ខេត្តកណ្ដាល ៖ បុរសម្នាក់ជាអ្នកជួញដូរគ្រឿងញៀន និងបុរសម្នាក់ទៀតបានទៅទិញថ្នាំញៀនដើម្បីប្រើប្រាស់ ត្រូវបានកម្លាំងនគរបាលស្រុកអង្គស្នួសរួមជាមួយនគរបាលប៉ុស្ដិ៍បែកចានធ្វើការចាប់ខ្លួន និងដកហូតបានគ្រឿងញៀនចំនួន៨កញ្ចប់ ព្រមទាំងឧបករណ៍សម្រាប់ប្រើប្រាស់ថ្នាំញៀនមួយចំនួនទៀតផងដែរ។ ហេតុការណ៍នេះបានកើតឡើងកាលពីវេលាម៉ោង៨និង៣០នាទីយប់ថ្ងៃទី១ ខែកក្តដា ឆ្នាំ២០១៨ នៅក្នុងភូមិស្វាយជ្រុំ ឃុំបែកចានស្រុកអង្គស្នួល ខេត្តកណ្តាល។ ជនសង្ស័យទាំង២នាក់ខាងលើដែលត្រូវសមត្ថកិច្ចចាប់ឃាត់ខ្លួនរួមមាន ៈ ជនសង្ស័យម្នាក់ជាអ្នកជួញដូរថ្នាំញៀនឈ្មោះ ឃិន ក្រឹម អាយុ២៧ឆ្នាំ មុខរបរសន្តិសុខយាមរោងចក្រ ស្នាក់នៅក្នុងភូមិស្វាយជ្រុំ ឃុំបែកចាន ស្រុកអង្គស្នួល ខេត្តកណ្តាល ចំណែកជនសង្ស័យម្នាក់ទៀតជាអ្នកទិញថ្នាំញៀនយកទៅប្រើប្រាស់ឈ្មោះ ទូច សុខន អាយុ២៥ឆ្នាំ មុខរបរសន្តិសុខយាមរោងចក្រ ស្នាក់នៅភូមិកើតហេតុជាមួយគ្នាដែរ។ ក្នុងពេលធ្វើការចាប់ខ្លួនជនសង្ស័យទាំង២នាក់នោះ កម្លាំងនគរបាលដកហូតបានគ្រឿងញៀនចំនួន៨កញ្ចប់ ក្នុងនោះមានកញ្ចប់តូចចំនួន៧កញ្ចប់ និងកញ្ចប់ធំចំនួន១កញ្ចប់, ទូរស័ព្ទដៃម៉ាកសាំសុង១គ្រឿង, កាបូបដៃដាក់ថ្នាំញៀន១ ។ នគរបាលបានឲ្យដឹងថា នៅមុនពេលឈានដល់ការចាប់ខ្លួនជនសង្ស័យទាំង២នាក់ខាងលើ កម្លាំងនគរបាលប៉ុស្តិ៍រដ្ឋបាលបែកចានបានទទួលព័ត៌មានពីមហាជនថា មានជនសង្ស័យកំពុងធ្វើសកម្មភាពជួញដូរថ្នាំញៀននៅត្រង់ចំណុចខាងលើ ។ ពេលនោះកម្លាំងនគរបាលប៉ុស្តិ៍រដ្ឋបាលបែកចានបានសហការជាមួយកម្លាំងនគរបាលស្រុកអង្គស្នួលបានចុះទៅកាន់កន្លែងកើតហេតុនោះភ្លាមៗផងដែរ ហើយបានឃាត់ខ្លួនជនសង្ស័យទាំង២នាក់ ពេលដែលពួកគេកំពុងនៅក្នុងបន្ទប់ជួលជាមួយគ្នា។ ប្រភពដដែលបានបន្តថា បន្ទាប់មកកម្លាំងនគរបាលបានធ្វើការត្រួតពិនិត្យ និងឆែកឆេរបន្ទប់របស់ជនសង្ស័យឈ្មោះឃិន ក្រឹម និងបានរកឃើញថ្នាំញៀនចំនួន៨កញ្ចប់នៅក្នុងកាបូបដៃ ព្រមទាំងឧបករណ៍ និងសម្ភារៈពាក់ព័ន្ធមួយចំនួនទៀតផងដែរ ។ ក្រោយមកក៏បាននាំជនសង្ស័យទៅសាកសួរនៅប៉ុស្ដិ៍ ពេលនោះជនសង្ស័យឈ្មោះឃិន ក្រឹម បានសារភាពថា ថ្នាំញៀនទាំង៨កញ្ចប់នៅក្នុងកាបូបដៃនេះគឺជារបស់ខ្លួនដែលបានទិញពីមនុស្សប្រុសម្នាក់មិនស្គាល់អត្តសញ្ញាណនៅតាមផ្លូវម្ដុំតោពីរ រាជធានីភ្នំពេញ ដើម្បីយកមកលក់បន្ត ដោយទិញម្ដងៗក្នុងតំលៃ១៥ម៉ឺនរៀល ។ ចំណែកជនសង្សយ័ឈ្មោះទូច សុខន បានសារភាពថា ខ្លួនបានមកទិញថ្នាំញៀនពីឈ្មោះឃិន ក្រឹម ដើម្បីយកទៅប្រើប្រាស់ជាមួយមិត្តភក្តិ ហើយក៏ត្រូវនគរបាលឃាត់ខ្លួនតែម្តង។ ក្រោយពេលសាកសួររួច ជនសង្ស័យរួមនឹងវត្ថុតាងត្រូវបានបញ្ជូនមកអធិការដ្ឋាននគរបាលស្រុកអង្គស្នួល ដើម្បីចាត់ការតាមនីតិវិធី៕
ចែករំលែកព័តមាននេះ