ខេត្តប៉ៃលិន ៖ បុរសម្នាក់បន្ទាប់ពីផឹកស្រាជួបជុំមិត្តភក្តិរួចត្រឡប់ទៅផ្ទះវិញ ស្រាប់តែឈ្លោះ ទាស់ទែងជាមួយប្រពន្ធចុះឡើងៗក៏ទាញចានឆ្នាំយកមកបោកបែកខ្ទេចខ្ទីអស់ ហេតុការណ៍នេះបានកើតឡើងកាលពីម៉ោង៨និង៣០នាទីយប់ ថ្ងៃ២៣ ខែមិថុនា ឆ្នាំ២០១៨ ស្ថិតនៅភូមិផ្សារព្រំជជើង…
ខេត្តប៉ៃលិន ៖ បុរសម្នាក់បន្ទាប់ពីផឹកស្រាជួបជុំមិត្តភក្តិរួចត្រឡប់ទៅផ្ទះវិញ ស្រាប់តែឈ្លោះ ទាស់ទែងជាមួយប្រពន្ធចុះឡើងៗក៏ទាញចានឆ្នាំយកមកបោកបែកខ្ទេចខ្ទីអស់ ហេតុការណ៍នេះបានកើតឡើងកាលពីម៉ោង៨និង៣០នាទីយប់ ថ្ងៃ២៣ ខែមិថុនា ឆ្នាំ២០១៨ ស្ថិតនៅភូមិផ្សារព្រំជជើង ឃុំស្ទឹងកាច់ ស្រុកសាលាក្រៅ ។
ប្រភពព័ត៌មានបានឱ្យដឹងថា បុរសជាជនបង្កឈ្មោះ មួយ សាម៉េត ភេទប្រុស អាយុ៣៩ឆ្នាំ ជាកសិករ ត្រូវជាប្ដី ចំណែកស្ត្រីរងគ្រោះឈ្មោះ ហាង សេងហ៊ន អាយុ៣៦ឆ្នាំ រងរបួសខ្លួន ដោយត្រូវប្តីវាយពីរបីដៃ ទាំង២នាក់រស់នៅក្នុងភូមិ-កើតហេតុខាងលើ ។
ប្រភពព័ត៌មានបន្តទៀតថា បន្ទាប់ពីទទួលដំណឹងមានករណីហិង្សាក្នុងគ្រួសារកើតឡើង ដោយសារតែបុរសជាប្តីចេញពីផឹកស៊ីជួបជុំមិត្តភក្តិ រួចវាយប្រពន្ធជាច្រើនដៃ ព្រមទាំងវាយបំផ្លាញទ្រព្យសម្បត្តិដូចជា ចាន ឆ្នាំង និងរបស់របរផ្សេងៗមួយចំនួនទៀត បណ្តាលឱ្យបែករាយពេញផ្ទះ ទើបនគរបាលចុះចាប់ឃាត់ខ្លួនបញ្ជូនទៅអធិការនគរបាលស្រុក។ ក្រោយពីស្វាងស្រារួចមកបុរសជាប្តីសារភាពសុំទោសប្រពន្ធ ដោយសន្យាថ្ងៃក្រោយឈប់ផឹកស្រារករឿងវាយប្រពន្ធកូនទៀតហើយ បើសិនជាមានរឿងបែបនេះជាលើកទី២ ប្រពន្ធចង់ធ្វើអ្វីលើរូបគេក៏បានដែរ ។ 
ចំណែកស្ត្រីជាប្រពន្ធបានឱ្យដឹងថា ប្តីរបស់គាត់បើមិនបានផឹកស្រាទេ ស្ទើរតែរុយទុំមិនបក់នោះឡើយ ប៉ុន្តែបន្ទាប់ពីផឹកស្រាចូលទៅដល់ក្នុងពោះពេលណាតែងនិយាយច្រើន ជាពិសេសពេលត្រឡប់ពីផឹកស៊ីម្តងៗជេរបញ្ចោររករឿងវាយតប់ លុះនាងរត់គេចខ្លួនគាត់ក៏ផ្អាកសកម្មភាព ។ ប៉ុន្តែនៅយប់ថ្ងៃកើតហេតុដោយសារដើរផឹកស៊ីតាំងពីថ្ងៃរហូតដល់យប់ជ្រៅ នាងព្រួយបារម្ភក្រែងប្តីមានបញ្ហាគ្រោះថ្នាក់ ឬត្រូវគេវាយដំទាត់ធាក់ទើបសួរនាំ ស្រាប់តែប្តី នាងទាញចានឆ្នាំងយកមកបោកចោល លុះនាងទ្រាំមិនបានក៏ស្តីបន្ទោសលោកប្តីក៏វាយនាងបណ្តាលឱ្យឈឺចុកចាប់យ៉ាងដំណំ ហើយក៏ប្តឹងឱ្យនគរបាលឃាត់ខ្លួនតែម្តង ។ បើសិនជាប្តីរបស់នាងនៅតែប្រព្រឹត្តបែបនេះមិនព្រមកែខ្លួនទេ នៅថ្ងៃណាមួយនាងមិនអាចសុខចិត្តរស់នៅឈឺចាប់ទាំងកាយ ទាំងចិត្តនោះឡើយ នឹងរត់ចោលជាក់ជាមិនខាន ។
ពាក់ព័ន្ធនឹងករណីក្នុងគ្រួសារខាងលើនេះ បច្ចុប្បន្នជនសង្ស័យត្រូវបានឃាត់ខ្លួននៅអធិការដ្ឋាននគរបាលស្រុកសាលាក្រៅ ដើម្បីធ្វើការអប់រំណែនាំ និងអនុញ្ញាតឱ្យត្រឡប់ទៅផ្ទះវិញ តាមការស្នើសុំរបស់ប្រពន្ធកូន ដោយធ្វើកិច្ចសន្យាឱ្យរាងចាល ៕
ចែករំលែកព័តមាននេះ