ខេត្តប៉ៃលិន ៖ បុរសម្នាក់រងរបួសជាំភ្នែកឆ្វេងផ្នែកខាងក្រោម បណ្តាលឱ្យឈឺចុកចាប់យ៉ាងខ្លាំង ខណៈអង្គុយផឹកស៊ីជួបជុំមិត្តភក្តិ៣នាក់នៅក្នុងផ្សារត្រីថ្មី លុះជជែកគ្នាចុះឡើងៗពីរឿងស្រីញី ស្រាប់តែជនដៃដល់ស្ទុះទៅដាល់ជាច្រើនដៃតែម្តង ហេតុការណ៍នេះបានកើតឡើង កាលពីម៉ោង៦និង៥០នាទី ថ្ងៃទី២៤ ខែមិថុនា ឆ្នាំ២០១៨ ស្ថិតនៅចំណុចផ្សារត្រីជាងអូន ក្នុងភូមិប៉ាហ៊ីជើង សង្កាត់ប៉ៃលិន ក្រុងប៉ៃលិន ។
ប្រភពព័ត៌មានបានឱ្យដឹងថា ជនរងគ្រោះឈ្មោះ ពៅ ហ៊ួរ ភេទប្រុស អាយុ២៩ឆ្នាំ រស់នៅភូមិអូរពឺត សង្កាត់ទួលល្វា ក្រុងប៉ៃលិន រងរបួសហើមក្រោមភ្នែកខាងឆ្វេង ចំណែកជនបង្កឈ្មោះ សុង សុហេង ភេទប្រុស អាយុ២៧ឆ្នាំ រស់នៅភូមិ-ឃុំកើតហេតុខាងលើ ។
ប្រភពបន្តទៀតថា មុនកើតហេតុ គេឃើញបុរស៣នាក់មិត្តភក្តិបបួលគ្នាទៅផឹកស៊ីនៅក្នុងតូបមួយក្នុងផ្សារត្រី លុះផឹកតាំងពីថ្ងៃរហូតដល់យប់ ស្រាប់តែប្រកែកគ្នាចុះឡើងៗពីរឿងស្រីញី ពេលនោះប្រហែលជនរងគ្រោះនិយាយប៉ះចុះស្រីរបស់ខ្លួន ទើបជនដៃអត់ទ្រាំមិនបានក៏ហក់ស្ទុះទៅដាល់ចំមុខពេញទំហឹងជាច្រើនដៃ បណ្តាលឱ្យផ្អើលដល់អ្នកចាំយាមនៅផ្សាររត់មកជួយចាប់ចេញតែម្តង ក្រោយមកជនរងគ្រោះប្តឹងទៅនគរបាលឱ្យចាប់ឃាត់ខ្លួនបុរសជាមិត្តភក្តិរបស់ខ្លួន ដើម្បីធ្វើការដោះស្រាយ ។
តាមប្រភពពីអ្នកនៅក្បែរកន្លែងកើតហេតុឱ្យដឹងថា គេធ្លាប់ឃើញញឹកញាប់ណាស់មកហើយ បុរសៗដែលនាំគ្នាផឹកស៊ីប្រកែកចុះឡើងៗរហូតដល់វាយដំទាត់ធាក់គ្នា អ្នកខ្លះទៀតទាស់ ពាក្យសម្តីគ្នារហូតកាប់ចាក់គ្នាស្លាប់ថែមទៀតផង ដូច្នេះបើឃើញនរណាម្នាក់ផឹកស៊ីហើយរក រឿងឈ្លោះ គួរឱ្យដកខ្លួនដើរចេញឱ្យឆ្ងាយ ហើយឈប់ផឹកស៊ីជាមួយទៅ បើពុំដូច្នោះទេនៅថ្ងៃណាមួយនឹងមានអំពើហិង្សាដូចករណីខាងលើជាក់ជាមិនខាន ៕
ចែករំលែកព័តមាននេះ