យោងតាមរបាយការណ៍ថ្មីមួយចេញផ្សាយដោយក្រុមហ៊ុនឯកទេសខាងបច្ចេកវិទ្យារថយន្តគ្មានអ្នកបើកបរ Securing America’s Future Energy (SAFE) បានចែករំលែកការយល់ដឹងអំពីបច្ចេកវិទ្យាបើកបរដោយខ្លួនឯង ដែលអាចជួយកាត់បន្ថយកម្លាំងពលកម្មនៅរយៈពេល៣០ឆ្នាំខាងមុខ ។ ក្នុងចំណោមការរកឃើញនេះ គឺមានផលចំណេញទឹកប្រាក់ដល់ទៅ៣ទ្រីលាន ទៅ៦ទ្រីលានដុល្លារ ដែលមានផលប្រយោជន៍សម្រាប់អ្នកប្រើប្រាស់ និងសង្គមខាងផ្នែកសេដ្ឋកិច្ច ។ លើសពីនេះ វាអាចជួយដល់អ្នកបើកបរដែលមានវ័យចំណាស់ និងជនពិការ ដើម្បីធ្វើឲ្យការបើកបររបស់ពួកគេកាន់តែមានភាពងាយស្រួល ។
របាយការណ៍នេះបែងចែកជា២ផ្នែក គឺបច្ចេកវិទ្យារថយន្តគ្មានអ្នកបើកបរបានផ្តល់ផលប្រយោជន៍ដល់សាធារណៈ និងប្រយោជន៍ដល់អ្នកប្រើប្រាស់ ដែលផ្តោតទៅលើការជួយកាត់បន្ថយគ្រោះថ្នាក់ចរាចរណ៍ និងការចំណាយលើសាំង ។ ទឹកប្រាក់ដែលអាចជួយធ្វើឲ្យចំណេញដល់សង្គម ក្នុងការកាត់បន្ថយគ្រោះថ្នាក់ចរាចរណ៍នោះ គឺស្មើដល់ទៅ១១៨ប៊ីលានដុល្លារអាមេរិក ខណៈអាចជួយកាត់បន្ថយការស៊ីសាំងបានដល់ទៅ៥៨ប៊ីលានដុល្លារអាមេរិកផងដែរ ។ សម្រាប់សេវាកម្មតាក់ស៊ីវិញ គឺមិនបានបញ្ជាក់ឲ្យច្បាស់នៅក្នុងរបាយការណ៍នេះទេ។ ប៉ុន្តែគេប៉ាន់ស្មានថា បច្ចេកវិទ្យាគ្មានអ្នកបើកបរ គឺអាចជួយសន្សំសំចៃការចំណាយបាន១០ប៊ីលានដុល្លារឯណោះក្នុង១ឆ្នាំ ។
លោក Robbie Diamond នាយកប្រតិបត្តិក្រុមហ៊ុន SAFE បានមានប្រសាសន៍ថា ៖ «បច្ចេកវិទ្យាគ្មានអ្នកបើកបរ នឹងមានឥទ្ធិពលវិជ្ជមានយ៉ាងខ្លាំងទៅលើប្រទេសរបស់យើងទាំងវិស័យសេដ្ឋកិច្ច និងសង្គមទាំងមូល » ៕
ចែករំលែកព័តមាននេះ