ខេត្តព្រៃវែង ៖ កាលពីរសៀលថ្ងៃទី១៣ មករា នៅក្នុងបរិវេណវត្តផែកំពក បានរៀបចំពិធីចែកធុងដាក់គ្រាប់ពូជក្រោយពេលប្រមូលផលស្រូវជូនប្រជាកសិករចំនួន២ឃុំ គឺឃុំផែកំពក និងឃុំល្វារួមបញ្ចូលគ្នាមាន៦ភូមិស្មើនឹង៣៨០គ្រួសារ ដោយក្នុង១គ្រួសារទទួលបានធុង១ចំណុះ១២០គីឡូក្រាម ។ អង្គការស្បៀង និងកសិកម្មនៃសហប្រជាជាតិ(FAO)ផ្តល់មូលនិធិដោយកម្មវិធីស្បៀងអាហាររបស់សហភាពអឺរ៉ុប (EuFood Facili ty) គំរោងបង្កើនសន្តិសុខស្បៀងសំរាប់គ្រួសារកសិករដែលរងឥទ្ធិពលដោយសារការឡើងថ្លៃស្បៀងអាហារ កម្មវិធីនេះរៀបចំឡើងដោយអង្គការ ABK និងមន្ទីរកសិកម្មខេត្តព្រៃវែង ។
លោកពេជ្រ រម្យនា ប្រធានសំរបសំរួលគំរោងភាគខាងត្បូង និងជាអនុប្រធាននាយកដ្ឋានដំណាំស្រូវនៃអគ្គនាយកដ្ឋានកសិកម្ម និងលោកយស មុន្នី ប្រធានមន្ទីរកសិកម្មខេត្ត លោកអ៊ាន រ៉ូសែល ទីប្រឹក្សាអភិវឌ្ឍន៍គំរោងកម្មវិធីស្បៀងអាហារសហភាពអឺរ៉ុប ព្រមទាំងមន្ត្រីកសិកម្មស្រុក និងខេត្ត បុគ្គលិករបស់អង្គការជាច្រើនរូបបានចូលរួមក្នុងពិធីនេះ ។ លោកបណ្ឌិតអ៊ាន រ៉ូសែល ទីប្រឹក្សាគំរោងបានបញ្ជាក់ថា នេះជាលើកទី៦ហើយដែលអង្គការស្បៀងអាហាររបស់សហភាពអឺរ៉ុបសហការជាមួយរាជរដ្ឋាភិបាលក៏ដូចជាមន្ទីរកសិកម្មខេត្ត ស្រុក-ឃុំរៀបចំគំរោងបង្កើនសន្តិសុខស្បៀងសំរាប់គ្រួសារកសិករដែលរងឥទ្ធិពលដោយសារការឡើងថ្លៃស្បៀងអាហារ ។ លោកបានណែនាំដល់ប្រជាកសិករឱ្យចេះជ្រើសរើសគ្រាប់ពូជស្រូវ បន្លែ និងអំពីវិធីសាស្ត្រសំរាប់ទុកដាក់គ្រាប់ពូជ ស្រូវ និងបន្លែងឱ្យបានត្រឹមត្រូវចៀសវាងការជ្រើសរើសគ្រាប់ពូជខុស ហើយមិនចេះទុកដាក់ត្រឹមត្រូវ ។
លោកយស មុន្នី ប្រធានមន្ទីរកសិកម្មខេត្តមានប្រសាសន៍ថា ដើម្បីកាត់បន្ថយភាពក្រីក្ររបស់ប្រជាពលរដ្ឋ រាជរដ្ឋាភិបាលក៏ដូចជាអង្គការនានាជាដៃគូបាននិងកំពុងសហការគ្នាដើម្បីស្តារ និងអភិវឌ្ឍលើគ្រប់វិស័យ ពិសេសគឺវិស័យកសិកម្មឱ្យមានការរីកចំរើនដូចប្រទេសជិតខាងយើង ។ លោកបន្តថា កន្លងមកប្រជាកសិករបានទទួលស្រូវពូជ ជី ពូជបន្លែ ប៉ោតទឹកស្រោចដំណាំ បន្ទាប់មកទៀតទទួលបានតង់១ ក្នុង១គ្រួសារដើម្បីទុកហាលគ្រាប់ស្រូវពូជឱ្យបានល្អ ទុកដាក់ឱ្យបានស្រួល ហើយឥឡូវទទួលបានធុងសំរាប់ដាក់គ្រាប់ពូជស្រូវទៀត នេះហើយដែលហៅថា ការកាត់បន្ថយភាពក្រីក្រ គឺកសិករមិនចាំបាច់ទិញសំភារទាំងនេះទេ ធ្វើយ៉ាងណាឱ្យតែចេះសហការគ្នាធ្វើការងារកសិកម្ម ខំធ្វើស្រូវឱ្យបានច្រើន នោះយើងនឹងរីកចំរើនទាំងអស់គ្នា ៕
ចែករំលែកព័តមាននេះ