ខេត្តប៉ៃលិន ៖ ស្ត្រីម្នាក់ដែលជាប្រពន្ធចុងរងរបួសពកថ្ងាស និងជាំពេញខ្លួនដោយសារតែប្តី និងកូនចុងព្រួតគ្នាវាយ ខណៈមកពីធ្វើការវិញអត់ឃើញដាំបាយធ្វើម្ហូបចាំ បែរជាដើរផឹកស្រានៅតាមភូមិតាំងពីថ្ងៃរហូតដល់ល្ងាចលុះទ្រាំមិនបានក៏នាំគ្នាវាយរងរបួសត្រូវបានស្ត្រីជាប្រពន្ធចុងដាក់ពាក្យបណ្តឹងឱ្យចាប់ឃាត់ខ្លួនតែម្តង ។
ហេតុការណ៍ស្ត្រីម្នាក់ត្រូវប្តី និងកូនចុងវាយរងរបួសធ្ងន់នេះបានកើតឡើងកាលពីវេលាម៉ោង៥ និង១០នាទីល្ងាច ថ្ងៃទី២៥ ខែមិថុនា ឆ្នាំ២០១៨ ស្ថិតនៅក្នុងភូមិថ្នល់បត់ ឃុំស្ទឹងត្រង់ ស្រុកសា លាក្រៅ ខេត្តប៉ៃលិន ។ លុះថ្ងៃបន្ទាប់ស្ត្រីរងគ្រោះបានទៅដាក់ពាក្យបណ្តឹងនៅអធិការដ្ឋានគរបាលស្រុកសាលាក្រៅ កាលពីវេលាម៉ោង៤និង៣០នាទីល្ងាច ថ្ងៃទី២៦ ខែមិថុនា ឆ្នាំ២០១៨ ។
ប្រភពព័ត៌មានពីលោក រី ដារ៉ា អធិការរងស្រុកសាលាក្រៅបានឱ្យដឹងថា ជនរងគ្រោះមាន ឈ្មោះ ជន ភៀង ភេទស្រី អាយុ៤៥ឆ្នាំ ជាកសិករ ។ ចំណែកជនសង្ស័យមានគ្នា២នាក់ជាឪពុកនឹងកូន(ត្រូវជាប្តី និងកូនចុងរបស់ស្ត្រីរងគ្រោះ) ទី១- ឈ្មោះ ភឿក សុន ភេទប្រុស អាយុ៤៧ឆ្នាំ ជាប្ដីចុង និងទី២ – ឈ្មោះ សុន សរ ភេទប្រុស អាយុ១៥ឆ្នាំ ត្រូវជាកូនចុង អ្នកទាំង៣នាក់រស់នៅភូមិឃុំកើតហេតុខាងលើ ។ ជនសង្ស័យទាំងពីរបានយកខ្សែភ្លើង និងអង្រែបុកគ្រឿងមកវាយទៅលើជនរងគ្រោះបណ្ដាលឲ្យរបួសធ្ងន់ ។
លោក រី ដារ៉ា បានបន្តទៀតថា ស្ត្រីរងគ្រោះខាងលើបានប្តីមុនអត់មានកូននោះទេដោយសារតែអត់កូនក៏ត្រូវប្តីលែងចោល ហើយស្របពេលដែលបុរសខាងលើត្រូវប្រពន្ធស្លាប់ចោលជាយូរមកហើយ ស្នាក់នៅផ្ទះតែពីរនាក់កូនប្រុសទើបហៅចាស់ទុំក្នុងភូមិឱ្យផ្សំផ្គុំសែនព្រេន១ព្រឹក ក្លាយទៅជាប្តីប្រពន្ធ រួមរស់នៅជាមួយគ្នា ។ លោកបញ្ជាក់ទៀតថា ជារៀងរាល់ថ្ងៃស្ត្រីខាងលើអត់សូវយកចិត្តទុកដាក់មើលផ្ទះសម្បែងចង្ក្រានជើងឆ្នាំងនោះទេ ដោយគាត់ញៀននឹងស្រា ហើយក៏ដើរផឹកតាំងពីព្រឹករហូតដល់ពេលល្ងាចទើបត្រឡប់មកផ្ទះវិញ ដោយប្តីមកពីធ្វើការនាំកូនដាំបាយហូបខ្លួនឯងក៏មានដែរ ។ ប៉ុន្តែនៅល្ងាចថ្ងៃកើតហេតុស្ត្រីខាងលើមិននៅផ្ទះទេ ដោយជាប់រវល់ដើរផឹកស្រានៅផ្ទះគេលុះប្តី និងកូនមកពីចម្ការវិញហេវបាយខ្លាំងក៏ស្តីបន្ទោសប្រពន្ធរបស់ខ្លួនស្រាប់តែគាត់ស្រែកជេរបញ្ចោរ លុះទ្រាំមិនបានក៏ទាញយកអង្រែបុកគ្រឿងវាយទៅលើស្ត្រីរងគ្រោះត្រូវខ្លួន និងថ្ងាសបណ្តាលឱ្យរងរបួសធ្ងន់ធ្ងររហូតដល់រសៀលថ្ងៃបន្ទាប់ គាត់បានងើបពីឈឺរួចក៏ដាក់ពាក្យបណ្តឹងទៅខាងអធិការនគរបាលស្រុកសាលាក្រៅ ដើម្បីឱ្យកម្លាំងសមត្ថកិច្ចចុះទៅជួយអន្តរាគមន៍ភ្លាមៗតែម្តង ។
ពាក់ព័ន្ធនឹងបញ្ហានេះបច្ចប្បន្នជនសង្ស័យទាំងពីរនាក់ឪពុកកូនត្រូវបានឃាត់ខ្លួននៅអធិការដ្ឋាននគរបាលស្រុកសាលាក្រៅ ដើម្បីកសាងសុំណុំរឿងបញ្ជូនទៅតុលាការឱ្យចាត់ការទៅតាមនីតិវិធី ។
សូមបញ្ជាក់ផងដែរថា ក្នុងក្រុមគ្រួសារមួយបើមានប្តី ឬប្រពន្ធញៀននឹងស្រា ឬល្បែងស៊ីសង ហើយការរួមរស់នៅជាមួយគ្នាពិតជាមិនមានសុភមង្គលនោះទេពោល គឺតែងតែរកាំរកុសជានិច្ច ។ ដូច្នេះបើចង់ឱ្យក្រុមគ្រួសារមានសេចក្តីសុខសាន្តយូរអង្វែងមានតែលះបង់អំពើពាលាទាំងនោះចោល ហើយខិតខំប្រឹងប្រែងធ្វើការ ដើម្បីអនាគតខ្លួនឯង និងកូនចៅជំជាន់ក្រោយផងដែរ ៕
ចែករំលែកព័តមាននេះ