ប្រសិនបើក្រុមជម្រើសជាតិបារាំង មិនបានបញ្ចប់ដោយឈរលេខ១ក្នុងពូលC ពីលើក្រុមដាណឺម៉ាកទេ ពួកគេនឹងត្រូវប៉ះជាមួយក្រុមក្រូអាស៊ី ក្នុងវគ្គ១៦ក្រុមចុងក្រោយជំនួសឱ្យការជួបជាមួយក្រុមអាហ្សង់ទីននៅពេលនេះមិនខាន ។ ការប្រកួតនៅក្នុងវគ្គនេះត្រូវបានអ្នកជំនាញព្យាករថា នឹងកាន់តែស្វិតស្វាញជាងមុន ទោះបីក្រុមដែលមានរហស្សនាមថា«មាន់គក»បារាំងបានបង្ហាញទម្រង់លេងយ៉ាងរឹងមាំក្នុងយុទ្ធនាការនេះបើធៀបទៅនឹងក្រុមដែលមានរហស្សនាមថា«ពពកស»អាហ្សង់ទីនក៏ដោយ។
ការជួបគ្នារវាងក្រុមស្ថិតក្នុងចំណាត់ថ្នាក់លេខ៧ និងលេខ៥ពិភពលោកយោងតាមតារាងចំណាត់ថ្នាក់ក្រុមបាល់ទាត់របស់ FIFA ក្រុមជម្រើសជាតិបារាំង នឹងសម្លឹងរកជ័យជម្នះជាលើកទី៣នៅពេលប្រកួតជាមួយក្រុមជម្រើសជាតិអាហ្សង់ទីនលើកនេះ ។ ទោះបីបារាំង មានកំណត់ត្រាដ៏អន់ក្នុងជំនួប៤លើករវាងក្រុមទាំង២ក្នុងនោះមាន២លើកចុងក្រោយរកមិនបានសូម្បីតែ១គ្រាប់ ក៏បារាំងមានសង្ឃឹមឈ្នះច្រើនដែរក្រោយពីអាហ្សង់ទីន បានឆ្លងផុតវគ្គចែកពូលទាំងត្រដាបត្រដួស ។ ក្រុមជម្រើសជាតិអាហ្សង់ទីន បានជួបភាពត្រដាបត្រដួសក្នុងពូល D ហើយប្រសិនបើពួកគេលេងមិនបានល្អទេនោះ ពួកគេនឹងស្ថិតក្នុងវគ្គ១៦ក្រុមចុងក្រោយត្រឹមតែបង្គ្រប់កិច្ចប៉ុណ្ណោះ។
លោក Jorge Sampaoli ដែលជាគ្រូបង្វឹក ត្រូវតែស្វែងរកយុទ្ធសាស្ត្រប្រកួតឱ្យបានល្អជាងមុន ខណៈដែលមកទល់ពេលនេះ ខ្សែប្រយុទ្ធ Kun Agüero និង Gonzalo Higuain ហាក់ដូចជាកំពុងតែធ្លាក់ចុះទម្រង់លេង រីឯMessi ក៏ធ្វើមិនសូវបានល្អទៀត ។ ប៉ុន្តែជាមួយនឹងការមានរូបគេធ្វើឱ្យអាហ្សង់ទីនអាចយកឈ្នះនីហ្សេរីយ៉ា ក្នុងជុំចុងក្រោយនៃវគ្គជម្រុះក្នុងពូលផងដែរ។
ក្រុមជម្រើសជាតិបារាំង ក៏មិនបានបង្ហាញពីទម្រង់លេងគួរឲ្យចាប់អារម្មណ៍ប៉ុន្មានដែរទេ ប៉ុន្តែពួកគេបានជួបលទ្ធផលល្អប្រសើរជាង ហើយវាក៏ហាក់បង្ហាញថា ក្រុមរបស់លោក Didier Deschamps អាចធ្វើបានល្អប្រសើរជាងក្រុមអាហ្សង់ទីន ។ តំបន់ការពាររបស់ពួកគេពិតជា
ស្ថិតក្នុងភាពរឹងមាំមកទល់ពេលនេះ ជាក់ស្ដែងពួកគេបានរបូតគ្រាប់បាល់តែ១គ្រាប់គត់ ដោយបាល់ប៉េណាល់ទី ហើយប្រសិនបើពួកគេនៅតែការពារបានល្អ នោះបារាំង នឹងក្លាយជាក្រុមខ្លាំងមួយដែលពិបាកបញ្ឈប់មិនខាន ។ ពួកគេចាញ់តែ២លើកគត់ក្នុងការប្រកួត World Cup ៩លើកចុងក្រោយ តាមរយៈការពារមិនឲ្យមានគ្រាប់បាល់ចូលទីរបស់ខ្លួន៤លើកដែលជាកំណត់ត្រាដ៏ល្អបំផុតក្នុងចំណោមក្រុមនៅ World Cup រុស្ស៊ី ។
ក្រុមជម្រើសជាតិអាហ្សង់ទីន បានជួបភាពត្រដាបត្រដួសក្នុងការស្វែងរកអ្នកចាំទីដ៏ល្អម្នាក់ ចាប់តាំងពី Sergio Romero បានអវត្តមានពីយុទ្ធនាការនេះដោយសារតែបញ្ហារបួសជង្គង់ ហេតុនេះវាពិតជាលំបាកណាស់សម្រាប់លោក Sampaoli ក្នុងការស្វែងរកដំណោះស្រាយ។
យ៉ាងណាក៏ដោយអាហ្សង់ទីននឹងមិនបោះបង់ឱកាសនេះដោយងាយឡើយ ទោះបីការប្រកួត
ឈានដល់វគ្គកាន់តែស្វិតស្វាញជាងមុនក្ដី ។ ប៉ុន្តែជាមួយគ្នានេះ ពួកគេនឹងជួបការលំបាកក្នុងការរារាំងបារាំងមិនខាន សូម្បីតែ Messi ក៏លេងមិនបានល្អធ្វើឱ្យមានការព្យាករថា ការរីករាយក្នុងការឆ្លងផុតវគ្គចែកពូល អាចនឹងបន្តដល់ត្រឹមតែថ្ងៃសៅរ៍នេះប៉ុណ្ណោះសម្រាប់ក្រុមអាហ្សង់ទីន។
ផ្អែកតាមសមត្ថភាពកីឡាករនាពេលបច្ចុប្បន្ន និងបទពិសោធន៍ប្រកួតនៅព្រឹត្តិការណ៍ធំៗនាពេលកន្លងមក ទោះបីក្រុមបារាំងមានប្រវត្តិមិនល្អទាល់តែសោះពេលជួបក្រុអាហ្សង់ទីន ក៏គេហទំព័រទស្សន៍ទាយកីឡាបានទាយថា ក្រុមមាន់គកនឹងយកឈ្នះគូប្រកួតក្នុងជំនួបជាមួយក្រុមពពក.សនាវេលាម៉ោង៩យប់នេះមិនខាន ៕
ចែករំលែកព័តមាននេះ