រាជធានីភ្នំពេញ ៖ បើមិនមានអ្វីប្រែប្រួលទេ នៅថ្ងៃទី៦ កក្កដា ខាងមុខនេះ កិច្ចព្រមព្រៀងដឹកជញ្ជូនតាមផ្លូវដែកឆ្លងកាត់ព្រំដែនរវាងព្រះរាជាណាចក្រទាំងពីរកម្ពុជា-ថៃ នឹងត្រូវចរចាបញ្ចប់ ។ ក្រោយកិច្ចព្រមព្រៀងនេះត្រូវបានចុះហត្ថលេខារួច…
រាជធានីភ្នំពេញ ៖ បើមិនមានអ្វីប្រែប្រួលទេ នៅថ្ងៃទី៦ កក្កដា ខាងមុខនេះ កិច្ចព្រមព្រៀងដឹកជញ្ជូនតាមផ្លូវដែកឆ្លងកាត់ព្រំដែនរវាងព្រះរាជាណាចក្រទាំងពីរកម្ពុជា-ថៃ នឹងត្រូវចរចាបញ្ចប់ ។ ក្រោយកិច្ចព្រមព្រៀងនេះត្រូវបានចុះហត្ថលេខារួច នឹងអនុញ្ញាតឲ្យបងប្អូនពលរដ្ឋខ្មែរអាចធ្វើដំណើរ ដឹកជញ្ជូនទំនិញឆ្លងកាត់ប្រទេសទាំងពីរ និងឆ្ពោះទៅប្រទេសទី៣បានហើយ ។
ថ្លែងក្នុងពិធីសម្ពោធដាក់ឲ្យដំណើរការសាកល្បងផ្លូវដែកពីភ្នំពេញទៅពោធិ៍សាត់ នាព្រឹកថ្ងៃទី៤ កក្កដា លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានឲ្យដឹងថា ផ្លូវដែកទិសពាយ័ព្យនៃប្រទេសកម្ពុជានេះ គឺជាផ្លូវសេដ្ឋកិច្ចមួយដ៏មានសក្ដានុពលក្នុងការដឹកជញ្ជូនផលិតផលនានារបស់ប្រជាពលរដ្ឋ ទៅកាន់ទីផ្សារក្នុងតំបន់ និងពិសេស គឺការធ្វើពាណិជ្ជកម្មជាមួយប្រទេសថៃ ដែលប្រជាពលរដ្ឋអាចដឹកទំនិញពីកម្ពុជាទៅថៃ និងដឹកទំនិញពីប្រទេសថៃមកកម្ពុជាវិញ ប្រកបដោយភាពងាយស្រួល សុវត្ថិភាពខ្ពស់ និងចំណាយតិច ព្រោះថាផ្លូវដែកនេះនឹងត្រូវតភ្ជាប់ជាមួយផ្លូវដែកនៃព្រះរាជាណាចក្រថៃ នាពេលខាងមុខដ៏ខ្លីនេះ ។
លោកថ្លែងយ៉ាងដូច្នេះថា ៖« នៅថ្ងៃសុក្រខាងមុខនេះ រដ្ឋមន្ត្រីក្រសួងដឹកជញ្ជូនថៃ នឹងអញ្ជើញមកជួបខ្ញុំ ដើម្បីចរចាបញ្ចប់កិច្ចព្រមព្រៀងដឹកជញ្ជូនតាមផ្លូវដែកឆ្លងកាត់ប្រទេសកម្ពុជា និងថៃ ។ នៅពេលកិច្ចព្រមព្រៀងនេះបានចុះហត្ថលេខារួច សម្ដេចតេជោ ហ៊ុន សែន និងលោកនាយករដ្ឋមន្ត្រីថៃ នឹងជិះរថភ្លើងរួមគ្នាឆ្លងកាត់ព្រំដែនកម្ពុជា-ថៃ ។ ដូច្នេះ ប្រជាពលរដ្ឋរបស់យើងអាចធ្វើដំណើរ អាចដឹកទំនិញពីកម្ពុជាទៅទីក្រុងបាងកក និងឆ្ពោះទៅប្រទេសសិង្ហបុរី តាមរទេះភ្លើងបានហើយ » ។
ក្រៅពីការងារតភ្ជាប់ផ្លូវដែកភាគពាយ័ព្យនេះ រាជរដ្ឋាភិបាលកម្ពុជាមានគម្រោងជាច្រើនទៀតក្នុងការធ្វើទំនើបកម្មលើផ្លូវដែកនេះ ដូចជា ការសាងសង់ខ្សែរថភ្លើងថ្មី, ការជួសជុលស្ថានីយ ព្រមទាំងបំពាក់ស្លាកសញ្ញាសុវត្ថិភាពផ្លូវដែកពីភ្នំពេញ-ប៉ោយប៉ែត, ការសាងសង់ទីលានកុងតឺន័រផ្លូវដែកនៅស្ទឹងបត់, ការសិក្សាដើម្បីរៀបចំឱ្យមានរថភ្លើងលើអាកាសដំណើរការដោយស្វ័យប្រវត្តិនៅក្នុងក្រុងភ្នំពេញ, ការតភ្ជាប់ផ្លូវដែកពីភ្នំពេញទៅកំពង់ផែស្វយ័តភ្នំពេញថ្មី, ការតភ្ជាប់ផ្លូវដែកទៅតំបន់សេដ្ឋកិច្ចពិសេសដូចជា ពីស្ថានីយទូកមាសទៅរោងចក្រស៊ីម៉ង់ត៍ចក្រីទីង, ពីស្ថានីយវាលរេញទៅកំពង់ផែកែវផុស, ការជំរុញឱ្យមានការវិនិយោគផ្លូវដែកភាគខាងជើងភ្នំពេញ-ស្នួល-ស្ទឹងត្រែង ប្រវែង២៤៨គីឡូម៉ែត្រ, ការជំរុញឱ្យមានការវិនិយោគផ្លូវដែកពីភ្នំពេញ-សៀមរាប សិរីសោភ័ណ និងការជំរុញឱ្យមានការវិនិយោគផ្លូវដែកតភ្ជាប់ទៅប្រទេសវៀតណាម ជាដើម ។
បើតាមអនុរដ្ឋលេខាធិការក្រសួងសា ធារណការ និងដឹកជញ្ជូន លោក លី បូរិន បានប្រាប់កោះសន្តិភាព កាលពីចុងខែមិថុនាថា ការពិត បញ្ហាដែលនៅសេសសល់នោះតិចតួចទេ គឺពាក្យពេចន៍ និងមានចំណុចខ្លះ វាប៉ះពាល់ដល់បូរណភាពទឹកដី ឬប៉ះពាល់ដល់ព្រំដែន ។
លោកបញ្ជាក់ថា ៖« រឿងនេះ យើងត្រូវប្រយ័ត្នប្រយែង ព្រោះវាប៉ះពាល់ដល់ប្រទេសជាតិ ។ ចំណែកការងារបច្ចេកទេស យើងបានចរចាគ្នាបញ្ចប់រួចរាល់អស់ហើយ » ។
លោក លី បូរិន បន្ដថា នៅពេលប្រទេសទាំងពីរអនុញ្ញាតឱ្យដឹកជញ្ជូនឆ្លងកាត់ព្រំដែនតាមផ្លូវដែកហើយនោះ នឹងធ្វើឱ្យតម្លៃដឹកជញ្ជូនធ្លាក់ចុះ និងមានភាពប្រកួតប្រជែងកាន់តែច្រើន ហើយក៏ជួយសម្រួលដល់ការខូចខាតផ្លូវជាតិ,ការកកស្ទះចរាចរណ៍ និងកាត់បន្ថយគ្រោះថ្នាក់ចរាចរណ៍ផងដែរ ។
ប្រទេសកម្ពុជាកំពុងមានការរីកចម្រើនលើវិស័យហេដ្ឋារចនាសម្ព័ន្ធផ្លូវថ្នល់ ផ្លូវដែក ផ្លូវទឹក និងផ្លូវអាកាស ក្នុងនោះផ្លូវថ្នល់បាននិងកំពុងធ្វើឱ្យប្រសើរឡើងពីផ្លូវ២គន្លងទៅ៤គន្លង, គម្រោងសាងសង់ផ្លូវល្បឿនលឿន, គម្រោងសាងសង់ផ្លូវពីបាត់ដំបង ទៅកាន់ខេត្តកោះកុង ដើម្បីកាត់បន្ថយពេលវេលានៃការដឹកជញ្ជូនទៅកាន់កំពង់ផែទឹកជ្រៅ និងគម្រោងសាងសង់ផ្លូវពីខេត្តកំពង់ឆ្នាំងទៅកំពង់ធំ ជាដើម ៕
ចែករំលែកព័តមាននេះ