ថ្នាំក្អក និងថ្នាំផ្តាសាយនៅលើទីផ្សារដែល មនុស្សគ្រប់រូបតែងតែទិញដោយគ្មានវេជ្ជបញ្ជាត្រឹមត្រូវ ជាវិធីសាស្ត្រដែលល្អមួយសម្រាប់ជួយ កុមារឲ្យមានភាពប្រសើរឡើងពីផ្តាសាយ និងក្អកមែនទេ ?
ចូរអ្នកគិតវាសាជាថ្មី ! ថ្នាំក្អក និងថ្នាំផ្តាសាយ មិនត្រូវបានអនុញ្ញាតឲ្យប្រើលើកុមារដែលមានអាយុតិចជាង២ឆ្នាំនោះឡើយ, ហើយតុលាការក៏មិនបានអើពើថាតើថ្នាំក្អក និងថ្នាំផ្តាសាយនេះ សក្តិសមទៅនឹងកុមារដែលមានអាយុលើសពី២ឆ្នាំ ឬយ៉ាងណា ? ដូចនេះ តើធ្វើដូចម្តេចដើម្បីព្យាបាលជំងឺផ្តាសាយដែលកើតលើកុមារ ? ការណែនាំរបស់គ្រូពេទ្យឯកទេសជំងឺកុមារ ។
តើអ្វីជាការព្រួយបារម្ភលើកុមារនៅពេលដែលពួកគេប្រើប្រាស់ថ្នាំក្អក និងថ្នាំផ្តាសាយ? ៖ ការប្រើប្រាស់ថ្នាំក្អក និងថ្នាំផ្តាសាយដែលគ្មានវេជ្ជបញ្ជាត្រឹមត្រូវ គឺមិនអាចព្យាបាលប្រភពជំងឺផ្តាសាយ និងក្អកបាននោះទេ, ហើយវាក៏មិនអាចព្យាបាលកុមារឲ្យបានជាសះស្បើយ និងមិនអាចឲ្យកុមារជាបានរហ័សផងដែរ ។
ផ្ទុយមកវិញថ្នាំទាំងនេះអាចមានផលអាក្រក់មួយចំនួនក្រោយពីបានប្រើប្រាស់វាដូចជា បេះដូងដើរញាប់ និងប្រកាច់ជាដើម ។ រដ្ឋបាលចំណីអាហារ និងឱសថ (FDA) អាមេរិកបានណែនាំថា អ្នកដែលជាមាតាបិតាទាំងអស់ គួរចៀសវាងប្រើថ្នាំក្អក និងថ្នាំផ្តាសាយទៅលើកុមារដែលមានអាយុក្រោម២ឆ្នាំ ។
តើថ្នាំក្អក និងថ្នាំផ្តាសាយ មានបង្កើតជាបញ្ហាទេ ពេលណាដែលវាត្រូវបានគេប្រើប្រាស់លើកុមារដែលមានអាយុលើសពី២ឆ្នាំ ? ៖ រដ្ឋបាលចំណីអាហារ និងឱសថ (FDA) អាមេរិក (FDA) កំពុងតែសិក្សាលើសុវត្ថិភាពរបស់កុមារលើសពី២ឆ្នាំ ក្នុងការប្រើប្រាស់ថ្នាំក្អក និងថ្នាំផ្តាសាយ ។ ចូរអ្នកចាំថា ថ្នាំក្អក និងថ្នាំផ្តាសាយមិនអាចអោយជំងឺផ្តាសាយជាសះស្បើយ ភ្លាមៗនោះទេ ហើយផលអាក្រក់របស់ថ្នាំក៏នៅតែអាចកើតមានឡើងផងដែរ។
ប្រសិនបើអ្នកឲ្យថ្នាំក្អក និងថ្នាំផ្តាសាយទៅកុមារដែលមានអាយុច្រើន, ចូរអ្នកធ្វើតាមសេចក្តីណែនាំដោយប្រុងប្រយត្ន័ ។ សូមកុំឲ្យកូនរបស់អ្នកលេបថ្នាំ២មុខដែលមានសមាសធាតុសកម្មដូចគ្នាដូចជា ថ្នាំប្រឆាំងនឹងអ៊ីសស្តាមីន(antihistamine), ថ្នាំសម្រួលដល់ការដកដង្ហើម និងថ្នាំបំបាត់ឈឺ ។ ភាពច្រើនពេកនៃសមាសធាតុតែមួយអាចនាំឲ្យក្មេងមានគ្រោះថ្នាក់ដោយសារតែកម្រិតរបស់វាច្រើនពេក ។
ចុះចំណែកឯថ្នាំអង់ទីប៊ីយោទិកវិញវាយ៉ាងម៉េចដែរ ? ៖ អង់ទីប៊ីយោទិក អាចត្រូវបានគេប្រើដើម្បីប្រយុទ្ធប្រឆាំងនឹងមេរោគបាក់តេរី ប៉ុន្តែវាគ្មានឥទ្ធិពលទៅលើមេរោគពពួកវីរុសដែលជាមេរោគបណ្តាលឲ្យកើតមានជំងឺផ្តាសាយ ។ អង់ទីប៊ីយោទិក មិនអាចជួយកូនរបស់អ្នកទេបើគេមានជំងឺផ្តាសាយ ។ សូមចងចាំថា ប្រសិនបើអ្នកឲ្យកូនរបស់អ្នកលេបអង់ទីប៊ីយោទិកកាន់តែច្រើន, កូនរបស់អ្នកនឹងកើតជំងឺនៅអនាគតដោយសារមេរោគដែលស៊ាំនឹងអង់ទីប៊ីយោទិក ។
តើមានថ្នាំដើម្បីព្យាបាលជម្ងឺផ្តាសាយដែរ ឬទេ? ៖ ការប្រើប្រាស់ថ្នាំបំបាត់ឈឺដូចជា acetaminophen(Tylenol, ថ្នាំដទៃទៀត) ឬក៏ ibuprofen (Advil, Motrin, ថ្នាំ ផ្សេងៗទៀត) អាចបន្ថយកម្តៅ, ឈឺក និងឈឺក្បាល ។ ចូរអ្នកប្រើថ្នាំបំបាត់ឈឺនេះដោយប្រុងប្រយត្ន័ទៅតាមការណែនាំ ប្រសិនបើអ្នកឲ្យកូនរបស់អ្នកលេបវា ។
សូមកុំអោយ ibuprofen ទៅទារកដែលមានអាយុតិចជាង៦ខែ ឬទៅកុមារដែលខ្វះជាតិទឹក, ក្អួតខ្លាំង និងហាមអោយអាស្ពីរីនទៅអ្នកដែលមានអាយុតិចជាង១៨ឆ្នាំ ។ អាស្ពីរីនអាចបង្កឲ្យមាន ជំងឺលើទារកដែលក្នុងភាសាបច្ចេកទេសអង់គ្លេស គេហៅថា Reye’s Syndrome ដែលអាចគ្រោះថ្នាក់ដល់ជីវិតទោះបីជាវាកម្រកើតមានក្តី ។ ប្រសិនបើអ្នកចង់បានដំណោះស្រាយផ្សេងទៀត, សូមអ្នកទៅពិភាក្សាជាមួយគ្រូពេទ្យជាមុនសិន ។
តើខ្ញុំអាចជួយកូនរបស់ខ្ញុំឲ្យមានសភាពធូរស្រាលវិញដោយរបៀបណា ? ៖ ជាទូទៅ គ្មានការព្យាបាលណាសម្រាប់ជំងឺផ្តាសាយនោះទេ, ប៉ុន្តែអ្នកអាចជួយកូនរបស់អ្នកឲ្យមានសភាពធូរស្រាលបាននៅពេលដែលពួកគេកំពុងតែលេចចេញនូវសភាពនោះឡើង។
1.ការផ្តល់ជាតិទឹក៖សារធាតុទឹកមួយចំនួនដូចជា ទឹក, ទឹកផ្លែឈើ និងទឹកស៊ុបអាចជួយឲ្យមានភាពងាយស្រួលក្នុងការដកដង្ហើម ។
2.ជំរុញអោយមានការក្អក៖ ការក្អកអាចជួយសំអាតសារធាតុមួយចំនួនដូចជាស្លេសដែលធ្វើឲ្យប៉ះពាល់ក្នុងការដឹកនាំខ្យល់នៅក្នុងផ្លូវខ្យល់របស់កូនអ្នក ។ ប្រសិនបើកូនរបស់អ្នកត្រូវការជំនួយដើម្បីឲ្យវាអាចក្អកបាន, ចូរអ្នកដាក់គេផ្កាប់នៅលើភ្លៅរបស់អ្នក, ហើយដាក់គេទោរទៅមុខប្រហែលជា៣០ដឺក្រេ រួចទះ ថ្នមៗលើខ្នងរបស់គេ ។
3.ការប្រើប្រាស់ប្រដាប់បឺតនៅក្នុងច្រមុះរបស់កុមារ៖ ឧបករណ៍នេះប្រើសម្រាប់បឺតយកសារធាតុអ ន្ធិលៗ(សំបោរ)ចេញពីក្នុងច្រមុះ ។
របៀបប្រើ៖ គ្រាន់តែច្របាច់ផ្នែកខាងដើមនៃឧបករណ៍នោះ រួចដាក់វាចូលទៅក្នុងរន្ធមួយនៃច្រមុះរបស់កុមារ រួចលែងផ្នែកខាងដើមនៃឧបករណ៍នោះ យឺតៗ អ្នកនឹងអាចយកសារធាតុអន្ធិលនោះចេញបាន ។
4.តឹងច្រមុះ៖អ្នកអាចចំហុយច្រមុះកូន ។ អ្នកក៏អាចប្រើថ្នាំបន្តក់ជាតិអំបិលដើម្បីកាត់បន្ថយសម្បោរនៅក្នុងច្រមុះបានដែរ និងអាចធ្វើឲ្យកូនរបស់អ្នកអាចដកដង្ហើមបានធូរជាងមុន។ សម្រាប់ទារក គួរតែប្រើប្រាស់ប្រដាប់បឺតសម្បោរ ។
5.បន្ថយការឈឺក៖ ចំពោះកុមារដែលមានអាយុលើសពី៤ឆ្នាំ, ដើម្បីឲ្យពួកគេបាត់ឈឺក, អ្នកអាចឲ្យពួកគេខ្ពុរមាត់នឹងទឹកអំបិល ឬបៀមស្ករគ្រាប់ជាដើម ។ ទឹកឃ្មុំក៏អាចបន្ថយការក្អកបានដែរ ។ សូមឲ្យកន្លះស្លាបព្រាកាហ្វេ (២.៥មីលី្លលីត្រ) ចំពោះកុមារដែលមានអាយុពី២ទៅ៥ឆ្នាំ, មួយស្លាបព្រាកាហ្វេ(៥មីលីលីត្រ) ចំពោះកុមារដែលមានអាយុពី៦ទៅ១១ឆ្នាំ និង២ស្លាបព្រាកាហ្វេ(១០មីលី្លលីត្រ) ចំពោះកុមារដែលមានអាយុចាប់ពី១២ឆ្នាំឡើងទៅ ។ សូមកុំឲ្យទឹកឃ្មុំទៅកុមារអាយុក្រោម១ឆ្នាំពីព្រោះវាអាចនឹងធ្វើឲ្យគេពុលធ្ងន់បាន ។
6.សម្រាក៖ សូមពិចារណាកុំឲ្យកូនរបស់អ្នកទៅសាលារៀន ឬធ្វើអ្វីផ្សេងទៀត ប្រសិនបើពួកគេក្តៅខ្លួន ឬក្អកខ្លាំង ។
នៅពេលណាដែលខ្ញុំគួរតែទៅជួបគ្រូពេទ្យ? ៖ ជំងឺផ្តាសាយភាគច្រើនត្រូវការរយៈពេលមួយដើម្បីវិវឌ្ឍតែវានឹងបាត់ទៅវិញ ។ ទោះជាយ៉ាងនេះក្តី, វាជារឿងសំខាន់សំរាប់អ្នកក្នុងការដឹងពីភាពធ្ងន់នៃជំងឺផ្តាសាយនេះ ។ ប្រសិនបើអ្នកមានកូនដែលមានអាយុតិចជាង៣ខែ, សូមអ្នកទៅជួបគ្រូពេទ្យភ្លាម នៅពេលដែលកូនរបស់អ្នកចេញរោគសញ្ញានៃជំងឺផ្តាសាយ ។
ចំពោះទារកដែលទើបនឹងកើត, ផ្តាសាយអាចវិវឌ្ឍយ៉ាងឆាប់រហស័ទៅជាជំងឺរលាកផ្លូវដង្ហើម, ជំងឺរលាកសួត និងជំងឺធ្ងន់ដទៃទៀត ។
ក្រៅពីនេះសូមទៅជួបគ្រូពេទ្យ ប្រសិនបើកូនរបស់អ្នកមានអាការដូចខាងក្រោម ៖ 1.នោមមានសភាពមិនធម្មតា 2.កម្តៅឡើងដល់៣៩,៤អង្សាសេ 3.កំដៅ៣៧,៨អង្សាសេលើសពី៣ថ្ងៃ 4.ឈឺត្រចៀក 5.ភ្នែកឡើងលឿង 6.ក្អកលើសពីមួយសប្តាហ៍ 7.សំបោរខាប់ និងព័ត៌ស្វាយ
រកការព្យាបាល ភ្លាមៗ ប្រសិនបើកូនរបស់អ្នកមានអាការដូចខាងក្រោម ៖ 8.អត់ចង់ញ៉ាំទឹក 9.ក្អកខ្លាំងរហូតដល់ក្អួត ឬប្រែប្រួលពណ៌ស្បែក ។ 10.ក្អកមានស្លេស និងមានពណ៌ក្រហម ប្រឿងៗ ។ 11.ពិបាកដកដង្ហើម ឬបបូរមាត់ និងមាត់ឡើងពណ៌ស្វាយ ។
តើអ្វីដែលជាវិធីសាស្ត្រដ៏ល្អបំផុតដើម្បីការពារផ្តាសាយ? ៖ ផ្តាសាយអាចនាំឲ្យមានការប៉ះពាល់ដល់ផ្លូវដង្ហើមដែលនាំអោយក្អក និងកណ្តាស ។ ដើម្បីឲ្យកូនរបស់អ្នកមានសុខភាពល្អ អ្នកគួរតែ ៖
1.ស្អាតជានិច្ច៖ បង្រៀនកូនរបស់អ្នកឲ្យលាងដៃជាញឹកញាប់ ។ ប្រសិនបើអ្នកគ្មានសាប៊ូ, ការលាងដោយអាល់កុលជាជម្រើសល្អ ដើម្បីឲ្យដៃមានអនាមយ័ ។ យ៉ាងណាមិញ, ប្រដាប់ក្មេងលេង និងផ្ទះត្រូវតែស្អាតជានិច្ច ។
2.ខ្ទប់ច្រមុះ និងមាត់៖ បង្រៀនអ្នកទាំងអស់គ្នាឲ្យខ្ទប់ច្រមុះ និងមាត់ដោយក្រដាស ពេលណាដែលអ្នកក្អក ឬកណ្តាស រួចបោះក្រដាសនោះចោល ។ អ្នកក៏អាចយកដៃមកខ្ទប់ នៅពេលដែលអ្នកក្អក ឬកណ្តាស ក្នុងករណីដែលគ្មានក្រដាស ។
3.ចៀសវាងការចែករំលែក៖ ចៀសវាងការប្រើរួមគ្នាដូចជាកែវទឹក, សម្លៀកបំពាក់, កន្សែង និងរបស់ផ្សេងៗ ដែលអាចឲ្យមេរោគនៅជិតមនុស្ស និងនាំឲ្យកើតផ្តាសាយ និងក្តៅខ្លួន ។
4.ចៀសវាងនៅជិតអ្នកឈឺ៖ នៅពេលដែលមនុស្សឈឺនឹងអាចចម្លងទៅមនុស្សម្នាក់ទៀតយ៉ាងលឿនបំផុតក្នុងអំឡុងពេលពីរបីថ្ងៃដំបូងនៃជំងឺបង្កដោយវីរុស ។
ទាំងសំរាប់ឪពុកម្តាយ និង កូនៗវិធីបង្ការងាយៗនឹងជួយកាត់ន្ថយការឆ្លងជំងឺផ្តាសាយបានច្រើន ៕ ស្រង់ពីគេហទំព័រសុខភាព
ចែករំលែកព័តមាននេះ