រាជធានីភ្នំពេញ ៖ នេះមិនមែនជាលើកទី១ទេ ដែលអាជ្ញាធររូបិយប័ណ្ណជាតិបានប្រកាសច្រានចោលពីការមិនទទួលស្គាល់រូបិយប័ណ្ណអេឡិចត្រូនិក ។ ជាការកត់សម្គាល់ រូបិយប័ណ្ណប្រភេទថ្មីនេះនៅតែកំពុងចរាចរ លក់ ជួញដូរ និងទូទាត់យ៉ាងសកម្មនៅក្នុងទីផ្សារប្រទេសកម្ពុជា…
រាជធានីភ្នំពេញ ៖ នេះមិនមែនជាលើកទី១ទេ ដែលអាជ្ញាធររូបិយប័ណ្ណជាតិបានប្រកាសច្រានចោលពីការមិនទទួលស្គាល់រូបិយប័ណ្ណអេឡិចត្រូនិក ។ ជាការកត់សម្គាល់ រូបិយប័ណ្ណប្រភេទថ្មីនេះនៅតែកំពុងចរាចរ លក់ ជួញដូរ និងទូទាត់យ៉ាងសកម្មនៅក្នុងទីផ្សារប្រទេសកម្ពុជា ។ យ៉ាងនេះក្ដី ធនាគារជាតិនៃកម្ពុជា (NBC) សហការជាមួយគណៈកម្មការមូលបត្រកម្ពុជា និងអគ្គស្នងការដ្ឋាននគរបាលជាតិ បានចេញសេចក្តីថ្លែងការណ៍រួមមួយ សូមឲ្យប្រជាពលរដ្ឋមានការប្រុងប្រយ័ត្នខ្ពស់ ព្រមទាំងព្រមានចាត់វិធានការតាមផ្លូវច្បាប់ដល់បណ្តាក្រុមហ៊ុនណាធ្វើការផ្សព្វផ្សាយ ជួញដូរកាសអេឡិចត្រូនិកដែលមិនមានអាជ្ញាប័ណ្ណពីអាជ្ញាធរ ។
យោងតាមសេចក្តីថ្លែងការណ៍រួមដែលធនាគារជាតិនៃកម្ពុជា ចេញផ្សាយកាលពីថ្ងៃទី១៩ មិថុនា បានឲ្យដឹងថា ថ្មីៗកន្លងមកនេះ អាជ្ញាធរមានសមត្ថកិច្ចបានសង្កេតឃើញថា មានការផ្សព្វផ្សាយ ចរាចរ ទិញ លក់ ជួញដូរទូទាត់កាសអេឡិចត្រូនិកដូចជា KH Coin, Suncoin, K coin, One-coin, Forex coin និងកាសអេឡិចត្រូនិកប្រហាក់ប្រហែលយ៉ាងសកម្មនៅក្នុងប្រទេសកម្ពុជា ។ អាជ្ញាធរមានសមត្ថកិច្ចសូមបញ្ជាក់ថា ការផ្សព្វផ្សាយ ចរាចរ ទិញ លក់ ជួញដូរ ទូទាត់កាសអេឡិចត្រូនិក ដោយមិនមានអាជ្ញាប័ណ្ណពីអាជ្ញាធរមានសមត្ថកិច្ច គឺជាសកម្មភាពខុសច្បាប់ ។សេចក្តីថ្លែងការណ៍រួមសង្កត់ធ្ងន់ថា ៖ «ការផ្សព្វផ្សាយ ចរាចរ ទិញ លក់ ជួញដូរ ទូទាត់កាសអេឡិចត្រូនិក ដូចជា KH Coin, Suncoin, K coin, One-coin, Forex coin និងកាសអេឡិចត្រូនិកប្រហាក់ប្រហែល ដែលមិនមានការគ្រប់គ្រងពីអាជ្ញាធរមានសមត្ថកិច្ច នឹងបង្កហានិភ័យធ្ងន់ធ្ងរដល់សាធារណជន និងសង្គមទាំងមូលដូចជា ៖ ចេញផ្សាយដោយពុំមានវត្ថុធានាសងត្រឡប់មកវិញឡើយ, ទទួលរងការខាតបង់លើការវិនិយោគ ដោយសារតែតម្លៃចារឹករបស់កាសអេឡិចត្រូនិកប្រែប្រួលគ្មានមូលដ្ឋានច្បាស់លាស់, ប្រឈមនឹងឧក្រិដ្ឋកម្មបច្ចេកវិទ្យា និងធ្វើឱ្យបាត់បង់មូលនិធិ ដោយសារការលួចចូលទៅក្នុងប្រព័ន្ធ, ពុំមានយន្តការការពារផលប្រយោជន៍អតិថិជន, អ្នកប្រើប្រាស់កាសអេឡិចត្រូនិក ជាជនអនាមិក ពុំមានការសម្គាល់អត្តសញ្ញាណ ឬសាវតារបស់អ្នកប្រើប្រាស់បានច្បាស់លាស់ គឺជាហានិភ័យក្នុងការសម្អាតប្រាក់ និងហិរញ្ញប្បទានភេរវកម្ម » ។
ដូច្នេះ ស្ថិតក្នុងដំណាក់កាលនេះ អាជ្ញាធរ មានសមត្ថកិច្ច សូមអំពាវនាវដល់សាធារណជនទាំងអស់មេត្តាប្រុងប្រយ័ត្នចំពោះការឃោសនាផ្សព្វផ្សាយកៀរគរប្រមូលមូលនិធិ និងធ្វើប្រតិបត្តិការទិញ លក់ ជួញដូរ ទូទាត់កាសអេឡិចត្រូនិក ដែលមិនមានអាជ្ញាប័ណ្ណពីអាជ្ញាធរមានសមត្ថកិច្ច ។ បុគ្គល ឬនីតិបុគ្គលណាដែលធ្វើការឃោសនាផ្សព្វផ្សាយ កៀរគរប្រមូលមូលនិធិ ធ្វើប្រតិបត្តិការទិញ លក់ជួញដូរ ទូទាត់កាសអេឡិចត្រូនិក ដោយមិនមានអាជ្ញាប័ណ្ណពីអាជ្ញាធរមានសមត្ថកិច្ច នឹងត្រូវផ្តន្ទាទោសតាមផ្លូវច្បាប់ជាធរមាន ។ ទាក់ទងនឹងការចេញសេចក្តីថ្លែងការណ៍រួមរវាងស្ថាប័នទាំង៣ខាងលើ បើតាមអគ្គនាយកគណៈកម្មការមូលបត្រកម្ពុជា បានឱ្យដឹងថា ក្នុងគោលបំណងទប់ស្កាត់កុំឱ្យពលរដ្ឋកម្ពុជា ចាញ់បោក ហើយក្នុងករណីពលរដ្ឋចាញ់បោកអស់ប្រាក់ហើយ ទើបចេញសេចក្តីប្រកាសនេះ គ្មានន័យនោះទេ ។
លោក ស៊ូ សុជាតិ អគ្គនាយកគណៈកម្មការមូលបត្រកម្ពុជា មានប្រសាសន៍កាលពីថ្ងៃទី២០ មិថុនា ម្សិលមិញថា ៖« កន្លងមក ស្ថាប័នពាក់ព័ន្ធនីមួយៗរបស់ខ្លួនធ្លាប់ចេញសេចក្តីប្រកាសជាបន្តបន្ទាប់ តែសម្រាប់សេចក្តីថ្លែងការណ៍រួមរវាងស្ថាប័នទាំង៣ខាងលើនេះ ទើបតែមានលើកទី១ ហើយមានគោលបំណងដើម្បីបង្ការ ឬទប់ស្កាត់កុំឱ្យពលរដ្ឋចាញ់បោកក្រុមហ៊ុនដែលរកស៊ីពាក់ព័ន្ធការជួញដូរកាសអេឡិចត្រូនិកនេះ » ។ សកម្មភាពជួញដូររូបិយប័ណ្ណអេឡិចត្រូនិកនៅក្នុងប្រទេសកម្ពុជា ត្រូវបានគេមើលឃើញថា ចាប់ផ្ដើមហូរចូលក្នុងរយៈពេលជាង១ឆ្នាំកន្លងមកនេះ ក្នុងនោះមានវិនិយោគិនចិនជាច្រើនបានមកស្វែងរកការវិនិយោគលើវិស័យនេះនៅកម្ពុជា ព្រមទាំងបានកៀងគរបណ្ដាអាជីវករនានាក្នុងប្រទេស ដើម្បីចូលរួមវិនិយោគជាមួយពួកគេ ។
ជាមួយគ្នានោះ លោកជំទាវ ជា សិរី អគ្គនាយកបច្ចេកទេសធនាគារជាតិនៃកម្ពុជា ក៏បានប្រកាសម្ដងរួចមកហើយពីការមិនទទួលស្គាល់នូវការជូញដូររូបិយប័ណ្ណអេឡិចត្រូនិកនៅក្នុងប្រទេសកម្ពុជា ។ ក្នុងនោះលោកជំទាវមានប្រសាសន៍ថា ៖« ធនាគារជាតិនឹងមិនទទួលខុសត្រូវឡើយចំពោះការចាញ់បោកណាមួយរបស់ក្រុមអ្នកធ្វើអាជីវកម្មមួយនេះ ពីព្រោះប្រភេទរូបិយប័ណ្ណនេះ មិនមានស្ថាប័នណាមួយ ឬធនាគារណាមួយទទួលយកដោះដូរដូចរូបិយប័ណ្ណក្រដាសនោះទេ ។ រាល់ការវិនិយោគនានាលើកាសអេឡិចត្រូនិកនេះ សូមឲ្យមានការប្រុងប្រយ័ត្ន និងទទួលខុសត្រូវដោយខ្លួនឯង » ៕
ចែករំលែកព័តមាននេះ