រាជធានីភ្នំពេញ ៖ នៅទីបំផុតកម្ពុជាបានសម្រេចបាននូវការបំបែកឯតទគ្គកម្មក្រមាវែងជាងគេនៅលើពិភពលោក ដែលទទួលស្គាល់ស្ថាប័ន Guinness world Records ដែលធ្វើឲ្យមហាគ្រួសារខ្មែរពិតជាមានមោទនភាពក្រៃលែង ។
ពិធីវាស់វែង និងពិនិត្យសម្រេចទទួលស្គាល់ពីស្ថាប័នខាងលើនេះ បានធ្វើឡើងយ៉ាងអធិកអធម នៅថ្ងៃទី១ ខែកក្កដា ឆ្នាំ២០១៨ នៅសាលពិព័រណ៍កោះពេជ្រ ក្រោមការចូលរួមពីប្រជាពលរដ្ឋ និងយុវជនស្ម័គ្រចិត្តប្រមាណជាង ២ម៉ឺននាក់។
តំណាងភ្នាក់ងារ Guinness World Records បានអះអាងថា ក្រមានេះធ្វើឡើងដោយមានគុណភាពត្រឹមត្រូវ និងមានប្រវែងលើសពី១ពាន់ម៉ែត្រ ស្របតាមអ្វីដែល Guinness World Records បានកំណត់។
ប្រធានសហភាពសហព័ន្ធយុវជនកម្ពុជា លោក ហ៊ុន ម៉ានី បានអះអាងថា៖ «ថ្ងៃនេះយើងទាំងអស់គ្នាសប្បាយរីករាយ និងមានមោនភាពយ៉ាងខ្លាំង ដោយយើងសម្រេចបានការត្បាញក្រមាវែងជាងគេលើពិភពលោក ដោយឈរលើទស្សនៈខ្មែរធ្វើបាន»។
លោក ហ៊ុន ម៉ានី ដែលជាតំណាងរាស្ត្រវ័យក្មេងជាងគេមកពីគណបក្សប្រជាជនកម្ពុជា មានប្រសាសន៍បញ្ជាក់ថា អ្វីដែលយើងសម្រេចបានក្នុងរយៈពេលជាង៥ខែនេះ គឺលើសពីក្រមាវែងជាងគេ ដោយហេតុថា ក្រមាមួយសរសៃៗនេះមានអ្នកចូលរួមច្រើនគាំទ្រមិនក្រោម៣០ម៉ឺននាក់នោះឡើយ ដែលទាំងអស់នេះគឺជាឆន្ទៈក្នុងការចូលរួមគាំទ្រស្នាដៃដែលជាអត្តសញ្ញាណខ្មែរយើង គឺក្រមានេះតែម្តង ដើម្បីឱ្យពិភពលោកបានស្គាល់។
ក្រុមហ៊ុនខ្មែរ ប៊ែវើរីជីស ដែលជាអ្នកឧបត្ថម្ភធំក្នុងការរៀបចំព្រឹត្តិការណ៍បំបែកឯតទគ្គកម្មពិភពលោក ក្រមាវែងជាងគេលើពិភពលោកនេះ បានបង្ហាញនូវសេចក្តីសប្បាយរីករាយ និងមោទនភាពដែលអាចចូលរួមឧបត្ថម្ភដល់កម្មវិធីត្បាញក្រមា រហូតសម្រេចបាននូវស្នាដៃដ៏ត្រចះត្រង់នាថ្ងៃនេះ ។
សូមបញ្ជាក់ថា ក្រុមហ៊ុន ប៊ែវើរីជីស (Khmer Beverages Co., Ltd) ដែលជាក្រុមហ៊ុនដែលវិនិយោគដោយកូនខ្មែរ ១០០ ភាគរយ ដែលសព្វថ្ងៃនេះគឺក្រុមហ៊ុនមានផលិតនូវផលិតផលមួយចំនួនដូចជា ស្រាបៀកម្ពុជា ស្រាបៀរស្តោត Barrley Black ស្រាបៀរគូដូ ភេសជ្ជៈអាយស៍ ភេសជ្ជៈប៉ូវកម្លាំងវើក (WURKZ) ទឹកផ្លែឈើជូប (joop) និងទឹកសុទ្ធកម្ពុជា ជាដើម ៕
ចែករំលែកព័តមាននេះ