ខេត្តបន្ទាយមានជ័យ ៖ ករណីហិង្សាលើក្មេងប្រុសម្នាក់កាលពីព្រឹកថ្ងៃ៤ កក្កដា ២០១៨ ក្រោយពីមានគេថតបង្ហោះក្នុងបណ្តាញសង្គមហ្វេសប៊ុក ដែលជនដៃដល់ត្រូវបាននគរបាល ក្រុងប៉ោយប៉ែត ស្រាវជ្រាវចាប់ខ្លួនបាននៅយប់ថ្ងៃដដែលថែមទាំងជាប់សារធាតុញៀន។ ជនសង្ស័យឈ្មោះ ចូវ ទី ភេទប្រុស អាយុ២៤ឆ្នាំ ទីលំនៅមិនពិតប្រាកដ ស្នាក់នៅក្នុងក្រុងប៉ោយប៉ែត។
សមត្ថកិច្ចមិនបានប្រាប់អត្តសញ្ញាណក្មេងប្រុសរងគ្រោះទេដោយអះអាងថា មិនស្គាល់អត្តសញ្ញាណ ដឹងត្រឹមតែថា រឿងនោះកើតឡើងដោយសារជនរងគ្រោះយកខោជនសង្ស័យស្លៀក ទើបខឹងឈានដល់អំពើហិង្សា។ សមត្ថកិច្ចបន្តថា ករណីហិង្សាខាងលើ កើតឡើងនៅក្រោយស្ថានីយ រថភ្លើងក្នុងភូមិ និងសង្កាត់ប៉ោយប៉ែត កាលពីម៉ោងជាង៩ព្រឹក។ អ្វីដែលកាន់តែវ័ណ្ឌកទៅទៀតនោះ ជនសង្ស័យក្រោយឃាត់ខ្លួនសមត្ថកិច្ចធ្វើតេស្តទឹកនោមស្រាប់តែជាប់សារធាតុញៀន។
ករណីខាងលើប្រភពថា សមត្ថកិច្ចរកឃើញជនសង្ស័យដោយសារមានគេថតសកម្មភាព ជនដៃដល់ប្រើហិង្សាលើក្មេងរងគ្រោះហើយបង្ហោះក្នុងបណ្តាញសង្គមហ្វេសប៊ុក។ លោកវរសេនីយ៍ឯក ធិន ស៊ិនដេត អធិការនគរបាលក្រុងប៉ោយប៉ែតប្រាប់ថា ជនសង្ស័យមិនត្រឹមជាប់ចោទប្រើអំពើហិង្សាទេ ថែមទាំងជាប់សារធាតុញៀនទៀត។ លោកបញ្ជាក់ថា ក្រោយធ្វើកំណត់ហេតុសួរនាំរួច និងកសាងសំណុំរឿងបញ្ជូនជនសង្ស័យទៅស្នងការដ្ឋាននគរបាលខេត្តដើម្បីចាត់ការបន្តតាមនីតិវិធី៕
ចែករំលែកព័តមាននេះ