ខេត្តកំពង់ចាម ៖ នារសៀលថ្ងៃទី២៥ ខែមិថុនា ឆ្នាំ២០១៨ អំណោយដ៏ថ្លៃថ្លារបស់សម្តេចអគ្គមហាសេនាបតីតេជោ ហ៊ុន សែន និងសម្តេចកិត្តិព្រឹទ្ធបណ្ឌិតតាមរយៈលោក ហ៊ុន ម៉ាណែត រួមមានកុំព្យូទ័រយួរដៃ០២គ្រឿង ម៉ាស៊ីនព្រីនធឺ០២គ្រឿងបានប្រគល់ជូនរដ្ឋបាលឃុំអារក្សត្នោត កុំព្យូទ័រយួរដៃចំនួន២គ្រឿង និងកុំព្យូទ័រលើតុចំនួន០២គ្រឿង ម៉ាស៊ីនព្រីនធឺ០២គ្រឿងដែលជាអំណោយ ចុះជួយស្រុកស្ទឹងត្រង់ត្រូវបានប្រគល់ជូនការិយាល័យអប់រំស្រុកស្រុកស្ទឹងត្រង់ ខេត្តកំពង់ចាម ។
ពិធីនេះបានធ្វើឡើងនៅក្នុងទីតាំងសាលាឃុំអារក្សត្នោត ដែលមានការអញ្ជើញចូលរួមពីក្រុមជំនួយការលោក ហ៊ុន ម៉ាណែត លោកឧត្តមសេនីយ៍ត្រី សៅ សារឿន មេបញ្ជាការកងរាជអាវុធហត្ថខេត្តកំពង់ចាម តំណាងរដ្ឋបាលឃុំអរក្សត្នោត តំណាងការិយាល័យអប់រំស្រុកស្ទឹងត្រង់ និងផ្នែកដែលពាក់ព័ន្ធមួយចំនួនផងដែរ ។
តំណាងរដ្ឋបាលឃុំអរក្សត្នោតតំណាងការិយាល័យអប់រំស្រុកស្ទឹងត្រង់ សូមថ្លែងអំណរគុណយ៉ាងជ្រាលជ្រៅចំពោះសម្ដេចតេជោហ៊ុនសែន និងសម្ដេចកិតិ្តព្រឹទ្ធបណ្ឌិតតាមរយៈលោក ហ៊ុន ម៉ាណែត ដែលបានយកចិត្តទុកដាក់នៅក្នុងការគិតគូរពីសុខទុក្ខលោកគ្រូអ្នកគ្រូសិស្សានុសិស្ស និងតម្រូវការជាក់ស្តែងនៅក្នុងការអប់រំ និងការបម្រើសេវាសាធារណៈជូនប្រជាពលរដ្ឋនៅមូលដ្ឋាន ។
សូមរំលឹកថា អំណោយជាកុំព្យូរទ័រ និងម៉ាស៊ីនព្រីនធឺខាងលើនេះត្រូវបានលោក ហ៊ុន ម៉ាណែត ប្រកាសផ្តល់ជូនកាលពីថ្ងៃទី២០ ខែឧសភា ឆ្នាំ២០១៨ ក្នុងពិធីសម្ពោធដាក់ឲ្យប្រើប្រាស់ជាផ្លូវការអគារសិក្សាមួយខ្នងក្នុងសាលាបឋមសិក្សាអារក្សត្នោតដែលស្ថិតក្នុងឃុំអារក្សត្នោតស្រុកស្ទឹងត្រង់ ខេត្តកំពង់ចាមកន្លងទៅ ៕
ចែករំលែកព័តមាននេះ