ខេត្តកណ្តាល ៖ គ្រោះថ្នាក់ចរាចរណ៍មួយបានកើតឡើងគួរឲ្យរន្ទត់ ខណៈដែលរថយន្តដឹកទំនិញមួយគ្រឿងបុករថយន្តក្រុមអកការដង់ពីក្រោយចំយ៉ាងពេញទំហឹងបណ្តាលឲ្យមានមនុស្ស០២នាក់បានស្លាប់យ៉ាងអាណោចអាធម៌បំផុត និង០២នាក់ទៀតរងរបួសធ្ងន់ ។
ហេតុការណ៍នេះបានកើតឡើងនៅវេលាម៉ោង០១និង២០នាទីឈានចូលថ្ងៃទី០៣ ខែកក្កដា ឆ្នាំ២០១៨ នៅលើដងផ្លូវជាតិលេខ១ ក្នុងចន្លោះគីឡូលេខ១៨-១៩ស្ថិតនៅភូមិទួលក្របៅ ឃុំគគីរ ស្រុកកៀនស្វាយ ខេត្តកណ្តាល ។
នគរបាលចរាចរណ៍ស្រុកកៀនស្វាយបានឱ្យដឹងថា នៅមុនពេលកើតហេតុក្រុមរថយន្តអកការដង់បានធ្វើដំណើរចេញពីភ្នំពេញទៅ លុះបានមកដល់ត្រង់ចំណុចកើតហេតុរថយន្តនោះខូចហើយអ្នកដែលជិះលើរថយន្តចុះមករុញ ស្រាប់តែមានរថយន្តដឹកទំនិញ០១គ្រឿងម៉ាកហ៊ីយ៉ាន់ដាយ ពាក់ស្លាកលេខ ភ្នំពេញ៣B-៧៣៨៤ បើកបរដោយឈ្មោះស៊ិន ស៊ីណា ភេទប្រុស អាយុ៣១ឆ្នាំ រស់នៅក្រុងស្វាយរៀង និងមានអ្នកដំណើរចំនួន០២នាក់ ទី០១- ឈ្មោះ ស៊ូ ចាន់ថន ភេទប្រុស អាយុ២៩ឆ្នាំ (របួសធ្ងន់) រស់នៅស្រុកព្រះសេ្តចខេត្តព្រៃវែង និងទី០២-ឈ្មោះត្រេន ធិ ភេទប្រុស អាយុ៣០ឆ្នាំ រស់នៅជាមួយគ្នា (ស្របទិសគ្នា) លុះមកដល់ត្រង់ចំណុចកើតហេតុបុករថយន្តចំពីក្រោយពេញទំហឹងតែម្តង ។
នគរបាលចរាចរណ៍បានបន្តទៀតថា រថយន្តក្រុមអកការដង់ ម៉ាកHYUNDAl ពាក់ស្លាកលេខ ច-៣០៣៥ ភព.២ បើកបរដោយឈ្មោះ កក សារឿន ភេទប្រុស អាយុ៣៥ឆ្នាំ រស់នៅភូមិទួលត្នោត ឃុំគគីរ ស្រុកកៀនស្វាយ ដែលកំពុងឈប់ធ្វើការជួសជុល ដោយមានអ្នកចូលរួមដំណើរចំនួន០៣នាក់ ទី០១- ឈ្មោះ សុខ រីភេទ ភេទប្រុស អាយុ៣៨ឆ្នាំ(ស្លាប់) រស់នៅភូមិទួលក្របៅ ឃុំគគីរ ទី០២- ឈ្មោះ គ្រឿន សំនាង ភេទប្រុស អាយុ២៤ឆ្នាំ (ស្លាប់) រស់នៅភូមិស្ទឹង ឃុំសំរោងធំ ស្រុកកៀនស្វាយ និងទី០៣- ឈ្មោះ កក វិចិត្រ ភេទប្រុស អាយុ៣២ឆ្នាំ (របួសធ្ងន់) រស់នៅភូមិទួលក្របៅ ឃុំគគីរ ។
ក្រោយពីកើតហេតុបានទទួលព័ត៌មានភ្លាមៗកម្លាំងផ្នែកចរាចរណ៍ស្រុកកៀនស្វាយបានចុះទៅធ្វើការវាស់វែង ហើយបានបញ្ចូនជនរងគ្រោះទៅមន្ទីរពេទ្យ ដោយឡែកសពត្រូវបានប្រគល់ជូនក្រុមគ្រួសារយកទៅធ្វើបុណ្យតាមប្រពៃណី និងវត្ថុតាង ហើយអ្នកបើកបរយកទៅអធិការស្រុកកៀនស្វាយ ដើម្បីបន្តនីតិវិធីច្បាប់ ៕
ចែករំលែកព័តមាននេះ