ខេត្តប៉ៃលិន ៖ នគរបាលបានធ្វើការបង្ក្រាបករណីប្រើប្រាស់ និងជួញដូរសារធាតុញៀនខុសច្បាប់មួយកន្លែងស្ថិតនៅក្បែរផ្ទះសំណាក់វ៉ានធី ក្នុងភូមិផ្សារព្រំ ឃុំស្ទឹងកាច់ ស្រុកសាលាក្រៅ ដោយចាប់បានសុទ្ធតែយុវជនវ័យក្មេងៗ ។ ហេតុការណ៍ចុះបង្ក្រាបនេះបានធ្វើឡើងកាលវេលាម៉ោង១១និង៣០ព្រឹក ថ្ងៃទី២៤ ខែមិថុនា ឆ្នាំ២០១៨ ។
ប្រភពព័ត៌មានពីនគរបាលបានឱ្យដឹងថា ការចុះបង្ក្រាបគ្រឿងញៀននេះឃាត់ខ្លួនយុវជនសង្ស័យប្រុសស្រីសុទ្ធតែក្មេងៗបានចំនួន០៤នាក់ទី១-ឈ្មោះ ស៊ឹម សេរីភាព ភេទប្រុស អាយុ២៤ឆ្នាំ មុខរបរមិនពិតប្រាកដ, ទី២-ឈ្មោះ និត សុខភត្រា ភេទប្រុស អាយុ១៧ឆ្នាំ មុខរបរមិនពិតប្រាកដ, ទី៣-ឈ្មោះ នុត មករា ហៅអាឈុយ ភេទប្រុស អាយុ១៦ឆ្នាំ ជាសិស្ស និងទី៤-ឈ្នោះ អែម វិនជិង ហៅស្រីអូន ភេទស្រី អាយុ១៩ឆ្នាំ យុវជនសង្ស័យទាំង០៤នាក់ខាងលើ រស់នៅភូមិឃុំកើតហេតុជាមួយគ្នាខាងលើ ។
នគរបាលធ្វើការដកហូតបាននូវវត្ថុតាងរួមមានម្សៅក្រាមពណ៌សថ្លា (ម៉ាទឹកកក ICE) ចំនួន០៤កញ្ចប់ធំ ទម្ងន់ស្មើនឹង៧,៤៥ក្រាម, ជញ្ជីងថ្លឹងថ្នាំញៀន១គ្រឿង កាំភ្លើងខ្លីម៉ាកK៥៤ ចំនួន១ដើម និងគ្រាប់ចំនួន២គ្រាប់ ឧបករណ៍សម្រាប់ប្រើប្រាស់ និងថង់វេចខ្ចប់មួយចំនួនទៀតផងដែរ ។ ពាក់ព័ន្ធនឹងបញ្ហានេះបច្ចុប្បន្នកម្លាំងជំនាញការិយាល័យប្រឆាំងបទល្មើសគ្រឿងញៀនកំពុងកសាងសំណុំរឿងចាត់ការទៅតាមនីតិវិធីច្បាប់ ៕
ចែករំលែកព័តមាននេះ