ខេត្តប៉ៃលិន ៖ កាលពីព្រឹកថ្ងៃទី០៧ ខែកក្កដា ឆ្នាំ២០១៨នេះនៅក្នុងបរិវេណមន្ទីរបក្សប្រជាជនកម្ពុជាខេត្តប៉ៃលិនមន្ត្រីរាជការមកពីគ្រប់មន្ទីរ និងប្រជាពលរដ្ឋរាប់ពាន់នាក់បានរៀបចំជួបជុំគ្នា ដើម្បីដង្ហែក្បួនធ្វើយុទ្ធនាការឃោសនាបោះឆ្នោតជ្រើសរើសបេក្ខភាពតំណាងរាស្ត្រ និងនាយករដ្ឋមន្ត្រីអាណត្តិថ្មី ។ ការដង្ហែក្បួននេះ ដឹកនាំដោយឯកឧត្តម អ៊ី ឈាន រដ្ឋលេខាធិការក្រសួងការពារជាតិដោយមានការអញ្ជើញចូលរួមពីឯកឧត្តម ផាន់ ចាន់ធុល អភិបាលខេត្តប៉ៃលិនផងដែរ ។
ប្រភពព័ត៌មានបានឱ្យដឹងថា គេសង្កេតឃើញមនុស្សក្មេងចាស់ប្រុសស្រីមកពីគ្រប់ភូមិឃុំស្រុកដោយមានម៉ូតូ និងរថយន្តរាប់សិបគ្រឿងមកពីគណបក្សប្រជាជនកម្ពុជាបានប្រមូលផ្តុំទៅជួបជុំគ្នានៅក្នុងបរិវេណមន្ទីរបក្ស មុននឹងធ្វើយុទ្ធនាការឃោសនាបោះឆ្នោតនៅថ្ងៃទី២៩ ខែកក្កដា ឆ្នាំ២០១៨ខាងមុខនេះ ។ ប្រភពបន្តទៀតថា ចាប់តាំងពីព្រឹកព្រលឹមរហូតជិតដល់ម៉ោងចេញដំណើរឃោសនានៅតាមដងផ្លូវក្បែរសាលាខេត្តប៉ៃលិន មានការកកស្ទះទៅដោយមនុស្សនាំគ្នាមកចូលរួមធ្វើយុទ្ធនាការឃោសនាបោះឆ្នោត ហើយមុននឹងចេញដំណើរឯកឧត្តម អ៊ី ឈាន ក៏ធ្វើការសំណេះសំណាលជាមួយមន្ត្រីរាជការ និងប្រជាពលរដ្ឋដែលចូលរួមផងដែរ ។
ចំណែកប្រជាពលរដ្ឋដែលនាំគ្នាចូលរួមដង្ហែក្បួនមានទឹកមុខញញឹមរីករាយស្រស់ស្រាយយ៉ាងខ្លាំងដោយអ្នកខ្លះយកទាំងកូនៗទៅជាមួយ ដើម្បីតស៊ូជួយជូនដំណើរ និងអបអរសាទរចំពោះការដង្ហែក្បួររបស់គណបក្សប្រជាជននេះដោយឡែកគណបក្សផ្សេងៗទៀត ដែលចុះឈ្មោះធ្វើការប្រកួតប្រជែងបោះឆ្នោតនៅក្នុងខេត្តប៉ៃលិនអត់ឃើញមានសកម្មភាពធ្វើយុទ្ធនាការបោះឆ្នោតនោះទេ ។
សូមបញ្ជាក់ផងដែរថា សម្រាប់ខេត្តប៉ៃលិនមានគណបក្សនយោបាយចំនួន១១ចូលរួមប្រកួតប្រជែងបោះឆ្នោតនាពេលខាងមុខនេះទី១- គណបក្សប្រជាជនកម្ពុជា ទី២- គណបក្សខ្មែរឈប់ក្រ ទី៣- គណបក្សសម្ព័ន្ធ ដើម្បីប្រជាធិបតេយ្យ ទី៤ – គណបក្សឆន្ទៈខ្មែរ ទី៥- គណបក្សបង្រួបបង្រួមជាតិ ទី៦- គណបក្សប្រជាធិបតេយ្យមូលដ្ឋាន ទី៧- គណបក្សហ្វុនស៊ិនប៉ិច ទី៨- គណបក្សសាធារណៈរដ្ឋប្រជាធិបតេយ្យ ទី៩- ប្រជាធិបតេយ្យមូលដ្ឋាន ទី១០- គណបក្សជនជាតិដើមប្រជាធិបត្យេកម្ពុជា និងទី១១- គណបក្សសញ្ជាតិកម្ពុជា ៕
ចែករំលែកព័តមាននេះ