បន្ទាប់ពីបានប្រកួតលើកទី១ស្មើ១ទល់១ជាមួយស្វ៊ីសកាលពីថ្ងៃចន្ទរួចមក ប្រេស៊ីលដែលជាក្រុមខ្លាំងមួយនៅអាមេរិកខាងត្បូង ត្រូវការឈ្នះទាំង២ប្រកួតចុងក្រោយនេះដាច់ខាត ដើម្បីធានាពីសុវត្ថិភាពរបស់ខ្លួនឡើងទៅវគ្គបន្ត ។ យ៉ាងណាមិញ ជំនួបប៉ះកូស្តារីកានារាត្រីនេះ ហាក់មិនមានអ្វីជាបញ្ហាចោទសម្រាប់ក្រុមប្រេស៊ីលនោះឡើយ ។ បទពិសោធន៍ដ៏ក្រាស់ក្រែលរបស់ប្រេស៊ីលនៅ…
បន្ទាប់ពីបានប្រកួតលើកទី១ស្មើ១ទល់១ជាមួយស្វ៊ីសកាលពីថ្ងៃចន្ទរួចមក ប្រេស៊ីលដែលជាក្រុមខ្លាំងមួយនៅអាមេរិកខាងត្បូង ត្រូវការឈ្នះទាំង២ប្រកួតចុងក្រោយនេះដាច់ខាត ដើម្បីធានាពីសុវត្ថិភាពរបស់ខ្លួនឡើងទៅវគ្គបន្ត ។ យ៉ាងណាមិញ ជំនួបប៉ះកូស្តារីកានារាត្រីនេះ ហាក់មិនមានអ្វីជាបញ្ហាចោទសម្រាប់ក្រុមប្រេស៊ីលនោះឡើយ ។
បទពិសោធន៍ដ៏ក្រាស់ក្រែលរបស់ប្រេស៊ីលនៅ World Cup បូករួមទាំងសមត្ថភាពគ្រូបង្វឹក និងកីឡាករឆ្នើមផងនោះ នឹងធ្វើឱ្យក្រុមដែលមានរហស្សនាម “សាំបា” មួយនេះ មិនពិបាកយកឈ្នះកូស្តារីកានោះទេ ។ ម្ចាស់ជើងឯក៥សម័យកាលនេះ ពុំដែលខកខានការប្រកួត World Cup ម្តងណាឡើយចាប់តាំងពីព្រឹត្តិការណ៍នេះបង្កើតដំបូងមកម្ល៉េះ ។
គ្រូបង្វឹកលោក Tite ដែលបានចូលកាន់តំណែងកាលពីឆ្នាំ ២០១៦ ទើបតែដឹកនាំក្រុមជម្រើសជាតិប្រេស៊ីលចាញ់តែម្តងប៉ុណ្ណោះក្នុងចំណោមការប្រកួតទាំង២២លើក ។ ទន្ទឹមនឹងនេះ ប្រេស៊ីលបច្ចុប្បន្នសំបូរទៅដោយតារាក្មេងៗច្រើនរូបសុទ្ធសឹងតែជាទ័ពស្រួចកម្រមានក្រុមណាទប់ទល់បានឡើយ ។
ចំពោះកូស្តារីកាដែលជាក្រុមមកពីអាមេរិកខាងជើង មិនមែនជាគូសត្រូវធំដែលប្រេស៊ីលគួរញញើតប៉ុន្មានទេ ។ បើនិយាយពីការប្រឡូកនៅ World Cup វិញ កូស្តារីកាទើបតែបង្ហាញខ្លួនបាន៥លើកប៉ុណ្ណោះគិតទាំងរដូវកាល២០១៨នេះ ហើយទម្រង់លេងពួកគេក៏គ្មានអ្វីរីកចម្រើនគួរឱ្យកត់សម្គាល់ជាងរដូវកាលមុនៗដែរ ។ វត្តមានចុងក្រោយឆ្នាំ២០១៤ កូស្តារីកាបានឡើងដល់វគ្គ៨ក្រុមចុងក្រោយ ដែលជាកំណត់ត្រាល្អបំផុតក្នុងប្រវត្តិសាស្ត្រពួកគេនៅ World Cup។
ប្រេស៊ីល និងកូស្តារីកាធ្លាប់ជួបគ្នា១០ដងមកហើយ ដែលក្នុងចំណោមនេះ ប្រេស៊ីលឈ្នះ៩លើក និងចាញ់តែម្តងប៉ុណ្ណោះអំឡុងប្រកួតមិត្តភាពកាលពីឆ្នាំ១៩៦០ ។ ចំពោះប្រវត្តិប៉ះគ្នានៅ World Cup វគ្គចែកពូលទាំង២លើកកន្លងមក គឺនៅឆ្នាំ១៩៩០ ប្រេស៊ីលបានយកឈ្នះ១ទល់០ រីឯឆ្នាំ២០០២ ប្រេស៊ីលក៏ឈ្នះម្តងទៀត ដោយលទ្ធផល៥ទល់២ ។
ផ្អែកតាមសមត្ថភាពនាពេលបច្ចុប្បន្ន ថែមទាំងសេចក្តីស្រេកឃ្លានជ័យជម្នះដើម្បីឆ្លងទៅវគ្គបន្ត ក្រុមប្រេស៊ីលនឹងមិនទុកមុខឱ្យកូស្តារីកានោះទេនារាត្រីនេះ ហើយជាការប្រកួតមួយប៉ះប៉ូវរបួសចាស់ពេលស្មើស្វ៊ីសថ្ងៃមុនផងដែរ ។ ក្នុងជំនួបនេះ ប្រេស៊ីលអាចនឹងយកឈ្នះរហូតដល់៣ទល់០ បើយោងតាមការទស្សន៍ទាយរបស់គេហទំព័រកីឡាបរទេស ៕
ចែករំលែកព័តមាននេះ