ខេត្តប៉ៃលិន ៖ បន្ទាប់ពីមេឃធ្លាក់ភ្លៀងរាល់ថ្ងៃស្ទើរមិនឈប់ឈរអស់រយ:ពេលជាយូរមកហើយ ធ្វើឱ្យដំណាំពោតក្រហមនៅកន្លែងខ្លះ ដែលស្ថិតនៅត្រង់ដីទំនាបទទួលរងការខូចខាតយ៉ាងដំណំ ប៉ុន្តែក៏មានចម្ការជាច្រើនផងដែរកំពុងទទួលបានផលច្រើនគួរឱ្យកត់សម្គាល់ ហើយល្មមដល់ពេលត្រូវជួលកម្មករឱ្យចូលកាច់ ដើម្បីដឹកយកទៅលក់នៅតាមស្តង់នីមួយៗ ក្នុងក្រុងប៉ៃលិន បានប្រាក់ផ្គត់ផ្គង់ជីវភាពគ្រួសារបន្តទៀត ។ ប្រភពព័ត៌មានពីបុរសម្នាក់ ឈ្មោះ ហៀក គុណ អាយុ៦២ឆ្នាំ ជាអតីតយោធាពិការជើងម្នាក់ រស់នៅភូមិក្បាលព្រលាន សង្កាត់អូរតាវ៉ៅ ក្រុងប៉ៃលិន បានឱ្យដឹងថា គាត់មានដីចម្ការនៅក្នុងភូមិចំនួន៥ហិកតា ហើយដើមឆ្នាំ២០១៨នេះ គាត់បានបែងចែកដីដាំពោតចំនួន៤ហិកតា និងដាំដំឡូងមី១ហិកតា ។ គាត់បន្តទៀតថា ទោះបីជានៅឆ្នាំនេះ សង្កេតឃើញមានភ្លៀងធ្លាក់ច្រើន ដែលបណ្តាលឱ្យទទួលរងការខូចខាតដំណាំពោត និងដំឡូងមីរបស់ប្រជាពលរដ្ឋនៅតាមចម្ការក្នុងក្រុងប៉ៃលិនអស់ជាច្រើនក៏ដោយ តែចម្ការរបស់គាត់ មិនមានប៉ះពាល់អ្វីធ្ងន់ធ្ងរនោះទេ ព្រោះស្ថិតនៅត្រង់កន្លែងដីទួលខ្ពស់ ទោះបើភ្លៀងធ្លាក់ច្រើនបែបណា ក៏មិនព្រួយបារម្ភឡើយ ហើយថែមទាំងធ្វើឱ្យដំណាំពោតដុះលូតលាស់ល្អជាងឆ្នាំមុនៗទៅទៀត ។គាត់បញ្ជាក់ទៀតថា បន្ទាប់ពីមេឃផ្អាកភ្លៀងប៉ុន្មានថ្ងៃនេះ គាត់បានសម្រុកជួលកម្មករឱ្យចូលទៅប្រមូលផលនៅក្នុងចម្ការរបស់ខ្លួន ដើម្បីប្រញាប់យកទៅលក់នៅតាមស្តង់ៗទាន់ពេលពោតក្រហមមិនទាន់ធ្លាក់ថ្លៃ ដោយបច្ចុប្បន្ននេះ អាចលក់ពោត១គីឡូក្រាមថ្លៃជាង៤បាត(ប្រាក់ថៃ) ស្មើនឹង៥០០រៀល ហើយម្យ៉ាងវិញទៀត បើទោះបីជាឡើងថ្លៃឬថោកជាងនេះក៏គាត់មិនព្រួយបាម្ភអ្វីដែរ ព្រោះរាល់ថ្ងៃអត់ជំពាក់បំណុលធនាគារ ឬអង្គការនោះទេ ។ ប៉ុន្តែខណៈពេលកំពុងប្រមូលផលនេះស្នៀតពោតក្រហមរបស់គាត់ហាក់ដូចជា ត្រូវសត្វកណ្តុរខាំស៊ីអស់ខ្លះៗដែរ ធ្វើឱ្យខូចខាតអស់ប្រហែលជា១០ភាគរយ ទោះបីជាគាត់ខំព្យាយាមដាក់ថ្នាំយ៉ាងណាក៏ទប់មិនឈ្នះដែរ ។ចំណែកប្រជាពលរដ្ឋរស់នៅភូមិផ្សេងៗជាច្រើនទៀត ក្នុងក្រុងប៉ៃលិន ក៏កំពុងតែមមាញឹកក្នុងការនាំកូនចៅរបស់ខ្លួនចេញអស់ៗពីផ្ទះ ដោយធ្វើដំណើរទៅចម្ការជិតឆ្ងាយ ក្នុងនោះអ្នកខ្លះទៅប្រមូលផលពោតក្នុងចម្ការរបស់ខ្លួន ចំណែកខ្លះទៀតនាំគ្នាទៅស៊ីឈ្នួលកាច់ពោតឱ្យគេ ដើម្បីបានប្រាក់សម្រាប់ផ្គត់ផ្គង់ជីវភាពគ្រួសារ ៕
ចែករំលែកព័តមាននេះ