រកបានពីរគ្រាប់តែម្នាក់ឯងក្នុងយុទ្ធនាការទម្លាក់ក្រុមពពកសអាហ្សង់ទីនវគ្គ១៦ក្រុមកាលពីយប់ថ្ងៃសៅរ៍សប្ដាហ៍កន្លងទៅនេះ កីឡាករឆ្នើមរបស់ក្រុមមាន់គកបារាំង Kylian Mbappe ទទួលបាននូវការចាប់អារម្មណ៍ពីមហាជនគ្រប់ទិសទី ។
ខ្សែប្រយុទ្ធវ័យ១៩ឆ្នាំរូបនេះ បានទាត់បញ្ចូលទីគូប្រកួតនៅនាទីទី៦៤ និង៦៨ក្រោយបំបែករបាំងការពារក្រុមអាហ្សង់ទីនបានសម្រេចធ្វើឱ្យអ្នកគាំទ្ររីករាយយ៉ាងខ្លាំងរហូតចង់ដឹងពីប្រវត្តិរបស់គាត់ទៀតផង ។ តើ Kylian Mbappe មានប្រវត្តិយ៉ាងណាដែរ?
*កើតចេញពីឈាមជ័រអ្នកកីឡា
Mbappe គឺជាកូនប្រុសទីពីរក្នុងគ្រួសារមានសមាជិក៥នាក់ដែលមានឪពុកឈ្មោះ Wilfried គឺជាគ្រូបង្វឹក និងជាទីភ្នាក់ងារផ្ទាល់របស់គេ រីឯម្តាយឈ្មោះ Fayza គឺជាអតីតកីឡាការិនី
បាល់គប់ (Handball) ។ បងប្រុសចិញ្ចឹមរបស់ Mbappe គឺ Jirès Kembo Ekoko ជាកីឡាករបាល់ទាត់អាជីពនៅក្លិបតួកគីមួយ ។
-បង្ហាញមុខឱ្យក្រុមជម្រើសជាតិឈុតធំបារាំងដំបូងកាលពីខែមីនា ឆ្នាំ២០១៧ ក្រោយចេញពីក្រុមយុវជនអាយុក្រោម១៩ឆ្នាំ និង១៦ ឆ្នាំ ។
-Mbappe មានក្ដីស្រមៃតាំងពីតូចថា រូបគេអាចក្លាយជាតារាបាល់ទាត់ល្បីដូច Cristiano Ronaldo ។
*ទម្រង់លេងល្អដូចតារាមុនៗ
អតីតអ្នកចាត់ការក្លិប Arsenal លោក Arsene Wenger បានចាត់ទុក Mbappe ដូចកីឡាករ Thierry Heny, Nicolas Anelka និងវីរបុរសប្រេស៊ីលកីឡាករ Ronaldo ។
*កំពុងបញ្ចេញរស្មីនៅWorld Cup ២០១៨
បន្ទាប់ពីរកបាន១គ្រាប់ក្នុងការប្រកួតជម្រុះក្នុងពូលជុំទី២ជាមួយក្រុមប៉េរូ Mbappe បានក្លាយជា«កីឡាករក្មេងបំផុតរបស់បារាំងដែលរកគ្រាប់បាល់នៅ World Cup» និងជាកីឡាករទីពីរបន្ទាប់ពី Pepe នៅឆ្នាំ១៩៥៨ រកបានពីរគ្រាប់ម្នាក់ឯងក្នុងការប្រកួត World Cup ១ប្រកួត ។
*គ្រាប់ពូជថ្មីដុះលើដីបារាំង
ក្លិបអ្នកមានបារាំង Paris SG បានទិញ Mbappe ពី Monaco លើកុងត្រាផ្តាច់ជាង២០០លានដុល្លារធ្វើឱ្យរូបគេក្លាយជាកីឡាករជំទង់ថ្លៃជាងគេក្នុងប្រវត្តិសាស្ត្រនិងជាកីឡាករថ្លៃជាងគេលំដាប់ទីពីរបន្ទាប់ពីNeymar ។ តាំងពីជ្រកកោនក្រោមដំបូល Paris SG កីឡាករ Mbappe រកបាន១៣គ្រាប់ក្នុងការប្រកួតសរុប២៧លើក ៕
ចែករំលែកព័តមាននេះ