ខេត្តស្វាយរៀង ៖ មានរថយន្តយីឌុបធុនយក្ស០៥គ្រឿងបើកឆ្លងដែនពេលយប់សមត្ថកិច្ចសង្ស័យថា ដឹកឈើប្រណីតស្ទាក់ចាប់បាន០២គ្រឿង ឆែករកឃើញបង្កប់ស្រាHennessy និងXO គេចពន្ធរាប់សិបកេះ។ បើតាមមន្ត្រីនគរបាលការិយាល័យប្រឆាំងបទល្មើសសេដ្ឋកិច្ចស្នងការដ្ឋាន នគបាលខេត្ត បានឲ្យដឹងថា កាលពីវេលាម៉ោង១០ និង៣០នាទីយប់ ថ្ងៃទី២៨ មិថុនា ២០១៨ មានប្រជាពលរដ្ឋរាយការណ៍ថា មានរថយន្តយីឌុប០៥គ្រឿងផ្ទុកទំនិញពេញគ្របជិតសង្ស័យថា ដឹកឈើប្រណីតឆ្លងដែនទៅប្រទេសវៀតណាម។
ក្រោយពីបានព័ត៌មាននេះភ្លាមសមត្ថកិច្ចការិយាល័យ ប្រឆាំងបទល្មើសស្នងការដ្ឋាននគបាលខេត្តស្វាយរៀងបានស្ទាក់ឃាត់រថយន្តបាន០២គ្រឿង នៅវេលាម៉ោង១១ និង១០នាទីយប់ គឺ១គ្រឿងស្ទាក់បាននៅចំណុចជិតវត្តចេកវ៉ា ឃុំបន្ទាយក្រាំង ស្រុកកំពង់រោទិ៍ សម្របសម្រួលដោយលោក គង់ ចន្ទ័ខេមរិទ្ធ ព្រះរាជអាជ្ញាអមសាលាដំបូង ខេត្តស្វាយរៀង ធ្វើការឆែកឆេរកវត្ថុតាង ឈើប្រណីតក៏ប៉ុន្តែការឆែកឆេរនោះរកពុំឃើញមានឈើប្រណីតទេ មានតែទំនិញ គ្រឿងអេឡិចត្រូនិចជជុះ ដូចជា ម៉ាស៊ីនត្រជាក់ ទូទឹកកក កង្ហារ លែនកាមេរ៉ា លោកព្រះរាជអាជ្ញា ក៏មិនឃាត់រថយន្តទេ អនុញ្ញាតឲ្យបន្តទៅកាន់ព្រំដែន។
រីឯរថយន្តយីឌុប មួយគ្រឿងទៀតដោយយប់ជ្រៅ ម៉ោង១ និង១០នាទី រំលងអាធ្រាតឈានចូលថ្ងៃទី២៩ មិថុនា ក៏ឃាត់រថយន្តពាក់ស្លាកលេខ ភ្នំពេញ 3A-6237 យកមកការិយាល័យប្រឆាំងបទល្មើស សេដ្ឋកិច្ចស្នងការដ្ឋាននគបាលខេត្តធ្វើការឆែកឆេរ នៅវេលាម៉ោង១០ និង១០នាទីព្រឹក សម្រមសម្រួលដោយលោក គង់ ចន្ទ័ខេមរិទ្ធ ព្រះរាជអាជ្ញាអមសាលាដំបូងខេត្ត ចូលរួមដោយមន្ត្រីគយ និងរដ្ឋករខេត្ត នគរបាលសេដ្ឋកិច្ច រកឃើញទំនិញគេចពន្ធ បង្កប់ក្នុងគ្រឿងអេឡិចត្រូនិច រួមមានស្រា Hennessy, XOដបធំ ដបវែង រាប់សិបកេះ និងមានកង្ហារ ទូទឹកកក ម៉ាស៊ីនត្រជាក់ ចង្ក្រានហ្គាស់ កាតាប ស្បែកជើង ខោអាវ គ្រឿងកាឡៃ ចាន សម្បកបារី និងអីវ៉ាន់ចាប់ហួយជាច្រើនមុខទៀត។
គឺរកមិនឃើញមានឈើប្រណីតឡើយ។ ហើយទាក់ទិនទំនិញគេចពន្ធស្រា Hennessy ,xo នេះមន្ត្រីសាខាគយ និងរដ្ឋករខេត្តបានមានប្រសាសន៍ថា រហូតមកដល់ម៉ោង៣ និង៣០នាទីរសៀល ថ្ងៃ២៩ មិថុនានេះ រើឆែកពិនិត្យមិនទាន់ហើយរួចរាល់មិនដឹងថាមានទំនិញគេចពន្ធប៉ុន្មានទេ ដូច្នេះមិនអាចបំភ្លឺបានទេ។ ចំពោះទំនិញនាំចេញ លោកត្រូវពិនិត្យឯកសារ បើមិនទាន់បង់ពន្ធគឺបង់ពន្ធតែប៉ុណ្ណោះ គ្មានទំនិញហាមឃាត់ទេ ហើយគ្រឿងអេឡេចត្រូនិចជជុះនាំចេញមិនបង់ពន្ធទេ។ ក៏ប៉ុន្តែមហាជននៅតែដាក់ចម្ងល់ថា ចាប់ឃាត់រថយន្តបានតែ២គ្រឿងឯ៣គ្រឿងទៀតបានបើកចូលទៅប្រទេសវៀតណាមបាត់ស្រមោលតាមច្រករបៀងទាំងយប់បើទំនិញស្របច្បាប់ហេតុអី បានជាធ្វើចរាចរណ៍នៅពេលយប់អាធ្រាត្របែបនេះ?
ឆែកពេលថ្ងៃបែកធ្លាយ បង្កប់ស្រាថ្លៃ ក្នុង១ដបតម្លៃចាប់ពី១២០ដុល្លារ ទៅជាង២០០ដុល្លារឯណោះ តើរថយន្ត៤គ្រឿងដែលចេញទៅប្រទេសវៀតណាមពេលយប់នោះមានបង្កប់ទំនិញគេចពន្ធប៉ុន្មានទៅ ហើយឈ្មួញ ដែលជាម្ចាស់ទំនិញនេះ គេបង្ហើបថា ឈ្មោះ យាយណាំ ជនជាតិវៀតណាមមានប្តីខ្មែរ រកស៊ីជាង២០ឆ្នាំមកហើយមិនដែលមានសមត្ថកិច្ចណាចាប់ឃាត់ពិនិត្យទេ ទើបធ្លាយរឿងដាក់ការសង្ស័យ ថាមានដឹកឈើប្រណីតឆ្លងដែន ទើបសមត្ថកិច្ចដាក់កម្លាំងស្ទាក់ចាប់ ទើបបែកធ្លាយរឿងបង្កប់ទំនិញគេចពន្ធ ហើយសមត្ថកិច្ចតាមច្រករបៀងអ្នកបើកដៃឲ្យឈ្មួញលោតឆត្រ័ ពេលយប់៕
ចែករំលែកព័តមាននេះ