World Cup ២០១៨ ចូលដល់វគ្គពក់កណ្តាលផ្តាចព្រ័ត្រ ឬ ៤ ក្រុមចុងក្រោយខណៈម្ចាស់ជើងឯកហើយជិតរកឃើញហើយ ។ ៤ ក្រុមខ្លាំងៗទាំងនោះមានដូចជា៖ តោកំណាចអង់គ្លេស មាន់គកបារាំង បិសាចក្រហមបែលហ្ស៊ិក និងក្រឡាអុកក្រូអាស៊ី។ ក្រុមនីមួយៗសុទ្ធតែមានទំនុកចិត្តខ្ពស់ក្នុងការដណ្តើមពានមាសក្នុងព្រឹត្តិការណ៍ World Cup រុស្ស៊ីស្របពេលដែលគ្រូបង្វឹករបស់ពួកគេកំពុងរៀបចំរូបមន្តប្រយុទ្ធថ្មីៗដើម្បីទប់ទល់នឹងគូសត្រូវខ្លាំង ។
បើនិយាយពីគ្រូបង្វឹករបស់ក្រុមទាំង ៤ វិញក៏មានសមត្ថភាពមិនចាញ់កីឡាករលើទីលានរហូតជាប់រសហស្សនាមដែលគ្រប់គ្នាឮក៏ញាក់សាច់ដែរ ។
លោក Didier Deschamps (បារាំង)
គ្រូបង្វឹកចិត្តធ្ងន់ Deschamps បានដឹកនាំក្រុមជម្រើសជាតិបារាំងតាំងពីឆ្នាំ ២០១២ មក ។ ស្ថិតិដឹកនាំរបស់លោកបាន ៨១ ប្រកួតឈ្នះ ៥១ ស្មើ ១៥ និងចាញ់ ១៥ លើក ។ រីឯភាគរយឈ្នះមាន ៦២, ៩៦ ។ នៅវ័យ ៤៩ ឆ្នាំនិងធ្លាប់ដឹកនាំក្លិបល្បីៗដូចជា Monaco (២០០១-២០០៥) Juventus (២០០៦-២០០៧) និងក្លិប Marseille (២០០៩-២០១២) លោក Deschamps ត្រូវបានអតីតមិត្តរួមក្រុមបារាំងលោក Eric Cantona ដាក់រហស្សនាម “ចិត្តត្រជាក់” ។
លោក Roberto Martines (បែលហ្ស៊ិក)
Roberto Martines ជាជនជាតិអេស្ប៉ាញតែដឹកនាំក្រុមជម្រើសជាតិបែលហ្ស៊ិកក្រោយពីទទួលតំណែងពីឆ្នាំ ២០១៦ មក និងបានចាក់ស្រេះនៅទឹកអង់គ្លេសក្រាស់ក្រែនដូចជាការដឹកនាំ Swansea (២០០៧-២០០៩) Wigan Athletic (២០០៩-២០១៣) និងក្លិបស្ករតាំងម៉ែ Everton (២០១៣-២០១៦) ។ អតីតខ្សែបម្រើ-ការពារវ័យ ៤៤ ឆ្នាំរូបនេះត្រូវបានអ្នកគាំទ្រដាក់រហស្សនាម “តួក្បត់” បន្ទាប់ពីរូបលោកដើរចេញពី Swansea ទៅ Wigan ទាំងគ្មានរឿងរកំរកុសអ្វីសោះ ។ ហើយលោកត្រូវគេប្រដូចទៅនឹង El Judas សាវ័កមួយអង្គក្នុងចំណោម ១២ របស់ព្រះយេស៊ូគ្រិស្តដែលបានក្បត់ទ្រង់ដូច្នេះដែរ ។
លោក Gareth Southgate (អង់គ្លេស)
ក្រោយពីដឹកនាំក្រុមអង់គ្លេស U21 បានជោគជ័យមកលោក Southgate ក៏មានឱកាសដឹកនាំឈុតធំនៅឆ្នាំ ២០១៦ ស្នង តំណែងលោក Sam Allardyce ដែលប្រកាសចូលនិវត្តន៍ ។ គ្រូបង្វឹកភ្នែកមុតមាំវ័យ ៤៧ ឆ្នាំ Southgate ជាប់រហស្សនាម “Nord” ឬ “អធិរាជចម្បាំង” អំឡុងរូបលោកជាកីឡាករនៅក្លិប Crystal Palace ។
លោក Zlatko Dalic (ក្រូអាស៊ី)
ជាប់ឈ្មោះជា “ស្តេចអុក” របសក្រុមជម្រើសជាតិក្រូអាស៊ីលោក Dalic គឺជាគ្រូបង្វឹកពូកែររៀបក្បួនប្រយុទ្ធល្បីមួយរូបនៅអឺរ៉ុបពោលរូបលោកដឹងច្បាស់ថាការប្រកួតបែបណាត្រូវប្រើសមាសភាពកីឡាករប្រភេទណា ។ ដឹកនាំក្លិបបាល់ទាត់ចំនួន ៨ តាំងពីឆ្នាំ ២០០៥លោក Dalic វ័យ ៥១ ឆ្នាំកំពុងតែជោគជ័យខ្លាំងនៅសមរភូមិ World Cup រុស្ស៊ីបន្ទាប់ពីនាំនាវាក្រូអាស៊ីដល់វគ្គពាក់កណ្តាលផ្តាច់ព្រ័ត្រ ៕
ចែករំលែកព័តមាននេះ