ជីវិតទាំង១៣នាក់ ដែលអាចរស់នៅក្នុងល្អាងបាន ដោយសារព្យាយាមដេកនៅស្ងៀម និងផឹកតំណក់ទឹកដែលធ្លាក់តក់ៗក្នុងល្អាង មិនមានព័ត៌មានច្រើននៅឡើយទេ ពីការប្រឈមនានារបស់ក្រុមក្មេងប្រុស និងគ្រូបង្វឹកដែលរយៈពេល១០ថ្ងៃអត់អាហារ ហើយតើមូលហេតុអ្វីទើបការចូលទៅក្នុងរូងភ្នំ បានរសាត់ពួកគេចាកឆ្ងាយពីមាត់រូងមានចម្ងាយជាង៤គីឡូម៉ែត្របែបនេះ ។
យោងតាមការប្រាប់ខ្លះៗពីមនុស្សទាំង១៣នាក់ ទៅក្រុមអ្នកជួយសង្គ្រោះអង់គ្លេសថា «ពួកគេអាចរស់បាន ព្រោះព្យាយាមដេកនៅស្ងៀម និងផឹកតែតំណក់ទឹកដែលស្រក់ពីថ្មភ្នំ ។ តាមការចេញផ្សាយពីកាសែត Bangkok Post ថ្ងៃទី១ កក្កដា កន្លងមកនេះ បានឱ្យដឹងថា ក្រុមអ្នកជំនាញមុជទឹកពេលមិនទាន់អាចចូលទៅដល់ទីតាំងចុងក្រោយ ដែលគេគិតថា ក្មេងប្រុសទាំងអស់នៅទីនោះបាន ព្រោះតែស្ថានភាពរូងភ្នំស្មុគ ស្មាញក្រោយភ្លៀងធ្លាក់ជន់លិចរូងភ្នំ ។ នៅរសៀលថ្ងៃ១ កក្កដា ក្រុមទាហានអាមេរិក បានបង្ហោះដ្រូនម្ដងទៀត ដើម្បីសម្គាល់ទីតាំងជាក់លាក់ ហើយបញ្ជូនក្រុមអ្នកមុជទឹកចូលទៅតែម្ដង ដោយសង្ឃឹមថា នឹងអាចរកឃើញនៅថ្ងៃ២ កក្កដា ។
បើតាមអាជ្ញាធរម្នាក់បានប្រាប់សារព័ត៌មានថា ដំណឹងទទួលបានពីទាហានអាមេរិក គឺពួកគេប្រើដ្រូនបង្ហោះថតរូបល្អាងភ្នំថាំហ្លួងទាំងមូល ព្រមទាំងវិភាគលើកម្ដៅដង្ហើមក្នុងរូងភ្នំ បូករួមទាំងឧបករណ៍អេឡិចត្រូនិកផង បានរកឃើញថា មានជីវិតនៅក្នុងរូងភ្នំនោះ ។ បន្ទាប់ពីការស្រាវជ្រាវជាក់លាក់ម្ដងទៀត ដោយមានជំនួយពីក្រុមអ្នកមុជទឹកជប៉ុន និងជាតិសាសន៍ដទៃផង គេសង្ឃឹមថា នឹងមានដំណឹងល្អ ទីបំផុតនៅយប់ថ្ងៃទី២ កក្កដា ក្រុមអ្នកមុជទឹកអង់គ្លេសក៏បានរកពួកគេឃើញ ។
រូងភ្នំថាំហ្លួងនេះ មានប្រវែងជិត១០គីឡូម៉ែត្រ ស្ថិតនៅខេត្តឈៀងរ៉ៃ ប្រទេសថៃ ។ រូងភ្នំនេះចែកចេញជា៣ដំណាក់ ។ ក្រុមអ្នករុករកបានឆ្លងផុតដំណាក់ទី១ និងទី២ ដោយព្យាយាមចូលទៅដំណាក់ទី៣ ជាដំណាក់ចុងក្រោយ ហើយសង្ឃឹមថា ក្មេងប្រុសទាំងអស់នោះ កំពុងជ្រកនៅទីនោះ ។ ទោះបែបនេះក្ដី ភ្លៀងធ្លាក់ជាឧបសគ្គធំបំផុត ដែលធ្វើឱ្យក្រុមអ្នកមុជទឹកពិបាកឆ្លងចូលដំណាក់ទី៣នោះ ។
បើតាមការសន្និដ្ឋាន ក្មេងៗជាកីឡាករទាំង១២នាក់ ព្រមទាំងគ្រូបង្វឹកម្នាក់ បានចូលទៅរូងភ្នំខាងលើក្រោយពេលហ្វឹកហាត់ចប់ ។ គាប់ជួនពេលនោះភ្លៀងធ្លាក់ខ្លាំង បណ្ដាលឱ្យទឹកជន់ឡើង លិចផ្លូវចេញមកវិញមិនរួច ។ ស្ថានភាពនេះ បង្ខំឱ្យពួកគេដើរទៅមុខរកច្រកចេញ រហូតជ្រុលខ្លួនកាន់តែជ្រៅនិងវង្វេងបាត់នៅក្នុងរូងភ្នំនោះតែម្ដង ។ នៅមាត់ច្រកចូលរូងភ្នំមានបន្សល់ទុកកង់ ស្បែកជើង កាតាប និងសម្ភារកីឡាមួយចំនួន ។
អត្ថបទសរសេរ ដោយ
អត្ថបទសរសេរ ដោយ
ចែករំលែកព័តមាននេះ