ខេត្តបន្ទាយមានជ័យ ៖ តាមសេចក្តីរាយការណ៍បឋមបានឱ្យដឹងថា ក្មេងស្រីខ្មែរចំនួន៣នាក់ត្រូវបានភាគីថៃធ្វើមាតុភូមិនិវត្តន៍មកកម្ពុជាវិញតាមច្រកទ្វារអន្តរជាតិប៉ោយប៉ែតប្រគល់ឲ្យមណ្ឌលសំចតនៃក្រសួងសង្គមកិច្ចអតីតយុវជននិងយុវនិតិសម្បទាប្រចាំក្រុងប៉ោយប៉ែតនៅព្រឹកថ្ងៃទី៤ កក្កដា ឆ្នាំ២០១៨ បន្ទាប់ពីពួកគេរត់ចេញពីកន្លែងធ្វើការរកការអន្តរាគមន៍ពីសមត្ថកិច្ចថៃ។ក្មេងស្រីជាជនរងគ្រោះទាំង៣នាក់នេះរួមមាន ១-ឈ្មោះព្រំ សុភ័ណ អាយុ១៥ឆ្នាំ ២-ឈ្មោះរឿន ស្រីលាភ អាយុ១៣ឆ្នាំ និង៣-ឈ្មោះអ៊ែល មួយគៀង អាយុ១៦ឆ្នាំ ។ ពួកគេទាំង៣នាក់ជាសាច់ញាតិនឹងគ្នា រស់នៅក្នុងក្រុងសិរីសោភ័ណ ខេត្តបន្ទាយមានជ័យ ។ជនរងគ្រោះទាំង៣នាក់នេះបានចូលទៅប្រទេសថៃដោយខុសច្បាប់តាមរយៈមេខ្យល់យកទៅឲ្យស៊ីឈ្នួលលក់ផ្កាឲ្យជនជាតិថៃ លុះពួកគេជួបការលំបាកក៏រត់ចេញពីកន្លែងធ្វើការទៅឲ្យតម្រួតថៃជួយហើយសមត្ថកិច្ចថៃក៏ទាក់ទងប្រគល់ជនរងគ្រោះទៅឲ្យក្រសួងសង្គមកិច្ចថៃប្រចាំនៅខេត្តសុរ៉ាថានីស្នាក់នៅមួយរយៈ ទើបបញ្ជូនមកកម្ពុជាថ្ងៃនេះ ។លោកស្រីឈា ម៉ានិត ប្រធានមជ្ឈមណ្ឌលសំចតនៃក្រសួងសង្គមកិច្ច (កសអយ) ប្រចាំក្រុងប៉ោយប៉ែតប្រាប់កោះសន្តិភាពថា ក្រសួងសង្គមកិច្ចថៃថែមទាំងតវ៉ាយកប្រាក់កម្លាំងពលកម្មបានគ្រប់ចំនួនឲ្យជនរងគ្រោះវិញផងដែរ ។ លោកស្រីប្រាប់ថា មុនការបញ្ជូនក្មេងៗទាំង៣នាក់នេះ ភាគីថៃគេបានបញ្ជូនឯកសារមក លុះលោកស្រី និងក្រុមការងារចុះស្រាវជ្រាវជួបជាមួយឪពុកម្តាយពួកគេដល់លំនៅដ្ឋាន ទើបដឹងថា កន្លងមកឪពុកម្តាយក្មេងៗទាំង៣នាក់បានដាក់ពាក្យបណ្តឹងនៅការិយាល័យជំនាញនៃស្នងការដ្ឋាននគរបាលខេត្តបន្ទាយមានជ័យចោទមេខ្យល់នាំកូនៗរបស់ពួកគាត់ទៅធ្វើការនៅប្រទេសថៃដោយខុសច្បាប់ និងអំពាវនាវឲ្យជួយផងដែរ ។លោកស្រីបន្តថា កន្លងមកក្មេងរងគ្រោះដែលភាគីថៃធ្វើមាតុភូមិនិវត្តន៍មក ខាងលោកស្រីតែងតែទំនាក់ទំនងយកក្មេងៗទាំងនោះប្រគល់ឲ្យអង្គការដៃគូនានានៅក្នុងខេត្ត ឬទីក្រុងភ្នំពេញដើម្បីបានរៀននូវជំនាញវិជ្ជាជីវៈផ្សេងៗ ។ ដោយឡែកក្មេងស្រីទាំង៣នាក់ខាងលើដោយសារពួកគេមានជំនាញ ហើយមិនចង់ទៅរស់នៅរៀនជំនាញអ្វីនោះទេគឺពួកគេសុំទៅលំនៅដ្ឋានជួបជុំក្រុមគ្រួសារវិញដើម្បីបង្កើតមុខរបររៀងខ្លួនៗ ។ ព័ត៌មានលម្អិតនឹងមានផ្សាយនៅលើទំព័រកាសែតកោះសន្តិភាព ៕
ចែករំលែកព័តមាននេះ