រាជធានីភ្នំពេញ ៖ បន្ទាប់ពីការប្រកួតកាន់តែឈានដល់វគ្គសំខាន់នៅក្នុងព្រឹត្តិការណ៍ World Cup អ្នកគាំទ្រព្រឹត្តិការណ៍មួយនេះ ខ្លះក៏មានអារម្មណ៍ខកចិត្តព្រោះតែក្រុមដែលខ្លួនគាំទ្រត្រូវធ្លាក់ហាលអាវ និងខ្លះទៀតក៏មានមោទនភាពព្រោះតែក្រុមដែលខ្លួនស្រឡាញ់ បានឡើងទៅលេងនៅវគ្គបន្ត ។…
រាជធានីភ្នំពេញ ៖ បន្ទាប់ពីការប្រកួតកាន់តែឈានដល់វគ្គសំខាន់នៅក្នុងព្រឹត្តិការណ៍ World Cup អ្នកគាំទ្រព្រឹត្តិការណ៍មួយនេះ ខ្លះក៏មានអារម្មណ៍ខកចិត្តព្រោះតែក្រុមដែលខ្លួនគាំទ្រត្រូវធ្លាក់ហាលអាវ និងខ្លះទៀតក៏មានមោទនភាពព្រោះតែក្រុមដែលខ្លួនស្រឡាញ់ បានឡើងទៅលេងនៅវគ្គបន្ត ។
យ៉ាងណាមិញ នៅក្នុងកាលៈទេសៈដែលការប្រកួតទាំងមូលឈានដល់វគ្គកាន់តែតានតឹងខ្លាំង ខ្សែបម្រើលេងនៅក្លិបណាហ្គាវើលបច្ចុប្បន្នកីឡាករ គួច សុកុុម្ភៈ ក៏បានបង្ហាញជំនឿចិត្តយ៉ាងមុតមាំផងដែរថា ក្រុមមាន់គកបារាំង និងតោកំណាចអង់គ្លេស នឹងក្លាយជាក្រុមក្ដោបក្ដាប់តំណែងលេចធ្លោនៅវគ្គចុងក្រោយ បើទោះជាក្រុមដែលលោកមានជំនឿថាបានកាន់ពាន គឺអេស្ប៉ាញ បានធ្លាក់ទៅហើយក្ដី។
អតីតប្រធានក្រុមជម្រើសជាតិកម្ពុជារូបនេះបានអះអាងថា មកទល់ពេលនេះ ការប្រកួតស្ថិតក្នុងលទ្ធផលពិបាកប៉ាន់ស្មាននៅឡើយទេ ដរាបណា៤ក្រុមចុងក្រោយនៅមិនទាន់ជ្រើសបានដោយសារតែក្រុមដែលបានឈានឡើងក្នុងវគ្គ៨ក្រុម ក៏សុទ្ធតែខ្លាំងដូចគ្នាមិនអាចមើលស្រាល បាន ។ លោកថា ក្រុមដែលលោកស្រឡាញ់ និងជឿជាក់គឺអេស្ប៉ាញបានធ្លាក់បាត់ហើយ ទើបលោកយល់ថា ការទស្សន៍ទាយពីរឿងក្រុមប្រទេសណាមួយបរាជ័យ និងឡើងកាន់ពានគឺជារឿងមួយលែងមានទំនុកចិត្ត ។ យ៉ាងណាក៏ដោយ លោកមើលឃើញថា ក្រុមប្រទេសចំនួន២នឹងក្លាយជាក្រុមលេចធ្លោនៅវគ្គចុងក្រោយនោះគឺ ក្រុមបារាំង និងអង់គ្លេស ។
លោកថាសម្រាប់ការកាន់ពានលោកមិនទាន់ហ៊ានថាក្រុមណាទទួលជោគជ័យទេ ដោយសារតែក្រុមដែលបានឈានឡើងសុទ្ធតែមានសមត្ថភាព ហើយបើនិយាយពីកីឡាករក៏មានថ្វីជើងល្អៗដែលមិនងាយថាក្រុមណាលោតជាងក្រុមណា ។ លោកហ៊ានទស្សន៍ទាយត្រឹមតែក្រុមដែលបានកាន់ពានស្បែកជើងមាស និងពានស្រោមដៃមាសប៉ុណ្ណោះ បន្ទាប់ពីលោកតាមដានកីឡាករគ្រប់ក្រុម ហើយឃើញថា ក្រុមទាំងពីរមានចំណុចខ្លាំងរៀងខ្លួនដែលលោកយល់ថា ទោះក្រុមទាំង២មិនអាចកាន់ពាន ក៏ទំនងជាបានពានទាំង២នោះដែរ។
ម្ចាស់ស្បែកជើងមាស៣សម័យកាលលោក គួច សុកុម្ភៈ បន្តថា ក្រុមបារាំង ទំនងនឹងក្លាយជាក្រុមដែលក្ដោបក្ដាប់ពានស្រោមដៃមាសនៅវគ្គចុងក្រោយ ដោយសារតែអ្នកចាំទីរបស់ក្រុមនេះ មានសមត្ថភាពចាប់បាល់គួរឱ្យសរសើរ ។ លោកយល់ថា បើក្រុមបារាំងនៅតែរក្សាសមត្ថភាពចាប់បាល់បានខ្លាំងដូចប៉ុន្មានប្រកួតកន្លងមក គឺក្រុមនេះនឹងមិនមានក្រុមណាស៊ុតចូលងាយៗ ហើយស្របគ្នាដែលប្រព័ន្ធលេងរបស់បារាំងរឹងមាំផង គឺបារាំងពិតជាលើកពាននៅវគ្គចុងក្រោយ ។ លោកថា បើទោះជាមិនបានកាន់ពានជើងឯក ក៏តំណែងស្រោមដៃមាស អាចនឹងធ្លាក់លើបារាំងក្នុងភាគរយច្រើនដែរ ។
សម្រាប់ម្ចាស់ពានស្បែកជើងមាសកីឡាករ គួច សុកុម្ភៈ បានប៉ាន់ស្មានថា នឹងបានទៅលើ
ក្រុមអង់គ្លេសក្នុងភាគរយច្រើនបន្ទាប់ពីមានកីឡាករម្នាក់ក្នុងក្រុមតោកំណាចមួយនេះរកបានគ្រាប់បាល់ច្រើនជាងគេ ។ បើទោះជាមិនបានលើកពាន ឱ្យតែអង់គ្លេសឡើងដល់វគ្គ១ភាគ៤ ហើយក្រុមផ្សេងមិនអាចស៊ុតចូលក្រុមផ្សេងបានច្រើនគ្រាប់ គឺក្រុមអង់គ្លេសពិតជាលើកពានមួយនេះមិនខាន ។
លោកថា រវាងក្រុមបារាំង និងអង់គ្លេស អាចនឹងមានក្រុមមួយក្លាយជាម្ចាស់ពានជើងឯក តែបើមិនអាចកាន់ពានធំតាមការគ្រោងទុក ក៏ក្រុមទាំង២នឹងអាចកាន់ពានស្រោមដៃមាស និងពានស្បែកជើងមាស នៅវគ្គចុងក្រោយ បើទោះជាត្រូវធ្លាក់ចេញនៅវគ្គ១ភាគ៤នេះក្ដី ។ លោកថា អ្នកចាំទីបារាំងបានជួយសង្គ្រោះបាល់ច្រើនគ្រាប់ណាស់ ដូច្នេះក្រុមមាន់គកនេះពិតជាមានស្នាដៃមួយនៅវគ្គចុងក្រោយដែលលោកយល់ថា យ៉ាងហោចណាស់ ក៏ដណ្ដើមបានពានស្រោមដៃមាសនោះដែរ ៕
ចែករំលែកព័តមាននេះ