ខេត្តបាត់ដំបង ៖ សេចក្តីរាយការណ៍ឱ្យដឹងថា មន្ត្រីរដ្ឋាករទឹកម្នាក់បានសម្រេចចង.កសម្លាប់ខ្លួន ដែលគេកំពុងសង្ស័យមានវិបត្តិក្នុងគ្រួសារ បង្កឱ្យក្រុមគ្រួសារមានការភ្ញាក់ផ្អើលជាខ្លាំង កាលពីវេលាម៉ោង០៦ និង៣០នាទីព្រឹកថ្ងៃទី២៦ មិថុនា នេះ ស្ថិតនៅក្នុងភូមិវត្តលៀប សង្កាត់ចំការសំរោង ក្រុងបាត់ដំបង ។
មន្ត្រីកងរាជអាវុធហត្ថបានឱ្យដឹងថា ជនរងគ្រោះឈ្មោះ សេង សៀង អាយុ៤១ឆ្នាំ ជាមន្ត្រីរដ្ឋាករទឹកខេត្តបាត់ដំបង និងមានទីលំនៅចំណុចកើតហេតុខាងលើ ។
សេចក្តីរាយការណ៍បន្តថា បុរសរូបនេះបានចង.កសម្លាប់ខ្លួននៅក្នុងរោងឈើមួយកន្លែងក្បែរផ្ទះ ដែលអាចធ្វើឡើងនៅវេលាទៀបភ្លឺ លុះព្រឹកឡើងទើបត្រូវក្រុមគ្រូសារប្រទះឃើញ ។ គេនៅមិនទាន់ដឹងអំពីមូលហេតុជាក់លាក់ ដែលនាំឲ្យបុរសរូបនេះសម្រេចបញ្ចប់ជីវិតខ្លួនឯងទេ តែទំនងមានវិបត្តិក្នុងគ្រួសារ ។ នេះបើតាមការបរិយាយរបស់សាច់ញាតិ ។
ប៉ុន្តែក្រុមគ្រួសារក៏មិនបានទម្លាយការពិតយ៉ាងណាប្រាប់សមត្ថកិច្ចដែរ គ្រាន់តែនិយាយថា ជនរងគ្រោះបានងើបរកទឹកផឹក នៅវេលារំលងអធ្រាត្រឈានចូលថ្ងៃទី២៦ មិថុនា តែគេមិនដឹងថា គាត់ដើរចេញទៅខាងក្រៅផ្ទះនោះទេ ។ ប្រភពដដែលប្រាប់សមត្ថកិច្ចថា នៅវេលាទៀបភ្លឺនោះ ពេលម្តាយងើបហាត់ប្រាណក៏ប្រទះឃើញកូន (ជនរងគ្រោះ) ចង.កនៅក្នុងរោងឈើស្លាប់បាត់ទៅហើយ ។
សមត្ថកិច្ចបានចុះទៅកាន់កន្លែងកើតហេតុទាំងព្រឹក ដើម្បីសាកសួរនិងពិនិត្យសពជនរងគ្រោះ ក្រោយពីទទូលបានព័ត៌មាននេះ។ សមត្ថកិច្ចបាននិយាយដែរថា ក្រុមគ្រួសារជនរងគ្រោះមិនបានបំភ្លឺលម្អិតបែបណាពាក់ព័ន្ធនឹងការធ្វើអត្តឃាតរបស់មន្ត្រីរដ្ឋាករទឹកខាងលើនេះទេ តែអាចមានបញ្ហានៅក្នុងគ្រួសារ ។ នេះបើតាមការបំភ្លឺខ្លះៗពីក្រុមគ្រួសារ ។ ទោះយ៉ាងណាមន្ត្រីមូលដ្ឋានបានប្រាប់ថា បើតាមការពិនិត្យជាក់ស្ដែងជនរងគ្រោះពិតជាបានធ្វើអត្តឃាតខ្លួនឯងដោយចង.កមែន ។
ចែករំលែកព័តមាននេះ