រាជធានីភ្នំពេញ៖ រហូតមកដល់ពេលនេះកង្វល់នានារបស់វិស័យសិល្បៈភាពយន្តនៅកម្ពុជា ដែលបានដាក់ជូនដល់ស្ថាប័នពាក់ព័ន្ធនោះ នៅមិនទាន់មានដំណោះស្រាយណាមួយនៅឡើយទេ ។
លោកសែមស័ក្ត វិសាល អគ្គលេខាធិការសមាគមភាពយន្តកម្ពុជា បានអះអាងកាលពីពេល ថ្មីៗកន្លងមកថា រហូតមកដល់ពេលនេះនៅមិនទាន់មានដំណោះស្រាយណាមួយនៅឡើយទេពីស្ថាប័នពាក់ព័ន្ធជុំវិញកង្វល់ដែលបានលើកឡើងកាលពីសិក្ខាសិលាដែលបានរៀបចំឡើងកាលពីពេលកន្លងទៅ ។ អ្វីដែលយើងបានស្នើសុំទៅនោះ គឺមិន មែនជាការតវ៉ាឡើយ ប៉ុន្តែគឺជាសំណើមួយសម្រាប់ឲ្យភាគីពាក់ព័ន្ធជួយសម្របសម្រួលតាមលទ្ធភាព ប៉ុន្តែមិនដឹងហេតុអ្វីបានជាមិនមានចម្លើយណាមួយឆ្លើយតបមកវិញ ។
លោកថា «អ្វីដែលយើងបានធ្វើនាពេលនេះគឺឈរលើគោលបំណងសំខាន់តែមួយគត់គឺដើម្បីជួយជំរុញ និងលើកទឹកចិត្តដល់ផលិតករខ្មែរ និងអ្នកធ្វើការខាងវិស័យភាពយន្តនេះឲ្យមានតម្លាភាព និងចូលរួមផលិតភាពយន្តខ្មែរ ដើម្បីផ្សព្វផ្សាយលើឆាកអន្តរជាតិ។ សំណើដែលជាកង្វល់ពីផលិតករនានា សមាគមបានដាក់ទៅកាន់ភាគីដែលជាអាណាព្យាបាលយូរហើយ ដោយរាប់តាំងពីនាយកដ្ឋានភាពយន្ត រហូតដល់ក្រសួងវប្បធម៌ និងវិចិត្រសិល្បៈ។
អ្វីដែលរឹតតែមានតម្លៃជាងសំណើដែលបានដាក់ទៀតនោះ គឺក្នុងអង្គសិក្ខាសិលារបស់ក្រសួងវប្បធម៌ដែលបានធ្វើឡើងនាពេលកន្លងមកនោះ ផលិតករទាំងអស់ក៏បានលើកឡើងពីកង្វល់នេះដោយផ្ទាល់ផងដែរ ។ អ្វីដែលបានលើកឡើងនាពេលនោះត្រូវបានរដ្ឋលេខាធិការក្រសួងវប្បធម៌បានយល់ព្រមទទួលយក ប៉ុន្តែរហូតមកដល់នាពេលនេះយើងនៅមិនទាន់បានទទួលជាសញ្ញាជាវិជ្ជមានណាមួយនៅឡើយទេ ។ ឈរលើកក្តាចាំបាច់ក្នុងនាមសមាគមភាពយន្តកម្ពុជា និងជាផលិតករម្នាក់ផងដែរ ខ្ញុំមិនអាចរង់ចាំពីការឆ្លើយតបណាមួយពីស្ថាប័នពាក់ព័ន្ធទៀតឡើយ ព្រោះបើយើងនៅតែអូសបន្លាយពេលយូរទៀតនោះ ជំងឺនេះនឹងរីកធំឡើងពិបាកព្យាបាល ខណៈពេលដែលផលិតករខ្លះអាចនឹងបាក់ទឹកចិត្ត ក្នុងការផលិតកុនបន្តទៀត »។
បើតាមលោកសែមស័ក្ត វិសាល សមាគមអាចនឹងលើកសំណើនោះជូនទៅកាន់រាជរដ្ឋាភិបាលដោយផ្ទាល់តែម្តង ប្រសិនបើនៅមិនអាចទទួលបានចម្លើយជាវិជ្ជមានពីក្រសួងដែលជាអាណាព្យាបាលទេ ។
កាលពីពេល ថ្មីៗកន្លងមកភាគីពាក់ព័ន្ធនឹងវិស័យភាពយន្ត ដូចជាផលិតករ សិល្បករ តំណាងរោងភាពយន្ត និងអ្នកចែកចាយភាពយន្តខ្មែរ និងបរទេស បានជួបជុំគ្នាលើកពីកង្វល់ក្នុងវិស័យភាពយន្តដែលកំពុងជួបប្រទះនាពេលបច្ចុប្បន្ន ដាក់ជូនរាជរដ្ឋាភិបាលដោះស្រាយ ។ កង្វល់នោះរួមមាន ការធ្លាក់ចុះគុណភាពកុនខ្មែរ ការហូរចូលកុនបរទេស និងបញ្ហាទាក់ទងនឹងការសុំទីកន្លែងថតភាពយន្តជាដើម ។
លោកឆាយ បូរ៉ា ប្រធានសមាគមភាពយន្តកម្ពុជា បញ្ចាក់ថា ចំណុចសំខាន់ទាំងនេះដើម្បីឲ្យភាគីពាក់ព័ន្ធដោះស្រាយ ចៀសជាងការតតាំងដាក់គ្នាតាមរយៈប្រព័ន្ធផ្សព្វផ្សាយ ។ លោក ឆាយ បូរ៉ា ក៏បានបញ្ជាក់ប្រាប់ពីគម្រោងក្នុងការបង្កើតគណៈកម្មការវាយតម្លៃភាពយន្តខ្មែរដើម្បីលើកស្ទួយគុណភាព សំណើទៅកាន់រដ្ឋាភិបាលពិចារណាលើការលើកលែងពន្ធលើផលិតករភាពយន្ត និងការសើរើឡើងវិញចំពោះភាគលាភ និងតម្លាភាពក្នុងការអនុវត្តកិច្ចសន្យា ។
ទាក់ទងនឹងទីតាំងថត ផលិតករខ្មែរមួយចំនួនទៀតបានលើកឡើងពីបញ្ហាសុំទីតាំងថតនៅកន្លែងវប្បធម៌នានាដែលត្រូវការឲ្យផលិតករស្នើសុំលិខិតអនុញ្ញាតពីច្រើនស្ថាប័ន ហើយនៅតែគ្មានសិទ្ធិអនុញ្ញាតទៀត ។
លោកឆាយ បូរ៉ា បញ្ជាក់ថា «កង្វល់ទាំងឡាយរបស់វិស័យភាពយន្តត្រូវបានសមាគមភាពយន្តកម្ពុជាដាក់ជូនដល់ក្រសួងពាក់ព័ន្ធ ដូចជាក្រសួងវប្បធម៌ និងវិចិត្រសិល្បៈ ក្រសួងព័ត៌មាន ក្រសួងទេសចរណ៍ និងក្រសួងអបរំ យុវជន និងកីឡា ជាដើម ដើម្បីដោះ
ស្រាយ»៕
ចែករំលែកព័តមាននេះ