ខេត្តបន្ទាយមានជ័យ ៖ គ្រួសារមួយប្តីប្រពន្ធ និងប្អូនប្រុសស្នាក់នៅដេកហាលមូសគ្មានមុងភួយ និងកន្ទេលក្នុងបរិវេណវត្តបាលិលេយ្យ ព្រោះតែរង់ចាំធ្វើលិខិតឆ្លងដែន តាមរយៈក្រុមហ៊ុនមួយ សូម្បីតែប្រាក់ទិញបាយហូបក៏គ្មាន ។ គ្រួសារខាងលើមិនបានប្រាប់ពីអត្តសញ្ញាណទេ…
ខេត្តបន្ទាយមានជ័យ ៖ គ្រួសារមួយប្តីប្រពន្ធ និងប្អូនប្រុសស្នាក់នៅដេកហាលមូសគ្មានមុងភួយ និងកន្ទេលក្នុងបរិវេណវត្តបាលិលេយ្យ ព្រោះតែរង់ចាំធ្វើលិខិតឆ្លងដែន តាមរយៈក្រុមហ៊ុនមួយ សូម្បីតែប្រាក់ទិញបាយហូបក៏គ្មាន ។ គ្រួសារខាងលើមិនបានប្រាប់ពីអត្តសញ្ញាណទេ ប៉ុន្តែប្រាប់ថា ពួកគាត់ទើបត្រូវគេបញ្ជូនតាមរថយន្តទ្រុងរបស់ថៃពីខេត្តនគររាជសីមា ខណៈទៅធ្វើការជាកម្មករសំណង់ខុសច្បាប់នៅទីនោះ និងមានទីលំនៅភូមិជប់រំដេង ឃុំកន្ទួតស្រុកស្វាយលើ ខេត្តសៀមរាប ។
ដោយជួបជាមួយភ្នាក់ងារកោះសន្តិភាពកាលពីយប់ថ្ងៃទី០៧ កក្កដា ២០១៨ គ្រួសារមួយនេះនាំគ្នាអង្គុយ ហើយនិយាយថា កាលពីយប់ថ្ងៃទី៦ ពួកគាត់អង្គុយនៅកន្លែងកើតហេតុមួយយប់ទល់ភ្លឺដេកមិនបាន ព្រោះមូសច្រើនពេកគ្មានមុង និងភួយដណ្តប់ ។ ពិតជាគួរឲ្យសង្វេកណាស់ ពេលស្តាប់ឮ និងត្រចៀកហើយឃើញផ្ទាល់ភ្នែក ។ ពួកគាត់និយាយថា បានចូលទៅធ្វើការលើទឹកដីថៃធ្វើជាកម្មករសំណង់នៅខេត្តនគររាជសីមាហើយត្រូវសមត្ថកិច្ចប្រមូលដឹកតាមរថយន្តទ្រុងមកប្រគល់ឲ្យសមត្ថកិច្ចបន្តនៅខេត្តស្រះកែវ និងត្រូវគេបញ្ជូនបន្តតាមច្រកទ្វារអន្តរជាតិប៉ោយប៉ែត កាលពីថ្ងៃទី៣០ កក្កដា ២០១៨ ។ ពួកគាត់បន្តថា ខណៈមកដល់កម្ពុជាក្រុមហ៊ុនមួយនៅភ្នំពេញដែលមានទំនាក់ទំនងទៅប្រទេសថៃបានឲ្យរង់ចាំធ្វើលិខិតឆ្លងដែននៅក្រុងប៉ោយប៉ែត ។
ពួកគាត់បន្តថា ដោយសារខ្វះឯកសារ គឺមានតែសៀវភៅស្នាក់នៅ តែខ្វះអត្តសញ្ញាណប័ណ្ណនិងអត្រានុគោលដ្ឋានពួកគាត់ក៏ទៅលំនៅដ្ឋានយកឯកសារ លុះត្រឡប់មកដល់ក្រុងប៉ោយប៉ែតល្ងាចថ្ងៃសុក្រហួសម៉ោងគេធ្វើការ ម្យ៉ាងខ្សត់ខ្សោយថវិការក៏សម្រេចចិត្តចូលដេកក្នុងបរិវេណវត្ត ។ យ៉ាងណាក៏ដោយក្រោយពីមើលឃើញពីទុក្ខលំបាកនេះ តាមរយៈភ្នាក់កោះសន្តិភាពគ្រួសារមួយលក់នំបុ័ងសាច់ទល់មុខវត្តបាលិលេយ្យក៏បានយកមុងមួយ និងទឹកសុទ្ធ១យួរជូនគ្រួសារមួយនេះទាំងយប់ ដើម្បីបានដេកស្រួលផងដែរ ។
គ្រួសារមួយនេះរៀបរាប់ថា ខាងធ្វើលិខិតឆ្លងដែនប្រចាំនៅក្រុងប៉ោយប៉ែតគេប្រាប់ថា ទាល់តែថ្ងៃច័ន្ទទើបធ្វើបាន ព្រោះថ្ងៃអាទិត្យជាថ្ងៃសម្រាក ។ នៅព្រឹកថ្ងៃទី០៨ នេះពួកគាត់នៅអង្គុយលេងក្នុងបរិវេណវត្តបាលិលេយ្យ ប៉ុន្តែទាំងទឹកមុខក្រៀមក្រំពេលសួរនាំស្ត្រីជាមេគ្រួសារនិយាយថា មានប្រាក់ត្រឹមតែ១ម៉ឺនរៀល បើទិញបាយទឹកហូបខ្លាចពេលមានបញ្ហាគ្មានប្រាក់សម្រាប់ដោះស្រាយ ។ អ្នកឃើញហេតុការណ៍រិះគន់ថា មិនគួរក្រុមហ៊ុនដែលទាក់ទងនាំគ្រួសារខាងលើធ្វើលិខិតឆ្លងដែន បណ្តាយឲ្យគ្រួសារមួយនេះដេកអត់បាយ និងគ្មានមុងភួយ ទីកន្លែងស្នាក់នៅឲ្យបានត្រឹមត្រូវនោះទេ ៕
ចែករំលែកព័តមាននេះ