ខេត្តប៉ៃលិន ៖ ប្រជាពលរដ្ឋជាច្រើននាក់បានលើកឡើងពីបញ្ហាប្រឈមនឹងការលំបាកនានា ដែលជួបប្រទះរាល់ថ្ងៃដូចជា បញ្ហាផ្លូវលំខូចខាតលំបាកក្នុងការធ្វើដំណើរចេញទៅមក និងដឹកកសិផលចេញពីចម្ការ ។ មួយទៀតអត់មានប្រព័ន្ធទឹកស្អាតប្រើប្រាស់ប្រចាំថ្ងៃ និងអត់មានក្រុមហ៊ុនអគ្គិសនីតភ្ជាប់ដល់ផ្ទះប្រជាពលរដ្ឋនៅតំបន់ដាច់ស្រយាល ជាពិសេសពួកគាត់ត្អូញត្អែពីការធ្វើអត្រានុកូលដ្ឋានសៀវភៅគ្រួសារ និងអត្តសញ្ញាណប័ណ្ណជាដើម ។
ការលើកឡើងរបស់ប្រជាពលរដ្ឋនេះធ្វើឡើងកាលពីព្រឹកថ្ងៃទី០៤ ខែកក្កដា ឆ្នាំ២០១៨ស្ថិតនៅក្នុងបរិវេណវត្តទឹកផុស ក្នុងភូមិទឹកផុស សង្កាត់ប៉ៃលិន ក្រុងប៉ៃលិន ក្នុងពិធីវេទិកាសាធារណៈ ដែលរៀបចំឡើងដោយអាជ្ញាធរក្រុងប៉ៃលិន ។
លោក ស៊ុន យី អភិបាលក្រុងប៉ៃលិនបានលើកឡើងថាបើបងប្អូនប្រជាពលរដ្ឋមានបញ្ហា ប្រឈមផ្សេងៗដូចជា ចង់ឱ្យតម្លៃទីផ្សារកសិផលឡើងថ្លៃបញ្ហាខ្វះខាតភ្លើងអគ្គិសនីប្រើប្រាស់ អត់មានប្រព័ន្ធទឹកស្អាតប្រើប្រាស់ប្រចាំថ្ងៃជាដើមអាចលើកឡើងនៅក្នុងពិធី ដើម្បីស្ថាបនា និងកែតម្រូវដោយត្រូវចៀសវាងពីបញ្ហានយោបាយផងដែរ ។ លោកបន្តទៀតថា បញ្ហាទាំងឡាយណាដែលអាជ្ញាធរក្រុង និងក្រុមការងារអាចដោះស្រាយជូនបានខាងលោកនឹងដោះស្រាយជូនភ្លាមៗតែម្តង ហើយបើសិនជាបញ្ហានោះធំពេកក៏នឹងលើកយកទៅថ្នាក់ខេត្តបន្តទៀតផងដែរ ។
ពាក់ព័ន្ធនឹងបញ្ហានេះស្ត្រីម្នាក់ឈ្មោះ ជ័យ ថាវី រស់នៅភូមិខាងលើបានស្នើសុំឱ្យអាជ្ញាធរក្រុងជួសជុលផ្លូវលំ១ខ្សែប្រវែង៣គីឡូម៉ែត្រដែលទទួលរងការខូចខាតដោយសារភ្លៀងធ្លាក់រាល់ថ្ងៃ គឺចាប់ពីភូមិទឹកផុសរហូតដល់ភូមិអូរត្រែង សង្កាត់ប៉ៃលិន ក្រុងប៉ៃលិន ។ លោកតា អ៊ុយ ជាអាចារ្យវត្តទឹកផុសក៏មានសំណូមពរឱ្យអាជ្ញាធរស្វះស្វែងរកទីផ្សារដំឡូងមីដល់ប្រជាពលរដ្ឋ ដោយធ្វើយ៉ាងណាឱ្យតម្លៃនៅថេរដដែលមិនត្រូវឱ្យឈ្មួញក្រឡុកតាមអំពើចិត្តនោះឡើយ ។
ចំណែកបុរសម្នាក់ឈ្មោះ សឿង មុយ អាយុ៣៣ឆ្នាំ បានលើកឡើងថា ការស្នើសុំឱ្យទីផ្សារ ពោត និងដំឡូងមីរបស់ប្រជាពលរដ្ឋខ្មែរដែលដាំបានឡើងថ្លៃនោះជារឿងមួយត្រឹមត្រូវហើយ តែក៏សុំឱ្យអាជ្ញាធរក្រុងខេត្តមេត្តាពិនិត្យឡើងវិញនូវទំនិញដែលឈ្មួញនាំចូលមកលក់ដូរនៅទីផ្សារ មិនត្រូវឱ្យតម្លៃថ្លៃខ្លាំងពេកនោះទេ ដោយជួនកាលគ្រាប់ពូជពោតក្រហមក៏ឡើងថ្លៃគួរឱ្យកត់សម្គាល់ ហើយជួនកាលទៀតទិញប៉ះចំគ្រាប់ពូជក្លែងក្លាយយកទៅដាំដុះមិនទទួលបានផលនោះឡើយ។
ទោះបីជាយ៉ាងណាក៏ដោយទាំងអាជ្ញាធរក្រុង និងនគរបាលនៃអធិការក្រុងប៉ៃលិនក៏បានលើកឡើងដែរថា ការលើកឡើងរបស់ប្រជាពលរដ្ឋទាំងប៉ុន្មានខាងលើខាងក្រុងនឹងយកទៅធ្វើការ ដោះស្រាយជូនភ្លាមៗមិនឱ្យមានបញ្ហាកើតឡើងទៀតនោះទេ ។ ចំណែកពាក់ព័ន្ធនឹងសៀវភៅគ្រួសារអត្តសញ្ញាណប័ណ្ណ ឬសំបុត្រកំណើតក៏សូមឱ្យប្រជាពលរដ្ឋប្រញាប់ទៅធ្វើនៅប៉ុស្តិ៍នគរបាលផងដែរ ដោយមិនត្រូវបង់លុយកាក់អ្វីនោះឡើយ ហើយការធ្វើនេះចំណាយពេលត្រឹមតែ២សប្តាហ៍នឹងរួចរាល់ ។
សូមបញ្ជាក់ផងដែរថា កន្លងមកពាក់ព័ន្ធនឹងសៀវភៅគ្រួសារ សំបុត្រកំណើតប្រជាពលរដ្ឋរស់នៅក្នុងភូមិខាងលើតែងតែនាំគ្នាទៅធ្វើ ដោយជួនកាលនគរបាលប្រាប់ថា អស់ហើយមិនទាន់មកដល់ លុះមេភូមិសួរនាំប្រាប់ថា មកដល់ហើយ តែពេលពលរដ្ឋទៅធ្វើខាងសមត្ថកិច្ចប្រាប់ថា អត់មានដដែលឱ្យរង់ចាំថ្ងៃនេះថ្ងៃនោះរហូតដល់ធ្វើឱ្យអ្នកខ្លះខឹងសម្បារយ៉ាងខ្លាំង ខណៈចំណាយពេលវេលាទៅធ្វើហើយបែរជាអត់បានទៅវិញ ៕
ចែករំលែកព័តមាននេះ