មុនឡើងសមរភូមិ World Cup ប្រយុទ្ធជាមួយក្រុមម៉ិកស៊ិក កាលពីរាត្រីថ្ងៃអាទិត្យទ័ពខ្លាំងរបស់ក្រុមឥន្ទ្រីដែកអាល្លឺម៉ង់កីឡាករ Ozil បានបោះពាក្យសម្ដីគ្រោតគ្រាតដាក់ក្រុមជម្រើសជាតិអង់គ្លេសថា «ខ្ញុំសុបិនចង់កម្ទេចក្រុមតោកំណាចអង់គ្លេសឱ្យហ្មត់ដូចផេះនៅ World Cup វគ្គផ្តាច់ព្រ័ត្រ» ។ ពាក្យប្រមាថនេះមានន័យថា ក្រុមជើងឯកចាស់អាល្លឺម៉ង់នឹងឡើងដល់វគ្គផ្តាច់ព្រ័ត្រហើយជួបក្រុមអង់គ្លេស ។
កីឡាករកូនកាត់ពីរសាសន៍តួកគីនិងអាល្លឺម៉ង់ Ozil គឺជាផ្នែកមួយរបស់ក្រុមជម្រើសជាតិអាល្លឺម៉ង់អំឡុងជ័យជម្នះWorld Cupនៅប្រទេសប្រេស៊ីលកាលពី៤ឆ្នាំមុន ហើយក្រុមបាល់ទាត់ដ៏ខ្លាំងនៅអឺរ៉ុបមួយនេះព្យាយាមទម្លុះឧបសគ្គដើម្បីការពារតំណែងជើងឯករបស់គេ ។
ខ្សែបម្រើវ័យ២៩ឆ្នាំ Ozil ប្រាប់សារព័ត៌មាន The Evening Standard ថា «យើង(ក្រុមអាលឺ្លម៉ង់) គឺជាម្ចាស់ជើងឯក World Cup ២០១៤ ។ យើងត្រូវតែយកពាន World Cup ២០១៨ នៅវគ្គផ្តាច់ព្រ័ត្រឱ្យខាងតែបាន ។ នេះគឺជាអ្វីដែលអ្នកគាំទ្រអាល្លឺម៉ង់ចង់បានពីពួកយើង» ។ Ozil បន្តថា «តែសម្រាប់ខ្ញុំគឺមានសុបិនមួយចង់កម្ទេចក្រុមអង់គ្លេសនៅវគ្គផ្តាច់ព្រ័ត្រក្នុង៩០នាទីមិនបាច់ត្រូវការម៉ោងបន្ថែមឡើយ» ។
គួរបញ្ជាក់ថា ស្ថិតក្នុងពូល F ឥន្ទ្រីដែកអាល្លឺម៉ង់ត្រូវជួបម៉ិកស៊ិក (១៧ មិថុនា) ស៊ុយអែត(២៤ មិថុនា) និងកូរ៉េខាងត្បូង(២៧ មិថុនា)៕
ចែករំលែកព័តមាននេះ