ត្រូវគេបើកបំបុកហើយវាយឡើងទ្រោមខ្លួនព្រោះតែទង្វើលើនារីម្នាក់
- ភ្នំពេញ
រាជធានីភ្នំពេញ ៖ ជនសង្ស័យម្នាក់ក្នុងចំណោមពីរនាក់ត្រូវបានប្រជាពលរដ្ឋចាប់វាយទ្រោមខ្លួនរួចប្រគល់ឲ្យទៅឲ្យសមត្ថកិច្ច បន្ទាប់ពីជនសង្ស័យនិងបក្ខពួកបានធ្វើសកម្មភាពឆក់កាបូបពីស្ត្រីម្នាក់បានសម្រេច ហើយត្រូវបានអ្នកធ្វើដំណើរតាមផ្លូវឃើញហេតុការណ៍ក៏ជិះបំបុកបណ្តាលឲ្យដួល។ ហេតុការណ៍នេះបង្កឲ្យមានការណ៍ភ្ញាក់ផ្អើលកាលពីវេលាម៉ោង៨និង៤០នាទីយប់ថ្ងៃទី៥ ខែមិថុនា ឆ្នាំ២០១៨ ត្រង់ចំណុចខាង លិចស្តុបរង្វង់មូលកាំកូលស៊ីធី…
ជនសង្ស័យដែលសមត្ថកិច្ចឃាត់ខ្លួនឈ្មោះ សុខ សាន់ អាយុ១៦ឆ្នាំ ភេទប្រុស មុខរបរមិនពិតប្រាកដ ស្នាក់នៅម្តុំវត្តជុំ ស្ថិតក្នុងសង្កាត់គោករកា ខណ្ឌព្រែកព្នៅ។
បើតាមប្រភពពីកន្លែងកើតហេតុបានឲ្យដឹងថា មុនពេលកើតហេតុ គេឃើញស្ត្រីម្នាក់ និងបុរសម្នាក់ជិះម៉ូតូមួយគ្រឿងធ្វើដំណើរតាមបណ្តោយផ្លូវឧកញ៉ាម៉ុងរឹទ្ធី ក្នុងទិសដៅពីលិចទៅកើត លុះមកដល់ចំណុចកើតហេតុ ស្រាប់តែលេចមុខជនសង្ស័យ២នាក់ជិះម៉ូតូមួយគ្រឿងម៉ាក ស៊ុយហ្សុ៊យគីនិក ពណ៌ស ពាក់ស្លាកលេខ ភ្នំពេញ ១CR-៨៥២៣ ជិះមកពីក្រោយក៏ធ្វើសកម្មភាពឆក់កាបូបស្ពាយពីស្ត្រីរងគ្រោះដែលស្ពាយនៅនឹងស្មាបានសម្រេច ហើយបានព្យាយាមជិះរត់គេចខ្លួន។
ភ្លាមៗនេះក៏មានប្រជាពលរដ្ឋម្នាក់ជិះម៉ូតូមួយគ្រឿងមិនចាំម៉ាក ជាប្រភេទម៉ូតូធំ បានឃើញហេតុការណ៍ ហើយបានជិះទៅបំបុកម៉ូតូរបស់ជនសង្ស័យបណ្តាលឲ្យដួលហើយក៏ត្រូវបានប្រជាពលរដ្ឋដែលនៅក្បែរនោះធ្វើការចាប់ឃាត់ខ្លួនជនសង្ស័យបានម្នាក់ជាអ្នកបើកបរម៉ូតូ ចំណែកឯជនសង្ស័យម្នាក់ទៀតជាអ្នកជិះពីក្រោយបានងើបរត់គេចខ្លួនបាត់សម្រោល។ ដោយឡែកជនរងគ្រោះបានយកកាបូបរបស់ខ្លួនពីជនសង្ស័យ ហើយក៏ឡើងជិះម៉ូតូបន្តដំណើរទៅមុខទៀតបាត់។
បច្ចុប្បន្នជនសង្ស័យខាងលើរួមទាំងវត្ថុតាងត្រូវបានសមត្ថកិច្ចមូលដ្ឋាននាំយកទៅសាកសួរនៅអធិការដ្ឋាននគរបាលខណ្ឌសែនសុខដើម្បីកសាងសំណុំរឿងបញ្ជូនទៅតុលាការរងចាំចាត់ការទៅតាមនីតិវិធី ៕
ចែករំលែកព័តមាននេះ