ខេត្តព្រះវិហារ ៖ ការធ្វើកសិកម្មតាមកិច្ចសន្យាពិតជាទទួលបានអត្ថប្រយោជន៍ច្រើនដោយធានាបាននូវទីផ្សារ និងតម្លៃ ព្រមទាំងទទួលបានការបណ្ដុះបណ្ដាលបន្ថែមទៀត ។ បច្ចុប្បន្ននេះ នៅខេត្តព្រះវិហារមានសហគមន៍កសិកម្មជាង៤០ ដែលសហគមន៍ទាំងនោះបានចាប់ផ្ដើមងាកមកចុះអនុស្សរណៈយោគយល់គ្នា និងចុះកិច្ចសន្យាផលិត…
ខេត្តព្រះវិហារ ៖ ការធ្វើកសិកម្មតាមកិច្ចសន្យាពិតជាទទួលបានអត្ថប្រយោជន៍ច្រើនដោយធានាបាននូវទីផ្សារ និងតម្លៃ ព្រមទាំងទទួលបានការបណ្ដុះបណ្ដាលបន្ថែមទៀត ។ បច្ចុប្បន្ននេះ នៅខេត្តព្រះវិហារមានសហគមន៍កសិកម្មជាង៤០ ដែលសហគមន៍ទាំងនោះបានចាប់ផ្ដើមងាកមកចុះអនុស្សរណៈយោគយល់គ្នា និងចុះកិច្ចសន្យាផលិត និងផ្គត់ផ្គង់ដំណាំកសិកម្ម កសិ-ឧស្សាហកម្មជូនក្រុមហ៊ុនជាបន្តបន្ទាប់ ។
លោក ចាន់ ពេជ្រ តំណាងក្រុមហ៊ុនស៊ិកនេតឈ័រ អហ្វ អេស៊ា បានឲ្យដឹងនៅក្នុងពិធីចុះអនុស្សរណៈយោគយល់គ្នា និងចុះហត្ថលេខាលើកិច្ចសន្យាជាមួយសហគមន៍កសិកម្មចំនួន៨ កាលពីថ្ងៃទី២០ មិថុនា ថា គិតមកត្រឹមឆ្នាំ២០១៨នេះ ក្រុមហ៊ុនបានអនុវត្តកសិកម្មតាមកិច្ចសន្យាជាមួយសហគមន៍កសិកម្មនៅក្នុងខេត្តព្រះវិហាររយៈពេល៣ឆ្នាំមកហើយ ដោយឃើញថា ការទិញ-លក់ស្រូវរវាងកសិករ និងក្រុមហ៊ុន មានដំណើរការល្អប្រសើរ និងបង្កើនបរិមាណក្នុងការទិញកើនឡើងពីមួយឆ្នាំទៅមួយឆ្នាំ ។
លោកបន្ដថា ៖« សក្តានុពលស្រូវសរីរាង្គ នៅខេត្តព្រះវិហារ ពិតជាមានគុណភាពខ្ពស់ដែលទទួលស្គាល់ដោយអន្តរជាតិ ។ ទោះជាយ៉ាងនេះក្តី លោកសំណូមពរដល់កសិករ ក៏ដូចជាសហគមន៍កសិកម្មទាំងអស់ ដែលបានចុះកិច្ចសន្យាជាមួយសហគមន៍កសិកម្មក្នុងខេត្តព្រះវិហារ ធ្វើយ៉ាងណា ត្រូវអនុវត្តឲ្យបានត្រឹមត្រូវតាមគោលការណ៍កំណត់របស់ក្រុមហ៊ុន ជាពិសេស ក្នុងអំឡុងពេលដាំដុះ ត្រូវចៀសវាងដាច់ខាតនូវការប្រើប្រាស់ជីគីមី និងថ្នាំសម្លាប់សត្វល្អិត ព្រោះវាធ្វើឲ្យប៉ះពាល់ដល់គុណភាពដំណាំស្រូវខុសស្តង់ដា » ។
ប្រធានមន្ទីរកសិកម្ម រុក្ខាប្រមាញ់ និងនេសាទខេត្តព្រះវិហារ លោក ពឹង ទ្រីដា បានឲ្យដឹងថា ការធ្វើកសិកម្មតាមកិច្ចសន្យារវាងសហគមន៍កសិកម្មនិងក្រុមហ៊ុន កាន់តែកើនឡើងក្នុងការផ្គត់ផ្គង់ដំណាំស្រូវសរីរាង្គជូនដល់ក្រុមហ៊ុន ។ ជាក់ស្តែង នៅថ្ងៃទី២០ មិថុនា នេះ សហគមន៍កសិកម្មចំនួន៨ទៀតនៅក្នុងខេត្តព្រះវិហារ បានចុះអនុស្សរណៈយោគយល់គ្នា និងចុះកិច្ចសន្យាជាមួយក្រុមហ៊ុនស៊ិកនេតឈ័រ អហ្វ អេស៊ា ដើម្បីផ្គត់ផ្គង់ស្រូវក្នុងបរិមាណចំនួន៣.៥០០តោននៅក្នុងឆ្នាំ២០១៨នេះ ។
ក្នុងឱកាសនោះ លោកក៏បានផ្តាំផ្ញើដល់សមាជិកសហគមន៍កសិកម្មទាំងអស់ពង្រឹងនូវគុណភាព និងស្តង់ដា ក្នុងការដាំដុះដំណាំស្រូវសរីរាង្គឲ្យត្រឹមត្រូវតាមបច្ចេកទេស និងតាមបែបធម្មជាតិសុទ្ធសាធ ដោយមិនប្រើប្រាស់សារធាតុគីមីជាដាច់ខាត ។ មួយវិញទៀត នៅពេលប្រមូលផល សមាជិកសហគមន៍នីមួយៗត្រូវគោរពទៅតាមកិច្ចសន្យាផ្គត់ផ្គង់លក់ទៅឲ្យក្រុមហ៊ុនឲ្យបានគ្រប់តាមផែនការ ចៀសវាងការលក់ស្រូវនេះទៅឲ្យឈ្មួញកណ្តាលផ្សេងៗ ផ្ទុយពីកិច្ចសន្យា ។ លោក ធួន សាន ប្រធានក្រុមប្រឹក្សាភិបាល សហភាពសហគមន៍កសិកម្មព្រះវិហារ-មានជ័យ ដែលតំណាងឲ្យសហគមន៍កសិកម្មទាំង៨ បានប្តេជ្ញាថា នឹងខិតខំប្រឹងប្រែងណែនាំដល់សមាជិក សហគមន៍កសិកម្មទាំងអស់ ក្នុងការផលិតដំណាំស្រូវសរីរាង្គនេះឲ្យស្របទៅតាមគុណភាព និងស្តង់ដាត្រឹមត្រូវបំផុត ទៅតាមការកំណត់ក្នុងកិច្ចសន្យាជាមួយក្រុមហ៊ុន ។
គួរបញ្ជាក់ថា កាលពីដើមខែមិថុនានេះ សហគមន៍កសិកម្មចំនួន៨ផ្សេងទៀត ក៏បានចុះកិច្ចសន្យាផ្គត់ផ្គង់ផលិតដំណាំ ផ្គត់ផ្គង់ស្រូវ និងដំឡូងមីសរីរាង្គ ក្នុងបរិមាណជាង៣ម៉ឺនតោនដល់ក្រុមហ៊ុនចំនួន៤ ។ ក្នុងនោះ ស្រូវសរីរាង្គជាង២ម៉ឺនតោន និងដំឡូងមីសរីរាង្គជាង១ម៉ឺនតោន ។
អ្នកស្រី គឹម ម៉ារី តំណាងសហគមន៍កសិកម្មជាំក្សាន្តជាយដែនមានជ័យ បានលើកឡើងថា មូលហេតុដែលពួកគាត់ចាប់យកការធ្វើកសិកម្មតាមកិច្ចសន្យាជាមួយក្រុមហ៊ុន ដោយមើលឃើញថា ការធ្វើបែបនេះធានាបាននូវទីផ្សារកសិផលមានតម្លៃសមរម្យ បើធៀបនឹងកសិផលដែលលក់ទៅឲ្យឈ្មួញកណ្តាល ។ ជាក់ស្តែង ស្រូវសរីរាង្គរបស់ពួកគាត់លក់ឲ្យក្រុមហ៊ុនក្នុង១តោន ចំណេញពី២៥ម៉ឺន ទៅ៣០ម៉ឺនរៀល បើធៀបនឹងលក់ទៅឲ្យឈ្មួញកណ្តាលដើរប្រមូលទិញ ។ អ្នកស្រីថា ៖« ដោយមានជំនឿទុកចិត្តលើក្រុមហ៊ុន សហគមន៍របស់យើងនឹងបន្តចុះកិច្ចសន្យាផលិតដំណាំដំឡូងមីបន្ថែមទៀតលក់ឲ្យក្រុមហ៊ុន ដោយក្រុមហ៊ុនឲ្យតម្លៃខ្ពស់ជាងទីផ្សារខាងក្រៅ ២០រៀលក្នុង១គីឡូក្រាមសម្រាប់ដំឡូងមីស្រស់ » ។
យោងតាមរបាយការណ៍របស់មន្ទីរកសិកម្ម រុក្ខាប្រមាញ់ និងនេសាទខេត្ត ឆ្នាំ២០១៨នេះ បង្ហាញថា សហគមន៍កសិកម្មចំនួន៣២សហគមន៍ក្នុងចំណោម៤៣សហគមន៍ បានចុះកិច្ចសន្យាលក់ស្រូវសរីរាង្គចំនួន២៥.៥៩៨តោន និងដំឡូងមីចំនួន១០.៥០០តោន ដែលមានសមាជិកផលិតសរុបចំនួន៤.៦១០គ្រួសារសម្រាប់លក់ឲ្យក្រុមហ៊ុនចំនួន៤ ក្នុងខេត្តព្រះវិហារ ៕
ចែករំលែកព័តមាននេះ