ប្រទេសជប៉ុន ៖ ភាគខាងលិចជប៉ុនក្នុងរយៈពេលតែ៧២ម៉ោង ទឹកភ្លៀងឡើងដល់កម្ពស់ជាង១ម៉ែត្រ ហើយមូលដ្ឋានជាច្រើនត្រូវទឹកជន់លិច ដូចជានៅទីក្រុងហ៊ីរ៉ូស៊ីម៉ាជាដើមនាថ្ងៃទី៧ កក្កដា ២០១៨។ ចំណែកផ្លូវថ្នល់មួយបានបាក់នាថ្ងៃទី៧ កក្កដា ក្នុងតំបន់ក្រុងហ៊ីរ៉ូស៊ីម៉ា ក្រោយពីភ្លៀងធ្លាក់ដូចចាក់ទឹកដែលភាគខាងលិចជប៉ុនពុំធ្លាប់ជួបប្រទះ។
យោងតាមអាជ្ញាធរបានឱ្យដឹងថា ភ្លៀងបានធ្លាក់យ៉ាងខ្លាំងនាភាគខាងត្បូង និងភាគខាងលិចជប៉ុន បណ្ដាលឲ្យមនុស្សស្លាប់យ៉ាងតិច៤៤នាក់ និងបាត់ខ្លួន២១នាក់។ចំណែកទូរទស្សន៍រដ្ឋ NHK លើកពីតុល្យការអ្នកស្លាប់ដល់ទៅ៥១នាក់ និងបាត់ខ្លួន៤៤នាក់។
ភ្លៀងបានធ្លាក់យ៉ាងខ្លាំងក្លាចាប់តាំងពីច្រើនថ្ងៃមកហើយក្នុងតំបន់ជាច្រើន ក្នុងនោះមានតំបន់ក្រុងអេហ៊ីមេ ហ៊ីរ៉ូស៊ីម៉ា ក្យូតូ កូជី ហ្ស៊ីហ្វូ អូកាយ៉ាម៉ា ដែលនាំឲ្យមានទឹកជំនន់ធំបំផុត និងការបាក់ដី ដោយមនុស្សជាច្រើនជាប់ទៅណាមិនរួច ទោះបីមានបទបញ្ជាឲ្យជម្លៀសមនុស្សចេញដល់ជាង២លាននាក់ក៏ដោយ។
តំបន់ក្រុងអេហ៊ីមេ និងហ៊ីរ៉ូស៊ីម៉ាមានការបាត់បង់ជីវិតមនុស្សច្រើនជាងគេ ដល់ទៅយ៉ាងតិច៣៣នាក់។ អ្នកជួយសង្គ្រោះ ប៉ូលិស និងកងយោធាប្រមាណ៤៨០០០នាក់ត្រូវបានដាក់ពង្រាយ តែពួកគេជួបការលំបាកខ្លាំងមកពីកន្លែងមួយចំនួន ពិបាកចូលទៅ។
ពួកអ្នកជួយសង្គ្រោះសាកល្បងជួយប្រជាជនដែលនាំគ្នាឡើងទៅលើដំបូលផ្ទះដែលទឹកលិច។ រីឯបណ្ដារូបភាពតាមទូរទស្សន៍បង្ហាញមនុស្សទាំងនេះមួយចំនួននាំគ្នាគ្រវីសញ្ញាពណ៌សដើម្បីឲ្យឧទ្ធម្ភាគចក្រនិង នាវាទាំងឡាយមើលឃើញ។
នាយករដ្ឋមន្ត្រីជប៉ុនលោកស៊ីនហ្សូអាបេវាយតម្លៃសភាពការណ៍ថា ធ្ងន់ធ្ងរបំផុតហើយបញ្ជាឲ្យប្រើគ្រប់មធ្យោបាយដើម្បីសង្គ្រោះអាយុជីវិតមនុស្ស។ ហើយនាយករដ្ឋមន្ត្រីនាព្រឹកថ្ងៃទី៧ កក្កដា បានរួមប្រជុំមណ្ដារដ្ឋមន្ត្រីដែលទាក់ទិន។
ទីភ្នាក់ងារឧតុនិយមជាតិជប៉ុនបានចេញការប្រកាសអាសន្នកម្រិតខ្ពស់បំផុតសម្រាប់តំបន់ជាច្រើន ព្រមទាំងព្រមានពីការខូចខាតចម្បង។ ផ្ទះប្រជាពលរដ្ឋជាច្រើនរងការបំផ្លាញតទាំងស្រុង ឬមួយផ្នែក រួចផ្ទះច្រើនពាន់ខ្នងត្រូវទឹកលិច។ ហើយគេមានការលំបាកយ៉ាងខ្លាំងក្នុងការរាប់ពីកន្លែងបាក់ដី ផ្លូវថ្នល់ និងស្ពាននានាដែលរងការបំផ្លាញ៕
ចែករំលែកព័តមាននេះ