រាជធានីភ្នំពេញ ៖ វាអាចនឹងមានហានិភ័យខ្ពស់ចំពោះរថយន្តដែលចតនៅតាមដងផ្លូវ ឬទីធ្លាគ្មានម្លប់យូរពេក ។ ហានិភ័យនេះ នឹងអាចប៉ះពាល់ដល់ប្រព័ន្ធម៉ាស៊ីនរថយន្តទាំងមូលផងដែរ តែអ្វីដែលធ្ងន់ធ្ងរនោះ គឺប៉ះពាល់ដល់ប្រព័ន្ធម៉ាស៊ីនត្រជាក់ ដូចជា កញ្ច្រែងក្ដៅ កញ្ច្រែងត្រជាក់របស់រថយន្ត និងប៉ះពាល់ដល់ម៉ាស៊ីនសប់ឧស្ម័ន (compressor) ដែលជាឧបករណ៍សំខាន់បំផុតសម្រាប់ប្រព័ន្ធម៉ាស៊ីនត្រជាក់រថយន្ត នឹងនាំឲ្យប៉ះពាល់ដល់ម៉ាស៊ីនរថយន្តទាំងមូល ។ បើតាមម្ចាស់យានដ្ឋានជ័យលាភថ្មី នៅម្ដុំផ្សារដេប៉ូ បានឲ្យដឹងថា ម្ចាស់រថយន្តមិនគួរចតរថយន្តនៅក្រោមកំដៅថ្ងៃទុកចោលយូរៗនោះទេ។ គួរតែរករបាំងការពារកំដៅមកគ្របរថយន្ត ដើម្បីការពាររថយន្ត ជាពិសេសការពារម៉ាស៊ីនរថយន្ត និងប្រព័ន្ធម៉ាស៊ីនត្រជាក់ ។
ម្ចាស់យានដ្ឋានរូបនេះបានឲ្យដឹងថា ការចតរថយន្តចោលនៅកណ្ដាលថ្ងៃយូរថ្ងៃ ឬរាប់ម៉ោង វានឹងធ្វើឲ្យចំហាយត្រជាក់នៅក្នុងរថយន្តភាយចេញ ហើយធ្វើឲ្យរថយន្តមិនសូវត្រជាក់ ។ មិនតែប៉ុណ្ណោះ វាអាចបណ្ដាលឲ្យខូច compressor ដែលជាដុំសំខាន់មួយនៅក្នុងប្រព័ន្ធម៉ាស៊ីនត្រជាក់រថយន្ត ។ បើសិនជាវាមានបញ្ហាហើយនោះ វាអាចបណ្ដាលឲ្យខូចដល់ម៉ាស៊ីនរថយន្តផងដែរ ដូចជា ធ្វើឲ្យម៉ាស៊ីនតឹង រោទ៍ខ្លាំង និងធ្វើឲ្យឡោកម៉ាស៊ីន រហូតឈានដល់ការដូរម៉ាស៊ីនរថយន្តចោលទាំងមូល ។ មួយវិញទៀត ការទុករថយន្តចោលនៅហាលក្ដៅ នឹងធ្វើឲ្យខូចកញ្ច្រែងក្ដៅនៅផ្នែកខាងក្រៅ និងខាងមុខនៃរថយន្ត ហើយបើប្រព័ន្ធនេះមានបញ្ហា វានឹងមិនធ្វើឲ្យរថយន្តត្រជាក់ឡើយ បើទោះបីបើកម៉ាស៊ីនត្រជាក់កម្រិតណាក៏ដោយ ។ ម្ចាស់យានដ្ឋាននេះ ក៏បានណែនាំដល់បណ្ដាអ្នកប្រើប្រាស់រថយន្ត ជាពិសេសអ្នកប្រើប្រាស់រថយន្តមួយទឹកទាំងអស់ ឲ្យពិនិត្យមើលកញ្ច្រែងក្ដៅ និងកញ្ច្រែងត្រជាក់ នៅរៀងរាល់ប្តូរ ឬបញ្ចូលហ្គាស់ត្រជាក់២-៣ដង។ ពេលខ្លះ ម៉ាស៊ីនត្រជាក់មិនសូវត្រជាក់ មិនមែនមកពីស្ទើរហ្គាស់ ឬអស់ហ្គាស់ទេ តែវាអាចបណ្ដាលមកពីកញ្ច្រែងទាំងពីរ ដោយសារតែចតហាលថ្ងៃយូរពេក ឬដោយសារតែមានធូលីនៅជាប់នឹងកញ្ច្រែងច្រើនពេក ។ លោក ភីន ដេត ម្ចាស់យានដ្ឋានមួយកន្លែងនៅក្រាំងធ្នង់ បានឲ្យដឹងផងដែរថា compressor ម៉ាស៊ីនត្រជាក់មិនល្អ ក៏អាចប៉ះពាល់ដល់ម៉ាស៊ីនរថយន្តដែរ ។ ជាក់ស្ដែង នៅពេលដែល compressor មានបញ្ហា វាធ្វើឲ្យម៉ាស៊ីនរថយន្តប្រឹងខ្លាំង ដើម្បីអូស compressor ឲ្យដំណើរការ ដូចនេះហើយនៅពេលវាអូសយូរៗទៅ វានឹងធ្វើឲ្យម៉ាស៊ីនរថយន្តឡោក ឬអាចរលត់តាមផ្លូវក៏មានដែរ ។ លោកបន្តថា ម្ចាស់រថយន្តគួរតែឲ្យជាងពិនិត្យ compressor ឲ្យបានទៀងទាត់ផងដែរ បើសិនជាសង្ស័យថា វាមានបញ្ហា ហើយបើសិនជាមានបញ្ហា សូមកុំទុកវាឲ្យនៅបែបនោះអី គួរតែប្តូរឬជួសជុលវា ដើម្បីការពារដល់ម៉ាស៊ីនរថយន្ត និងប្រព័ន្ធម៉ាស៊ីនត្រជាក់ទាំងមូល ព្រោះបើនៅទុកបែបនោះ នឹងធ្វើឲ្យការខូចខាតកាន់តែខ្លាំង និងត្រូវចំណាយច្រើនក្នុងការជួសជុល ៕
ចែករំលែកព័តមាននេះ