ខេត្តបន្ទាយមានជ័យ ៖ តាមសេចក្តីរាយការណ៍បឋមបានឲ្យដឹងថា នៅម៉ោងជិត៩យប់ថ្ងៃទី២៣ ខែមិថុនា ឆ្នាំ២០១៨ មានករណីគ្រោះថ្នាក់ចរាចរណ៍រវាងម៉ូតូអាយខុនបុកគ្នាជាមួយគោយន្តកន្ត្រៃសណ្តោងរ៉ឺម៉ក ពីក្រោយក្នុងដំណើរស្របទិសគ្នា ដែលបណ្តាលឲ្យស្លាប់ម្នាក់(ភាគីម៉ូតូ) ។ ហេតុការគ្រោះថ្នាក់នេះកើតឡើងលើដងផ្លូវជាតិលេខ៥ នៅភូមិនិមិត្ត៣ សង្កាត់និមិត្ត ក្រុងប៉ោយប៉ែត ។
សេចក្តីរាយការណ៍បន្តថា ជនរងគ្រោះឈ្មោះ យស់ សម្បត្តិ ភេទប្រុស អាយុ២៩ឆ្នាំ រស់នៅភូមិ និងសង្កាត់ផ្សារកណ្តាល ក្រុងប៉ោយប៉ែត(ស្លាប់នៅកន្លែង) ។ ប្រភពថា មុនកើតហេតុជនរងគ្រោះជិះម៉ូតូម៉ាកអាយខុនពីទិសខាងកើតលុះដល់ចំណុចកើតហេតុឡើងជែងម៉ូតូ១គ្រឿង រួចបត់ចូលរកស្តាំដឹងអីក៏បុកគោយន្តកន្ត្រៃសណ្តោងរ៉ឺម៉កពេញទំហឹង ពីក្រោយបណ្តាលឲ្យដួលម៉ូតូស្លាប់តែម្តង ។
ពេលនេះសមត្ថកិច្ចកំពុងស្រាវជ្រៀវទាក់ទងរកសាច់ញាតិ ដើម្បីឲ្យទៅទទួលសព ខណៈភាគីគោយន្តអ្នកបើកបរដាក់មេប្រូចគេចខ្លួនបាត់ ប៉ុន្តែត្រូវគេស្គាល់អត្តសញ្ញាណហើយជាអ្នកភូមិកូនដំរីសង្កាត់និមិត្ត ៕
ចែករំលែកព័តមាននេះ