ប្រទេសឥណ្ឌូណេស៊ី ៖ បណ្ដាអ្នកទទួលខុសត្រូវមូលដ្ឋាន បានគូសបញ្ជាក់ថា មានមនុស្សយ៉ាងតិច២៤នាក់ ក្នុងនោះមានកុមារជាច្រើននាក់ផងដែរ ត្រូវត្រូវស្លាប់កាលពីថ្ងៃទី៣ ខែកក្កដា ឆ្នាំ២០១៨ ដោយសារការលិចសាឡាងមួយគ្រឿងក្នុងដែនទឹកនៃឆ្នេរសមុទ្រឥណ្ឌូណេស៊ី។ ពួកអ្នកជួយសង្គ្រោះបានខិតខំយ៉ាងសកម្ម ដើម្បីជួយសង្គ្រោះមនុស្សជាង៤០នាក់ទៀតដែលបាត់ខ្លួន។
គ្រោះថ្នាក់នេះកើតមានក្នុងថ្ងៃដែលគេប្រកាសពីការឈប់តាមរកមនុស្ស១៦៤នាក់ដែលបាត់ខ្លួនក្រោយពីសាឡាងមួយទៀតលិច កាលពីសប្ដាហ៍មុន នៅកោះស៊ូម៉ាត្រា ក្នុងបឹងតូបាជាបឹងធំ ហើយជ្រៅជាងគេបំផុតលើពិភពលោក។
ក្នុងសេចក្ដីប្រកាសមួយលោក SUTO PURWO NUGROHO អ្នកនាំពាក្យនៃទីភ្នាក់ងារជាតិឥណ្ឌូណេស៊ី ទទួលបន្ទុកគ្រប់គ្រងគ្រោះមហន្តរាយបានថ្លែងថា សាកសពមនុស្ស២៤នាក់ត្រូវបានរកឃើញ ចំណែកមនុស្ស៧៤នាក់រកឃើញនៅរស់ ប៉ុន្តែមនុស្ស៤១នាក់នៅបាត់ខ្លួននៅឡើយ។
លោកបន្តថា សាឡាងនេះលិច ព្រោះមានភ្លៀង ព្រមទាំងខ្យល់ខ្លាំង និងរលកធំៗ។ ហើយសរុបមនុស្ស១៣៩នាក់ និងរថយន្ត៤៨គ្រឿងមានចុះក្នុងបញ្ជីដឹកក្នុងសាឡាងនោះផងដែរ។ ចំណែករថយន្តមួយចំនួនធ្លាក់ទៅក្នុងទឹកសមុទ្រមុននាវាលិច ព្រោះរលកធំៗបោកខ្លាំងពេក។
នាវាខាងលើដែលមានបណ្ដោយ៤៨ម៉ែត្រនោះ បានធ្វើដំណើរពីកោះCELEBES ខេត្តស៊ូឡាវេស៊ី ទៅកាន់កោះជិតខាង SELAYAR ហើយជួបប្រទះភ្លាមៗនូវការបោកបក់របស់ខ្យល់យ៉ាងខ្លាំង និងការវាយប្រហារដោយរលកធំៗ។
បើបណ្ដារូបភាពនៃការលិចនាវានេះ បង្ហាញពួកអ្នកដំណើរនាំគ្នារត់ចេញពីផ្នែកនាវា KM LESTARI ដែលកំពុងលិច ខណៈរលកធំៗបោកលើបណ្ដារថយន្តកាំមីញ៉ុង ព្រមទាំងរថយន្តឯទៀតៗ ស្ថិតលើនាវានៅកន្លែងមួយចម្ងាយ៣០០ម៉ែត្រពីឆ្នេរសមុទ្រកោះCELEBES។ ក្រុមនាវាតូចៗប៉ុនប៉ងជួយសង្គ្រោះពួកអ្នកដំណើរពេលភ្លៀងធ្លាក់ខ្លាំង រារាំងនាវាធំៗពិបាកចូលទៅក្បែរ ហើយបណ្ដាអ្នកដំណើរមានពាក់អាវពោង៕ វីដេអូដកស្រង់ចេញពី ៖
https://www.youtube.com/watch?v=akU2w5oEUgU
ចែករំលែកព័តមាននេះ