារយៈពេល៦០ឆ្នាំព្រោះយល់ថានាង «ត្រូវខ្មោចសណ្ឋិត» ។ ហេតុការណ៍បានកើតឡើងកាលពីយប់ថ្ងៃទី២៥ មិថុនា ម៉ោងនៅក្នុងស្រុក ។
បុរសបង្កហេតុគឺលោកចូសេហ្វ ស្លូហ្គាស អាយុ៧៩ឆ្នាំនៅរដ្ឋញូវ ជឺសុីភាគខាងកើតសហរដ្ឋអាមេរិក បានបាញ់ត្រង់ករបស់លោកស្រីឡូរ៉េតតា ស្លូហ្គាសបណ្ដាលឲ្យស្លាប់បាត់បង់ជីវិតនៅកន្លែងកើតហេតុ ។
របាយការណ៍បានបញ្ជាក់ថាប្ដីប្រពន្ធមួយគូនេះរៀបការប្រហែល៥៩ឆ្នាំមុន ខណៈពេលអយ្យការបានថ្លែងថា ក្នុងពេលកើតហេតុលោកចូសេហ្វស្ថិតនៅក្នុងអាការៈរោគចិត្តមួយ ក្រោយមកគេក៏ប្ដឹងប៉ូលិសពីហេតុការណ៍ដែលកើតឡើង ។
នៅពេលប៉ូលិសទៅដល់ចំនុចកើតហេតុក៏បានប្រទះឃើញសាកសពរបស់លោកស្រីឡូរ៉េតតានៅក្នុងបន្ទប់គេង ខណៈពេលលោកចូសេហ្វទទួលការចោទប្រកាន់ថាជាមនុស្សឃាត និងប្រើកាំភ្លើងខុសច្បាប់ ។
អយ្យការបានគូសបញ្ជាក់ថាអ្នកបង្កហេតុកំពុងទទួលការព្យាបាលនៅឯមន្ទីរពេទ្យ និងកំពុងរិះរកពីវិធីផ្លាស់ទៅរកមន្ទីរពេទ្យរោគចិត្តបន្ត ៕
ចែករំលែកព័តមាននេះ