ខេត្តកំពង់ឆ្នាំង ៖ រហូតមកដល់ថ្ងៃនេះ មានរយៈពេលជិត២ខែហើយនៃការបាញ់សម្លាប់បុរសម្នាក់ ជាថៅកែទឹកបរិសុទ្ធ នៅភូមិត្រពាំងជ្រៃ ឃុំខ្លុងពពក ស្រុកទឹកផុស ដែលសមត្ថកិច្ចនៅមិនទាន់វែកមុខចាប់ឃាតករបាននៅឡើយទេ ។ បញ្ហានេះ ធ្វើឲ្យប្រពន្ធកូន និងក្រុមគ្រួសារជនរងគ្រោះ មានការបារម្ភពីសុវត្ថិភាពក្រៃលែង ព្រោះខ្លាចឃាតករនោះ វិលត្រឡប់មកលបបាញ់ប្រហារជាថ្មីទៀត លើគ្រួសាររបស់ខ្លួន។
ជួបជាមួយអ្នកយកព័ត៌មាន កាលពីរសៀលថ្ងៃទី៤ ខែកក្កដា ឆ្នាំ២០១៨ លោក ម៉ុយ ប៊ុនធៀន អាយុ៣០ និងប្អូនស្រីរៀបរាប់ថា ក្រោយពីការបាញ់ប្រហារសម្លាប់ឪពុករបស់ខ្លួនរួចមក គ្រួសារគាត់រស់នៅដោយការភ័យខ្លាចជាខ្លាំង រហូតមិនហ៊ានដេកផ្ទះទេ គឺមកមើលផ្ទះតែពេលថ្ងៃប៉ុណ្ណោះ លុះពេលយប់ទៅដេកនៅកន្លែងផ្សេងហើយ មិនហ៊ានចូលមកសម្រាកនៅក្នុងផ្ទះនោះឡើយ ទាំងម្ដាយ និងបងប្អូន ២ទៅ៣នាក់ទៀត ។ ជាមួយគ្នានេះដែរ មុខរបរអាជីវកម្មផលិតទឹកបរិសុទ្ធរបស់ពួកគាត់ ក៏ត្រូវផ្អាកដំណើរការដែរ ដោយសារតែមិនហ៊ានដឹកទឹកបរិសុទ្ធទៅលក់នៅកន្លែងផ្សេង ។
លោក ម៉ុយ បុ៊នធៀន រៀបរាប់ទៀតថា សព្វថ្ងៃនេះ គ្រួសារគាត់រស់នៅដោយការភ័យខ្លាចតក់ស្លុតចំពោះព្រឹត្តិការកើតឡើង កាលពីយប់កន្លងទៅនោះ គឺហាក់នៅតាមលងពួកគាត់ជារៀងរហូត ដែលបើគិតមកដល់ពេលនេះ មានរយៈពេលជិត២ខែហើយ ។ ដរាបណាចាប់ឃាតករមិនទានបានទេ គ្រួសារគាត់រស់នៅដោយការភ័យខ្លាចមិនមានក្តីស្ងប់ឡើយ ។ ដោយហេតុនេះហើយ ពួកគាត់សូមអំពាវនាវយ៉ាងទទូចដល់សមត្ថកិច្ចនគរបាលស្រុក នគរបាលខេត្ត ក៏ដូចជាលោកអភិបាលខេត្ត សូមមេត្តាជួយជំរុញនិងពន្លឿនការស្វែងរកចាប់ខ្លួនឃាតករដែលបាញ់សម្លាប់ឪពុកគាត់ យកមកផ្តន្ទាទោសតាមច្បាប់ផង។
សូមរំឭកថា កាលពីយប់ថ្ងៃទី១៦ ខែឧសភា ឆ្នាំ២០១៨ នៅភូមិត្រពាំងជ្រៃ ឃុំខ្លុងពពក ស្រុកទឹកផុស មានករណីជនមិនស្គាល់អត្តសញ្ញាណបិទមុខជិត ស្លៀកពាក់ខោអាវប៉ារ៉ា ប្រើកាំភ្លើងអាកា៤៧ ចូលបាញ់ប្រហារ៣គ្រាប់ទៅលើបុរសឈ្មោះ ប៊ិន ហឿន អាយុ៦១ឆ្នាំ ជាថៅកែសិប្បកម្មផលិតទឹកបរិសុទ្ធ បណ្តាលឱ្យស្លាប់ចូលក្រោមរថយន្តដឹកទឹកបរិសុទ្ធរបស់ខ្លួននៅចំពីមុខផ្ទះតែម្តង ។ ក្រោយកើតហេតុ សមត្ថកិច្ចបានធ្វើការស្រាវជ្រាវរកឃើញម៉ូតូ១គ្រឿង និងគ្រាប់កាំភ្លើងអាកា៤គ្រាប់នៅក្នុងការុង ដែលនៅមិនឆ្ងាយពីម៉ូតូប្លុងចោលកណ្តាលវាលស្រែ ចម្ងាយពីកន្លែងកើតហេតុជាង១គីឡូម៉ែត្រ ដែលសមត្ថកិច្ចកំណត់ថា ជាម៉ូតូរបស់
ជនដៃដល់ ។
ទោះជាយ៉ាងនេះក្តី បើតាមការបង្ហើបពីសមត្ថកិច្ចមូលដ្ឋានថា ពេលនេះសមត្ថកិច្ចកំពុងស្រាវជ្រាវយ៉ាងយកចិត្តទុកដាក់ និងសុំលាក់សិន ព្រោះកំពុងតែមមាញឹកបំបែកសំណុំរឿងមួយនេះ ៕
ចែករំលែកព័តមាននេះ