ខេត្តបន្ទាយមានជ័យ ៖ ជនសង្ស័យជួញដូរ និងប្រើប្រាស់គ្រឿងញៀនប្រុសស្រីចំនួន៧នាក់ត្រូវនគរបាលក្រុងប៉ោយប៉ែត និងនគរបាលស្រុកថ្មពួកធ្វើការឃាត់ខ្លួនបានជាបន្តបន្ទាប់កាលពីថ្ងៃទី២១ និង២២ ខែមិថុនា ឆ្នាំ២០១៨ ជាមួយថ្នាំញៀន និងឧបករណ៍សេពគ្រឿងញៀនមួយចំនួន…
ខេត្តបន្ទាយមានជ័យ ៖ ជនសង្ស័យជួញដូរ និងប្រើប្រាស់គ្រឿងញៀនប្រុសស្រីចំនួន៧នាក់ត្រូវនគរបាលក្រុងប៉ោយប៉ែត និងនគរបាលស្រុកថ្មពួកធ្វើការឃាត់ខ្លួនបានជាបន្តបន្ទាប់កាលពីថ្ងៃទី២១ និង២២ ខែមិថុនា ឆ្នាំ២០១៨ ជាមួយថ្នាំញៀន និងឧបករណ៍សេពគ្រឿងញៀនមួយចំនួន ។ ការឃាត់ខ្លួនជនសង្ស័យនៅក្រុងប៉ោយប៉ែតធ្វើឡើងដោយនគរបាលប៉ុស្តិ៍រដ្ឋបាលសង្កាត់ផ្សារកណ្តាល កាលពីវេលាម៉ោងជាង២រសៀលថ្ងៃទី២២ មិថុនា នៅចំណុចភូមិអូរឬស្សីសង្កាត់ផ្សារកណ្តាល ខណៈចុះល្បាតការពារសុន្តិសុខសណ្តាប់ធ្នាប់ក្នុងមូលដ្ឋាន ។ 
សមត្ថកិច្ចឃាត់ខ្លួនជនសង្ស័យ៣នាក់រួមមាន១-ឈ្មោះដួង វិរៈ ភេទប្រុស អាយុ២២ឆ្នាំ ជាអ្នកជួញដូរ ហើយឆែកឆេរខ្លួនរកឃើញថ្នាំញៀនប្រភេទម្សៅក្រាម ពណ៌សថ្លា ចំនួន១២កូនថង់តូច ២-ឈ្មោះហៀង ថាត់ ភេទប្រុស អាយុ១៩ឆ្នាំ ជាអ្នកជួញដូរ រស់នៅភូមិអូរនាង សង្កាត់កើតហេតុ ឆេកឆេរខ្លួនរកឃើញថ្នាំញៀនប្រភេទម្សៅក្រាម ពណ៌សថ្លា ចំនួន៧កូនថង់តូច និង៣-ឈ្មោះសុខា សៅ ភេទប្រុស អាយុ២២ឆ្នាំ ជាអ្នកជួញដូរ រស់នៅក្នុងភូមិកើតហេតុ ឆែកឆេរខ្លួនរកឃើញថ្នាំញៀនម្សៅក្រាមពណ៌សថ្លាចំនួន២កូនថង់តូច ។ 
លោកវរៈសេនីយ៍ឯក ធិន ស៊ិនដេត អធិការនគរបាលក្រុងប៉ោយប៉ែត បានឱ្យដឹងថា ជនសង្ស័យទាំង៣នាក់ក្រោយធ្វើកំណត់ហេតុសួរនាំរួច និងកសាងសំណុំរឿងជាមួយនឹងវត្ថុតាងបញ្ជូនទៅការិយាល័យជំនាញនៃស្នងការដ្ឋាននគរបាលខេត្តដើម្បីចាត់ការបន្តតាមនឹតិវិធី។
ដោយឡែកករណីបង្ក្រាបនៅស្រុកថ្មពួកត្រូវបានសមត្ថកិច្ចឱ្យដឹងថា ធ្វើឡើងកាលពីយប់ថ្ងៃទី២១ នៅឃុំគោករមៀត២ ទីតាំងផ្សេងគ្នាឃាត់ខ្លួនជនសង្ស័យប្រុសស្រី៤នាក់ជាមួយថ្នាំញៀន និងឧបករណ៍សេពមួយចំនួន ។ សមត្ថកិច្ចបន្តថា ដំបូងឃាត់ខ្លួនជនសង្ស័យម្នាក់នៅភូមិសាមគ្គីឈ្មោះអុឹម ហឿត ភេទស្រី អាយុ៥៧ឆ្នាំ ជាអ្នកចែកចាយ ដកហូតបានថ្នាំញៀនប្រភេទមេតំហ្វេតាមីន ពណ៌ផ្កាឈូក (WY) លាក់ទុកក្នុងអង្រឹងចំនួន៣គ្រាប់ បន្ទាប់មកឃាត់ខ្លួនជនសង្ស័យម្នាក់ទៀតនៅភូមិថ្នល់បំបែក គឺឈ្មោះជាង ណូរិន ភេទប្រុស អាយុ៤២ឆ្នាំ ដកហូតបានដបកែច្នៃសម្រាប់សេពគ្រឿងញៀន២ បំពង់បឺត៧ និងដែកកេះចំនួន៣។
សមត្ថកិច្ចបន្តថា នៅម៉ោង៩និង៥នាទីយប់ថ្ងៃដដែល លោកវរសេនីយ៍ទោសៅ សារឿន អធិការនគរបាលស្រុកដឹកនាំកម្លាំងសហការជាមួយនគរបាលប៉ុស្តិ៍រដ្ឋបាលគោករមៀតដាក់ប៉ុស្តិ៍ត្រួតពិនិត្យអាវុធជាតិផ្ទុះនៅចំណុចផ្លូវបំបែកបឹងត្រកួនទៅឃុំបន្ទាយឆ្មារ ស្រាប់តែប្រទះឃើញជនសង្ស័យ២នាក់ផ្សេងទៀតជាបងប្អូនបង្កើត រួមមានម្នាក់ឈ្មោះឆេង សម្បត្តិ ភេទប្រុស អាយុ២៣ឆ្នាំ និងម្នាក់ទៀតឈ្មោះឆេង រ៉ាឈិស ភេទប្រុស អាយុ២០ឆ្នាំ ឆែកឆេររកឃើញថ្នាំញៀនម្សៅក្រាមពណ៌សថ្លា១កូនថង់តូច ស្នាប់ដៃ១ ជំពាមកៅស៊ូ២ ដែកកេះ៣ លាក់ទុកក្នុងកែបម៉ូតូដែលពួកគេជិះ ម៉ាក MSX ពណ៌សលាយខ្មៅ គ្មានស្លាកលេខ ស៊េរីឆ្នាំ២០១៦មួយគ្រឿង ។ លោកវរៈសេនីយ៍ទោ សៅ សារឿន អធិការនគរបាលស្រុកថ្មពួកបានឱ្យដឹងថា ជនសង្ស័យនិងវត្ថុតាងក្រោយធ្វើកំណត់ហេតុរួច និងកសាងសំណុំរឿងបញ្ជូនទៅការិយាល័យជំនាញនៃស្នងការដ្ឋាននគរបាលខេត្តដើម្បីចាត់ការបន្តតាមនីតិវិធីច្បាប់៕
ចែករំលែកព័តមាននេះ