រាជធានីភ្នំពេញ ៖ ក្នុងរយៈពេលជាង២ទសវត្សរ៍កន្លងមកនេះ ប្រទេសកម្ពុជាបានខិតខំទាក់ទាញបណ្ដាវិនិយោគិនទាំងក្នុង និងក្រៅស្រុក ដើម្បីវិនិយោគលើសំណង់អគារទាបខ្ពស់ទាំងអស់ ។ ជាក់ស្តែង ក្នុងរយៈពេលប្រមាណ៥ឆ្នាំចុងក្រោយនេះ អគារខ្ពស់ៗនៅកម្ពុជា…
រាជធានីភ្នំពេញ ៖ ក្នុងរយៈពេលជាង២ទសវត្សរ៍កន្លងមកនេះ ប្រទេសកម្ពុជាបានខិតខំទាក់ទាញបណ្ដាវិនិយោគិនទាំងក្នុង និងក្រៅស្រុក ដើម្បីវិនិយោគលើសំណង់អគារទាបខ្ពស់ទាំងអស់ ។ ជាក់ស្តែង ក្នុងរយៈពេលប្រមាណ៥ឆ្នាំចុងក្រោយនេះ អគារខ្ពស់ៗនៅកម្ពុជា ជាពិសេស នៅរាជធានីភ្នំពេញ បានកើនឡើងជាបន្តបន្ទាប់ ហើយរាជរដ្ឋាភិបាលក៏បានជំរុញឲ្យមានការសាងសង់បន្ថែមទៀត ដើម្បីឲ្យស្របនឹងកំណើនសេដ្ឋកិច្ចជាតិក្នុងរង្វង់៧%ក្នុង១ឆ្នាំ។ តើការសាងសង់អគារខ្ពស់ផ្ដល់ផលប្រយោជន៍អ្វីខ្លះដល់សេដ្ឋកិច្ច និងប្រទេសជាតិទាំងមូល ?
លោក ប៉ែន សុផល រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ បានថ្លែងប្រាប់អ្នកសារព័ត៌មានក្នុងវេទិកាអគារខ្ពស់ នៅសណ្ឋាគារសូហ្វីតែល ភ្នំពេញ ភូគីត្រា ថា ការអភិវឌ្ឍអគារខ្ពស់ គឺជាគោលនយោបាយរបស់រាជរដ្ឋាភិបាល ។ វាផ្តល់ប្រយោជន៍ជាច្រើនសម្រាប់ការអភិវឌ្ឍសេដ្ឋកិច្ចកម្ពុជា ក្នុងនោះមានដូចជា ៖ ១-ទទួលបានផលប្រយោជន៍ក្នុងការប្រើប្រាស់ដីខ្ពស់ ២-ទទួលបានគុណប្រយោជន៍ជាច្រើនសម្រាប់សេដ្ឋកិច្ច ៣-អាចជួយដោះស្រាយបញ្ហាសង្គមជាច្រើនដូចជា ដោះស្រាយវិបត្តិលំនៅឋាន ដោយសារតែការខ្វះខាតដី និងទីតាំងសម្រាប់ស្នាក់នៅក្នុងទីក្រុង ព្រមទាំងអាចផ្ដល់ប្រយោជន៍ដល់បណ្ដាការិយាល័យក្រុមហ៊ុននានាប្រមូលផ្ដុំនៅតែមួយកន្លែងផងដែរ ។
លោកបន្តថា ការសាងសង់អគារខ្ពស់ ក៏អាចជួយការពារបរិស្ថានប្រទេសជាតិបានមួយកម្រិតផងដែរ ។ ជាក់ស្ដែង ការសាងសង់អគារខ្ពស់មិនត្រូវបានចំណាយដីធំៗសម្រាប់សាងសង់នោះទេ ពោលគឺប្រើប្រាស់អស់ដីតិចសម្រាប់សាងសង់ ហើយដីធ្លីដែលនៅសេសសល់អាចយកទៅធ្វើអ្វីផ្សេងទៀត ។ បើសិនជាយើងមិនសាងសង់អគារខ្ពស់ៗ ហើយយើងសាងសង់តែអគារទាប គឺយើងត្រូវការសាងសង់ច្រើនកន្លែង ដែលត្រូវចំណាយដីកាន់តែច្រើន និងធ្វើឲ្យដីកាន់តែចង្អៀត។ ចំណែកផលប្រយោជន៍ដ៏សំខាន់មួយទៀតដែលទទួលបាននោះ គឺរាជរដ្ឋាភិបាលនឹងមានភាពងាយស្រួលក្នុងការគ្រប់គ្រងរចនាសម្ព័ន្ធនានា ។
លោកបន្ថែមថា ៖« នៅរាជធានីភ្នំពេញ ការសាងសង់អគារខ្ពស់ ក៏មានតំបន់អនុញ្ញាតឲ្យសាងសង់ និងតំបន់ហាមឃាត់ការសាងសង់អគារខ្ពស់ៗដែរ ។ ជាក់ស្ដែង នៅតំបន់នៅជុំវិញវត្តភ្នំ, ជុំវិញព្រះបរមរាជវាំង និងជុំវិញវិមានឯករាជ្យ ជាដើម » ។
លោក ឡៅ ទិព្វសីហា អគ្គនាយករងនៃអគ្គនាយកដ្ឋានសំណង់ នៃក្រសួងរៀបចំដែនដី នគរូបនីយកម្ម និងសំណង់ បានឲ្យដឹងថា រហូតមកដល់បច្ចុប្បន្ននេះ កម្ពុជាមានអគារខ្ពស់ៗ គិតចាប់ពី៥ជាន់ឡើងទៅចំនួន១.០៤៩អគារ ហើយសម្រាប់រយៈពេល៥ខែដើមឆ្នាំ២០១៨នេះ មានការស្នើសុំសាងសង់អគារខ្ពស់ៗចំនួន៥៣អគារផងដែរ ។ លោកថា ៖« សម្រាប់តំបន់ដែលកំពុងមានសក្ដានុពល ឬហៅថាពោលសំខាន់ក្នុងការសង់អគារខ្ពស់នាពេលបច្ចុប្បន្ននេះ គឺនៅរាជធានីភ្នំពេញ និងខេត្តព្រះសីហនុ » ។
លោកបន្តថា ៖« ខេត្តព្រះសីហនុ គឺជាខេត្តដែលមានសក្ដានុពលខ្លាំងមួយក្នុងការសាងសង់អគារខ្ពស់ ហើយបច្ចុប្បន្ននេះ វិនិយោគិនជាច្រើនបានងាកទៅរកការសាងសង់អគារខ្ពស់សម្រាប់បំពេញតម្រូវការប្រើប្រាស់នៅពេលបច្ចុប្បន្ន និងអនាគត »។
លោកបញ្ជាក់ថា ក្រៅពីអគារខ្ពស់ៗ កម្ពុជាក៏មានសំណង់បុរីលំនៅឋានជាច្រើនផងដែរនៅក្នុងវិស័យសំណង់ ។ ជាក់ស្ដែង សព្វថ្ងៃនេះ បុរីលំនៅឋានមានចំនួន២១៣ទីតាំង ហើយក្នុងរយៈពេល៥ខែដើមឆ្នាំ២០១៨នេះ ក៏មានការស្នើសុំសាងសង់បុរីចំនួន២៦ទីតាំងដែរនៅទូទាំងប្រទេសកម្ពុជា ៕
ចែករំលែកព័តមាននេះ